【A郎】EP. 12 南島大車拚！武術ê高手to̍h是ài按呢相phah！
瘦猴hit pêng是bat-tah sa--leh烏白hut，烏mo͘--ê mā閃mā擋，ta̍k不時，siòng tio̍h khang-phāng to̍h kā瘦猴cheng--1-ē。A鳳hit pêng，hun吹ná kòng ná配合時機出脚踢，mā kah紅mo͘--ê phah kah難分難解，chit ê紅mo͘--ê jú phah koh jú歡喜，一直chhiàng講「Koh來！Koh來！無夠！無夠！」正港是標準ê sio-phah雞á，看--起-來phah kah真享受。2 pêng看--起-來lóng無人占贏，5分á 5分。Chit時A明拖2 ê布袋過--來，表情真hiau-pai kā A郎講：「戰爭beh贏to̍h ài看我che hái-kho͘-lah-suh ê妙計，我chit ê軍師m̄是紙糊--ê lah。」A郎問講：「你拖he是siáⁿ？」A明應講：「錦囊！」Sòa--lòe無ke講話，2 kha布袋內ê mi̍h出力對2 ê tng teh sio-phah ê所在phiaⁿ--過。Mi̍h-kiāⁿ落地瘦猴kah A鳳sûi poa̍h倒，烏mo͘--ê kah紅mo͘--ê soah kui叢好好khiā在在，瘦猴kah A鳳詳細看chiah知影ka-tī踏tio̍h kin蕉皮，oa̍t頭to̍h看tio̍h A明1手the̍h 1 kha布袋。A鳳先發作，罵講：「你chit ê無路用ê狗頭軍師，你到底是toh 1 pêng--ê！」瘦猴mā罵講：「等--leh我chia phah soah你to̍h知死！」Liân A郎mā用冷kah kiōng beh ē結冰ê眼神kā A明gîn。A明人sûi bih kah hn̆g遠，tiām-tiām lóng m̄敢出聲。
Che虎kah豹人koh真紳士，無趁in poa̍h倒ê時偷phah，che mā凡勢是tng teh sio拚ê時，天頂有kin蕉皮lak--落-來chit件tāi-chì實在siuⁿ hàm，in 2人原地khiā好好，beh等對手khiā好勢koh再戰。To̍h tī瘦猴kah A鳳準備好beh繼續chhia-piàⁿ ê時，圍tī邊--á ê人慢慢á分開，1 ê頭mn̂g白phú-á白phú ê中年人行--出-來，直直ùi A郎hia行--過，虎kah豹看tio̍h伊來，to̍h thè ùi伊後壁去，A鳳kah瘦猴sa無cháng，mā kā A明giú--leh，3 ê人退ùi邊--á去。
中年人行到離A郎1丈遠ê時，ta̍uh-ta̍uh-á kā插tī腰帶ê木刀poe̍h--出-來，刀gia̍h平平在胸前，刀尖正正對A郎，chhek 1 ê勢，A郎mā ta̍uh-ta̍uh-á kā木刀poe̍h--出-來，gia̍h koân過頭殼頂，mā chhek 1 ê勢。中年人sòa--lòe ta̍uh-ta̍uh-á kā刀làu ho͘ kē，變1 ê勢，chit時A郎mā tòe伊koh變1 ê勢。2 ê人to̍h án-ne tī原位不斷變勢，soah無人向對方出招。A明nauh 1句講：「看lóng無，in是leh pìⁿ-siáⁿ-báng？」瘦猴ka應講：「Nā武術ê高手，kan-na看chhek siáⁿ-mih勢，to̍h知影koh來beh án-chóaⁿ出招，koh khah厲害--ê，ē-tàng看kah sòa--落-來3，4招，kah he gâu行棋ê人kāng款，你mài看in kan-na tī hia teh換勢，其實in 2 人精神ê真集中，心內已經戰kah chiâⁿ緊張。」A明聽了koh詳細ka看，koh有影neh！In 2 ê人頭殼額á已經開始leh出kōaⁿ，勢mā jú變jú緊，tī眾人緊張kah kiōng beh bē喘氣ê時，2 ê人無koh變勢，gia̍h刀ê手mā tòe leh sôe--落-來，汗流sám滴，尤其是A郎，已經喘kah ē kho͘雞bē pûn火--ah。中年人笑笑講：「真正不得了，最後hit刀我險擋無tio̍h。」A郎ná喘ná應講：「師傅siuⁿ過謙--lah，我頭前早to̍h中你kúi-nā刀。」
Tang時á chit ê中年人to̍h是進--à，1冬前重傷tòa tī A郎in tau治傷，尾--á離開去報冤仇，冤仇報了轉來南島，iā to̍h是伊ê故鄉養老。因為伊人熱心刀法koh真好，少年ê時四界行踏tāi-chì iā看kài chē，só͘-pái眾人便nā有疑難雜症，lóng來hâm伊參詳，真thok-tiōng--伊，久--來soah變做南島ê頭人。進--à問A郎是為怎樣來到南島，A郎koh kā伊beh來南島phah歹人ê tāi-chì，講1遍hō͘進--à聽，進--à詳細聽kah soah，chiah講：「你hông騙--去-ah。Chit-má mā beh黃昏，咱sóa來goán-tau食飯，chiah ta̍uh-ta̍uh-á講。」
去到進--à in tau ê時，虎豹兄弟mā在場 ，進--à chhōa眾人到飯廳，招呼ta̍k ê坐好勢了後，to̍h去chhōe長工，吩咐講人客來食飯，趕緊去款飯菜，講soah，人koh轉來食飯桌坐。無jōa久，長工to̍h kā桌頂款好勢，koh the̍h 2 kó͘ m̄知是siáⁿ ê飲料，眾人ê杯á lóng thîn kah tĭⁿ-tīⁿ，詳細ka chîn，黃黃koh ē phuh pho。進--à講：「來，ta̍k ê先乾杯，止嘴ta！」講soah杯á phâng--leh to̍h ko̍k--落-去。虎豹兄弟聽tio̍h進--à án-ne講，mā kah進--à kāng款lim kah tă-ta，kan-na chhun A郎in 4 ê外地á，你看我我看你，m̄知beh án-chóaⁿ。進--à鼓舞講：「好mi̍h--lah，免giâu疑！」A郎in 4 ê人m̄知he是siáⁿ-mih飲料，心內tám-tám，m̄-koh做主人--ê teh chhui，mā歹勢chhek人ê意，有樣看樣，杯á sa--leh，大嘴ko̍k--lo̍h-khì，kui杯ho͘乾，4 ê人目睭soah lóng金--khài。A明tāi先講：「Ŏ͘，che好lim neh！」A鳳接落去應講：「甘甘phang-phang koh苦liám-á苦liám，好lim。」A郎講：「Lim--lòe kài-sêng kui seng-khu ê火氣lóng消 kah lĭ-lī，有影好mi̍h！」瘦猴siāng kah-ì，問講：「Che是siáⁿ-mi̍h，我是做進出口ê生理人，nā ē-sái--chit，我想beh進口去goán hia賣。」進--à應：「Che是goán chia ê特產，hō做bì-luh，是麥á kek ê酒，nā講beh買，咱ē-tàng ta̍uh-ta̍uh-á參詳，咱先來kā lín ê誤解tháu ho͘開。」Sòa--落-去to̍h開始khai-phòa hō͘ A郎in知影。
