我細漢的時，去外媽兜，定定聽著大人講一句話：「大漢的愛讓細漢的！」
我聽著阮老母佮阿姨佇in的尻川後講：「大漢的永遠是大漢的。」外媽敢若有聽著，一點仔嘛無改變in的講法佮做法。大表妹做誠濟代誌，嘛予人罵上濟。
阿妗咧上班，有４个囡仔，代誌有人做，囡仔若冤家趕緊恬恬就好，無人去想逐擺攏罵大漢的，有合理無？無人想著大漢的伊嘛是囡仔。
我的大表妹減我５歲，彼當時仔我看捌，阿舅沒予大表妹權威，隨時佇伊的小弟、小妹的門頭前講伊做毋著、袂曉的代誌，毋但「講」爾爾，抑有罵佮笑；叫伊去幼稚園𤆬小妹轉來，小妹徛佇路中央毋行，伊一點仔嘛無辦法，轉到厝內，閣予爸母罵，是按怎去遐爾仔久？爸母一點仔無想著大表妹的情形佮立場。
我認為大表妹一世人攏咧討爸母的愛，一世人做好人，是上乖、上幫忙的查某囝，毋過攏討袂著，阿妗十幾年前過身，後來伊的老爸有女朋友，蹛in兜，看起來伊上重視的爸母早早放捒伊矣！爸母的愛永遠討袂著。
妹妹哭，就是姊姊沒有照顧好。
