Philosophenweg
陪伴你家己行你 ê 路 Geh deinen weg lass dich begleiten
我 tuì「數字」無感覺，所以從來 m̄ 捌要意部落格若股市 ê 線圖，夜間部同學 gún 翁就無這个想法，伊要意部落格 Meine Reisen ê 數字要意甲無人行踏隨 kā 拋荒到今。
伊這款態度 hōo 我愖著猶 tī 面冊沐沐泅 ê 過了代，有人 uī-tio̍h 成做桶箍骨力做蝶仔一四界飛去人兜挨拶兼栽喙花，有人 uī-tio̍h 美麗 ê 數字甘願 hōo mǹg-sǹg 龜鱉叨趖生毛帶角 ê 人侵門踏戶吵家抐計。
我食現實 buē 生龍銀 ê 事工 buē 沐，準做伊是金色 ê 驢仔摸一下隨生龍銀，這龍銀 buē 𤆬 hōo 我恬靜不過貿來規山坪 ê 刺鑿，我 mā buē 綿死綿爛交伊纓纏，畢竟落塗時八字命，我出世 ê 年閣 m̄ 是《臺灣女性人物群像》，我出世 ê 年閣是頭路 m̄ 驚覓無 ka̋nn 驚討食 m̄ 討趁。
別人 ê 面冊代交我一屑仔攏無底代，所致 m̄ 免綿豉一粒田螺煮九碗湯。不過當唯一忠實讀者請教我這个問題，我 mā 跟綴伊成做一隻貓四界 Miau 四界跋桮拜神「我彼篇田庄雜菜湯是按怎成做『本日熱門』？」畢竟我使用 ê 文字系統 tī 這个西瓜愛倚大爿 ê 年閣是軟市。
「我 buē 感覺你 ê Blog 是軟市，起因有海底雞」翁那聽我哭呻，呔 ē 揣無家己雄雄發這句話。
著--neh，我這个交糞埽市仔攏無地比並 ê 所在捷有海底雞來行踏，一想著這我隨 tuì 伊講「有囝有囝命，無囝天註定，你部落格骨力寫，有一工海底雞絕對交你 say Guten Tag。」
「𪜶齊寫四角字，我讀無半字」伊笑應。
「免驚，準做你寫德文抑是西文𪜶 mā 照常 Maulwurf 鼢鼠 ê 海底雞」我 kā 桮收好講「自囡仔到目今，m̄ 管來自西方抑是東方 ê 神明我從來 m̄ 捌 kā 𪜶分甲清清清，除了耶穌交聖母，觀音交媽祖。」
「我 mā kan-ta 捌耶穌佮聖母」翁講。
「按呢就夠額，畢竟𪜶是頭人，所致只要你繼續綿豉寫 Blog，海底雞絕對來 say Hallo 抑是成做你 ê 網路烏面賊，像 Písek。」
「彼足譀古。」
「一屑仔攏 buē 譀古，學這个系統 ê 人大多數攏有這个歹癖，m̄ 管讀有抑是讀無齊是漢字，羅馬字 mā 是 m̄ 管有戴帽仔 ê、綁牛鬃 ç 抑是紮兩蕊目睭 ö 齊是 Anglo-Saxon 盎格魯.撒克遜，這个問題你搪過萬外擺，敢 m̄ 是。」
「骨力寫，綿豉寫，有一日你 mā-ē 成做 Starry starry night, Paint your palette blue and gray, Vincent Willem van Gogh。」
「這段話有話縫。」
「無話縫 kan-ta 有你 ê 辯話骨。」
「Tsit-má逐家上欠缺ê就是 你ē當講出一句好ê台語，正確ê台語，若是咱有能力寫一篇文章iah是一句完整ê話，m̄免用詩ê表現來表現ê時陣，我感覺對推展台語較有幫助。」（249 【台語女性書寫】 王薈雯， 6:58）
「Ē當寫當然是較好，m̄-koh我感覺ē當講koh較重要，凡勢這10冬，因為科技ê進步，凡勢電腦ē凍(當)替你寫，你ē凍(當)揀佗一套」（249 【台語女性書寫】 王薈雯， 16:58）
