讓位？博愛座

最近敢若博愛座有代誌，我無看新聞，毋知影是啥物代誌，可能有人佇罵坐佇博愛座的少年人。

▓有一擺，我陪查某囝坐公車出去，

伊共查某孫揹佇身軀前。上車了後，就徛著。彼站仔，查某孫攏毋予伊老母坐，坐落來就哭，伊愛老母徛著，會當看外面街仔路的風景。

徛佇車頭，司機的後面，車的頭前有幾若个人徛起來，欲讓位，查某囝共in講：「我不坐，我要站著。」in閣坐落去。

幾若分鐘了後，車後尾的人出聲：「那位抱小孩的媽媽……」敢若佇怪頭前的人無讓位，我的查某囝對in講：「我不坐，我要站著。」講共逐家攏有聽著才會煞。有夠忝矣！

▓我新店社區開出去的公車攏有位通坐。我攏坐博愛座，

共「普通」的位讓予「一般的人」坐。

有一工，上車了後，我就目周瞌瞌歇睏。車行到中途，我目睭擘金，看著我頭前的博愛座坐一个少年的查某囡仔，伊的邊仔徛一个約量仔八十歲的阿婆仔，手扞佇伊的椅背頂懸，伊無讓位耶！

到捷運站，伊落車，我嘛落車。行幾若步路，停紅燈，我想幾若秒鐘，決定要講。行進前一、二步，問伊：「請問，你的身體不舒服嗎？」

伊共佇看手機仔的頭攑懸，搖頭：「沒有。」

「剛剛你沒有讓位給站在你旁邊的阿婆。」伊無講話，轉青燈，阮攏走去捷運站。

毋是少年的人就袂使坐博愛座，有需要的人攏會使坐，我愛先問伊的身體有無爽快無？若無無爽快，共伊講，伊應該讓位予阿婆，閣再，伊坐的是博愛座。

話講出去，彼工我就安心矣！

▓有一工，我佮朋友坐捷運，阮２个坐佇門邊，坐做伙。

車停，起來一个老先生，我的朋友馬上徛起來欲讓伊坐，伊誠無歡喜：「我有那麼老嗎？」抑是講：「我沒那麼老。」伊毋坐，我看伊毋坐，我閣坐落去，朋友嘛綴我坐落來，阮繼續講話。

我這馬寫到這，想著，彼个老先生毋坐，閣有性別的問題，看起來，伊比阮加幾若歲，毋過伊是查埔人，查埔人予差無偌濟歲的查某人讓位，伊若猶勇健，是無法度接受的代誌。

我想著有一个朋友定定佇講的：「棺柴是貯死人，毋是貯老人。」所以，嘛會使按呢講：

「博愛座是予有需要的人坐的，毋是專工予老人坐的。」

Matt Bennett on Unsplash