翁按公共無料書櫥紮兩本食譜冊轉來隨反來揣 Muse。
「這本齊是甜粅粅 ê 食譜會使得送伊轉去書櫥 hōo 伊交別 ê 人結緣」我知機翁 ê 企圖，總是甜粅粅 tuì 我無路，自然 buē hōo 伊向望成做我 ê 無閒。
愛食甜粅粅 ê 伊 uī-tio̍h bueh hōo 牽手 uī 伊無閒，下性命褒嗦牽手 ê 好手路，總是牽手交𪜶 ê 樂聖 Warum Beethoven Taub wurde 𫝛款一聽著無意愛 ê 事項隨聽無半點聲。「若是 gún 阿母隨款一份來做...」
「請。」
掠做牽手無聽著哭呻隨大粒汗小細汗開始解釋「我無彼个意思。」
「水潑落地歹收回，你 tuì 家己講 ê 歹話，總是 hőng 相信，好聽話煞 buē ê 凡事有結束，kan-ta 兩支煙腸➀」斡頭泅入家己 ê 世界。
見牽手按心狂火著行到連面清清攏無，伊知機代誌大條矣，下性命解釋伊 m̄ 是刁意故按呢講，總是水潑落地真正收 buē 回，我文文仔笑應 Sein Rat ist Wunderbar und Er frührt es herrlich hinaus，斡頭行入房間唔唔睏。
隔轉日，阿波羅準時上班，我 mā 照起工跟綴 Arthur Schopenhauer kā 短短 ê 日子過甲新點點，開始款早起頓。
阿母無伴舒魂透早精神 buē 隨落眠床 ê 老嬰 gún 翁，食老出癖開始洗面漉喙交做 Yoga，四常 ê 我見著這款假鬼假怪 ê 骨力無六月蚶，開喙臭 ē 著蛆，這久跟綴叔本華 ê 智慧 Um das Gute zu lesen, ist eine Bedingung, dass man Schlechte nicht lese bueh 讀出好 ê 代誌，一个條件就是莫讀出歹 ê 物件 hōo gún-ê 龍鳳生活有著來，無著汰，有著食，無著煞 ê 順其自然，起因跟雞跟雞啼，跟狗跟狗吠，伊無法度理解 gún-ê 問題，我無才調跟綴𪜶兜 ê 傳統就 kā 問題交 hōo 時間來賣囝無叫囝名，當田無從田頭行。
結婚真正簡單，離緣困難，矣。
不過，有一日兩人行到隨人付米，隨人落鼎，猶是比別人簡單，起因 gún 無 tī 臺灣登記，想著這點實在有夠感謝家己 ê 貧惰。
心情影響手路，手路影響心情。
Gún 翁這斗按無料公共書櫥紮轉來食譜冊，一本請伊送轉去書櫥 hōo 伊繼續交人結緣，一本留踮魂舒生喉韻。
Tī 人參殺人無罪，大黃救人無功，m̄ 管佗一帖藥齊無應效 ê 彼下昏，我就按算隔轉工跟綴 Schlank und Fit Low Carb fürs Büro 出菜，總是心情影響手路，手路影響心情，馬鈴薯條交美國茄準做烘甲無熟手 mā buē 烘甲臭火焦 ê 了然竟然出現 hōo 我隨搣鹽濫滾水，淨化家己 ê 気持ち。
心情影響手路，手路影響心情，䆀喉韻影響胃腸，一日元気 ê 來源因為䆀喉韻 hōo 我出門無閒踅神踅 buē 離。
Das Neue ist selten das Gute, weil das Gute nicht lange neu bleibt 新 ê 物件真罕得是好--ê，起因好 ê 物件 buē 一直新點點。當愛情行入四常，當四常成做基本需要 bueh 按怎 kā 基本需要成做新點點，這需要家己揣蝴蝶 m̄ 是纏綴別人 ê 胡蠅。
「我明仔載 bueh 出交今仔日相𫝛 ê 菜色，你敢有啥物想法」一日無閒貼貼結束按車頭行向 Aldi 隨敲一通電話 hōo 翁請教伊 ê 喙斗。
「你出 ê 菜色我攏佮意。」
又閣是聽甲耳空生研 ê 萬年版本，無興交伊喋詳隨品明講「這久 ê 你有自由 m̄ 寶惜，明仔載莫 tuì 我哭呻無人尊存你 ê 喙斗。」電話隨掛掉 mā kā 別人 ê 問題擲挕捒，快樂向 Aldi 出帆。
別人兜 ê mǹg-sǹg 交 hōo 別人兜，gún 兜 ê mǹg-sǹg 交 hōo gún 翁家己去處理。心情一轉化，餾第二斗 ê 天氣準做金烏交我耍覕相揣，攝出來 ê 影相交喉韻齊是滿意交美味しい。
原食譜 ê 含水碳素是鴞鴟喙豆，我 kā 伊換做白鳳豆交塗肉林檎。原食譜紅色菜蔬是 Kam-má-tooh，近來 Kam-má-tooh m̄ 是鞏金閣包銀是皇帝價數 bué buē 落手就 kā 伊換做紅菜頭。原食譜無青色菜蔬，慣勢一盤菜有虹色緻 ê 我就自動添麻仔葉做配色。
好喉韻紮元気，好菜色帶好心情，好日子愛家己攢，果真無剉(錯)，規欉好好。
食譜冊紹介伊是一出適合紮做便當 ê 料理 mā 果真無錯，佮意甲。
➀ 德文俗諺 Alles hat ein Ende, nur die Wurst zwei，無要意，清彩，隨在你
➁ 伊 ê 建議真好，而且伊執行甲誠好。Jesaja/28/29
