我去銀行領錢、匯款。佇銀行外口的自動提款機排隊。我的頭前排一个查埔人，有２台機器，有２个oo-bá-sáng舞半埔猶未煞。等一睏，看正爿彼个咧收物仔，欲走，左爿彼个喙咧唸：「這台不能領一萬塊。」換去正爿彼台，我頭前的查埔人入去用左爿彼台。
玻璃門內底的保全共門打開，問我：「妳要領錢嗎？」「是。」
伊叫我入去，𤆬 tshuā我去一台機器面前，指彼台，我講：「這裏也有。」
我開始揤螢幕，出現「中文」佮其他幾若種文，我揤「中文」，閣來「台語」佇上頭前，猶有幾若種，想著，有台語通揤的位，盡量揤，表示有人咧用台語。
錢領完，匯了，去揣補印寄金簿仔的機，印幾若頁了後，印完，愛換薄仔，我想欲揤號碼牌，螢幕頂懸有五、六種業務，我慢慢仔看，保全行過來，問我：「要做什麼？」「補摺。」伊幫我揤一張號碼出來。我佇外面排隊的時陣，有看著伊一直幫人客揤號碼牌仔。
我咧等的時，遮想著到這馬攏予人搝去，講華語，連鞭愛講台語。叫我的號碼，我講：「我欲換簿仔。」伊用台語講：「好。」幫我辦。
我嘛無知影是按怎今仔日佇遮攏袂記得講台語，好佳哉，上尾仔有想著，講一句。