「我感覺就是有人無佮意羅馬字，伊就是感情上無法度接受，雖bóng講彼m̄是啥物足大ê學問，所以若是有人koh做一套，彼套是大部份ê人ē當接受ê，我mā ē使隨來改。」（249 【台語女性書寫】 王薈雯，17：52）
《臺灣人臺灣事》 -- 台語•生活電子報
德國安息日是我唯一有法度 kā 時間撥 hōo Hena Ma 致心聽伊講臺灣人說臺灣事。我無囡仔，覓 ê 穡 mā 無厚甲若銀行金庫，總是自透早精神到唔唔睏，一日若干樂遨遨輾 ê 貼貼 hōo 我讀本書攏無法度接續學生時代 ê 慣勢，那讀書那聽音樂那交人破豆。
翁講，這是有歲頭 ê 標配。事實敢是按呢，我 m̄ 知影，總是我清楚知機 la-jí-ooh 響甲天篷 kiōng-bueh 破，我猶原有法度那款飯頓那 kā la-jí-ooh 放送 ê 訊息鏨 tī 海馬鉼針。
我做家甲 ê 聯邦交私人 la-jí-ooh，逐禮拜日透早 9 ~ 11 齊是教堂資訊 hōo 我慣勢 kā 聽 la-jí-ooh ê 慣勢徙來聽 Podcast。
Hena Ma ê Podcast 我 m̄ 是自頭開始聽，總是自第一斗接觸我捷捷成做貓，好玄主持人飽滇 ê 資訊是按佗落來，押尾 tī....我無 Hena Ma ê 耐性有法度翻頭揣集數，m̄-koh 按 Hena Ma ê 節目我學著往過需要行圖書館 ê 學術論文，目今 tī 網路攏有地請教 hōo 我感覺誠心適 mā 跟綴伊 ê 跤步斟酌看跋桮請教來 ê 文章。
頂回 uī-tio̍h 請教漢藥 ê 俗諺語讀著公開 ê 論文，發現論文窮實無遐爾仔白汫無素。
Hena Ma ê Podcast 有足足面相，其中 ê 台語女性書寫 hōo 我厚揬揬 ê 感想，特別是王薈雯這篇訪問，因為伊講出我 tuì 詩 ê 想法 mā 寫出我 tuì 啥物是臺灣字，台文字愛按怎寫 tsiah 是正範等等 ê 想法。羅馬字抑是漢字 tuì 我來講攏是字，所致我 buē 了時間交人討論這个字才是正範，佗一套羅馬字 tsiah 是正範 ê 問題，總是我 ē 順教育系統行這條打馬膠猶未鋪甲誠 tsiâu-tsn̂g ê 路。
渡自家行尞，行你 ê 路 Geh deinen weg lass dich begleiten
這是收著某某文學獎比賽通知 kā 詩寄出去押尾無著賞 ê 哭呻文。
彼陣 ê 我因為著過一賞金，掠做家己是台語文𠢕人，所致一時間無法度接受這个失敗。現此時翻頭看彼陣 ê 家己正經是現世，不過有情緒自本就愛消敨，這篇哭呻文寫煞，Hena Ma ê 台語女性書寫 mā 出現 hōo 我順作者行𪜶 ê Philosophenweg 哲學路。
做伴自家，行入心肚个路 Geh deinen weg lass dich begleiten
若是咱有能力寫一篇文章iah是一句完整ê話，m̄免用詩ê表現來表現ê時陣 --- 當我跟綴 Hena Ma ê 跤步聽王薈雯分張伊 ê 想法，我想著家己捷哭呻 ê 代誌，咱 tī 台文作品內底較捷看著 ê 文體是啥物？彼款文體咱敢 ē 取來做日常對話？
這久翻頭看彼久，我猶原是田螺循舊逝，較行 mā 彼逝 ê 準做舊文熥百斗猶原 m̄ 捌詩 ê 低路人。早前寫 ê 文章無因為這个德文 buaih 閣寫私人代就 kā 註銷，正經是一件好代。
感謝家己愈來愈厚 ê 耐性。
