踅有機超市看來 ê 食譜。
成品完成那食那感覺佗落無合軀隨請教海馬向望伊引𤆬我揣著答案，海馬泅仔泅，泅仔泅，泅到盤底賰沙漠(bo̍k)焦甲無見半隻羊，半枝草，蠍(giat)仔 mā 按沙浮出來喝喙焦喉喝猶是揣無空榫通敆作。
「真失禮，我又閣紮家己 ê 慣勢 hōo 你食糜飯」翁猶未紲我話，蠍仔隨喝揣著水源矣，揣著水源矣。我 buē 記持濫雞肉....
「一頓無食肉 buē 損我一塊肉」翁笑應「另外，這出菜敢會使得繼續餾。」
海龍王辭水，反常矣，伊竟然無 uī-tio̍h 肉交我抨(phiann)椅摔桌並爸母上童詈我抨皮想 bueh 毒伊，海龍王辭水，反常，反常。喙無迵心肝，m̄ 通 kā 信篤。
「我 buē 閣退童三日，上童一月日。」
「彼是你 ê 自由交我無底代，總是我無興孤𣮈勸無祠，像恁按呢生，總是這款漚戲閣拖棚，破鞋閣繡邊 ê 龍鳳生活沓沓仔 hōo 我 buē 接接，畢竟我無恁兜歹囝也著惜，孝男無地借 ê 感情」碗盤窮窮斡頭行向廚房洗碗箸。
「我 buē 閣肉 hōo 𪜶食，骨 m̄ 分你齧。」
「順風捒倒牆，時間 ē 引𤆬咱揣著答案」無興 tuì 踅金龜磨，柔柔仔笑，勻勻仔煞句，手那汰這兩支按棄世年市場款轉來 ê 玻璃杯仔。
是抾惜抑是目睭掛斗概，見人物就愛？這个答案 mā 是隨人喙，敢 m̄ 是，所致 m̄ 免綿豉跟綴𪜶 ê 情緒過日子，總是尊存雞是討食焦，鴨是討食澹 ê 無相仝。
自徙岫來德國發見德國賊仔市交易閣好揣寶就三不五時綴 leh 趁墟。
這斗 gún 翁按伊參加 ê 網路社群得著情報，倚 gún 庄駛車約 40 分鐘 ê 庄有一間專門收二手貨 ê 店隨問我「有興趣行踏無。」
「當然興趣趣」我應。
「不過伊交往過 ê 二手市場無相仝，伊是專門收亡者遺物 ê 二手市場」翁講。
「入人門，順人意，遮是德國 m̄ 是臺灣」我笑應 mā 隨撨時間敆榫揣寶去。
自第一斗行踏二手市場，我慣勢看妝娗甲媠媠 ê 店面掛一个 Second Hand 交營業時間看心情 ê 告示，這斗順網路生份人 ê 分張行踏這間二手店 hōo 我見著另外一个德國慣勢，德國人 m̄-nā 愛囤食物，家具 mā 是。
網路生份人分張 ê 二手市場 m̄ 是店是倉庫，一間有三搭倉庫 ê 二手市場，一間專門囥電子用品，一間專門囥家俱，一間專門囥衫褲、碗箸日常用品，莫怪網路生份人建議 gún 較早出門較免走兩逝。
車停好勢交翁參詳按佗一間倉庫開始踅，交 gún 停一个空格 ê 貨車那落貨，那講會使得按上大間 ê 彼間開始踅。
順員工 ê 建議開始揣寶，揣無偌久我開始喝痠並請教翁敢有分區，翁笑應講無，你愛順這路線行到底。
衫仔褲區無興趣，閬過。
工具區無興趣，閬過。
廚房區，有興趣隨一格一格看，一格一格繩，那繩那感覺佗落 m̄ 是勢「你確定遮 ê 物齊按亡者來」我越頭問 mā teh 認真揣寶 ê 翁。
「確定」伊隨紲話。
「照恁爸母三不五時分張愛心來看，一日𪜶百日 mā 有一大拖 m̄ 捌使用 ê 我需要。」
「時到賣 hōo 遮就好。」
我無紲話，繼續繩我需要 ê 物 mā 好玄離開 ê 彼日，我 ē 留偌 tsuē 糞埽 hōo 人?
愖矣愖，我唯一 ê 大糞埽應當是冊櫥好處理 ê 書，硩 tī 心肝穎 ê 石頭隨搬走。
「𪜶遐愛 bué 我 mā 無𪜶法，總是向望時到賣 ē 出去 m̄ 是咱愛倒貼」翁 tuì 𪜶爸母 ê 癖 mā 無奈何。
踅 bueh 4 點鐘揀兩个全新按法國來 ê 玻璃杯仔交一个材質比市場閣較厚 ê 塑膠面桶，合計 3 €。
「後回 bueh kā 美國人剾洗，先攑日本剾刀剾恁家己做代先」轉來到厝那看到今數價猶原徛懸位 ê 法國玻璃杯仔那 tuì 翁講 mā 感謝家己願意處理痟貪病症。
