Schlank und Fit Low Carb fürs Büro 有一篇食譜是鱷梨仔俗麭𩛩(Avocadosandwich) alias Sa̋n-tóo-it-tsih hōo 我想著 2022 tī Berati, Shqipërisë(培拉特，阿爾巴尼亞)露營車交阿貓䖙露營椅那曝日頭那泅 Google 海 ê 記持。
「誠久無食麭，咱這幾工無趕時間來做麭食，bueh 無？」翁目那四界巡家私一大堆，較食 mā 香腸、Bá-tah、麭 ê 厝邊那講。
交 gún 誠懇睏幾仔暝現時靜靜䖙 tī 我大腿 ê 露營區主人家 ê 阿貓伸筋挽頷 Miau 一聲，我 mā 順阿貓 ê 心聲 tuì 翁講「臭頭仔包布，防蠅(風神)，無興趣。」講 buē 贏 gún-ê 翁鼻仔摸摸繼續𫝻伊 ê 手機仔，我交阿貓繼續享受德國鐵血宰相 Bismarck 所形容 ê 歐洲火藥庫燒烙 ê 日鬚。
Berati 是阿爾巴尼亞重要 ê 觀光城市，伊 ê 街路色緻交食食文化 hōo 我想著臺灣拄行入西化食食 ê 光景，𥴊仔店、菜蔬果子店是三跤步一坎店，麭店卻是規个新城交舊城踅透透 tsiah 見著一間若蘇聯風格架頂疏疏櫳櫳又閣無鮮沢 ê 麭。越頭看那條鞏金 ê 俗麭，「咱猶有麵粉，明仔載來食印度烘餅，你感覺按怎？」
本底若焦蔫玫瑰 ê 翁，又閣恢復花血「當然 mā 好。」
阿爾巴尼亞加工食物少，菜蔬果子 mā 無臺灣大色貨 m̄-koh 選擇比厝邊希臘豐沛，明仔載 ê 早起頓主角已經選定，賰配角...這是一个 m̄ 免家己動頭腦 ê 年閣，露營區 ê 網路 mā 無䆀甲若希臘 ê 龜 tī 海沙埔慢慢趖，放伊歇睏幾仔日 ê 巧手機仔捎起來開始請 Google 大眾廟賜我 Naan mit Avocado(印度烘餅佮鱷梨仔), Naan mit Gemüse(印度烘餅佮菜蔬), Naan mit Käse(印度烘餅佮 Tshì-sù) ê 智慧。
阿爾巴尼亞看起來若瘦田 ê 田園，有德國僫揣 ê 羊角豆、 五彩十色 ê 茄仔(德國 ê 茄仔大多數是美國茄)、番薑仔、Kam-má-tooh...遮爾仔豐沛閣俗價 ê 天然菜蔬無好好 kā 伊食甲哽胿太拍損，特別是羊角豆。
明仔載來攢羊角豆咖哩醬....這份看起來蓋好味素 ê 食譜就有著來，無著汰，有著食，無著煞，隨緣，準做手頭猶有鞏金閣包銀 ê 鱷梨仔。
2022 一目𥍉 mā 倚 bueh 3 冬，阿貓燒烙 ê 溫度猶原停跤，桂花時節拉圇仔燒 ê 日鬚牽涼涼仔風 ê 手伴 gún 一山盤過一山 ê 恬靜猶原停睏 tī 心肝穎，按算 ê 後過 m̄ 知底時 tsiah 有機會。
2025 3月 29 冬令換夏令 ê 暝時，手那𫝻手機仔，目那䀐倒 tī 洋爐 ê 食譜冊，心那愖明仔載 ê 早起頓 bueh 敆啥物味素。
落價 ê 麻仔葉愛緊銷銷 m̄ 通閣討債囥甲徛黃焦蔫，阿羅拜五捾來 ê 鱷梨仔有幾仔粒是隱好 ê 頭篩仔愛緊食，削薄 ê 大瓜仔哖➀ mā 愛緊窮好清氣，抑無收水就䆀味...，明仔載 ê 印度烘餅會使得交佗一味敆逝？
Avocadosandwich?
手伸向洋爐請教 Schlank und Fit Low Carb fürs Büro 伊自本 ê 面肉，烏麥仔麭抹一層厚厚 ê Khu-lì-mù Tshì-sù 疊鱷梨仔交𠕇果呔 ē 遮爾仔火燒豬頭，面熟？
Avocado mit Naan?
Breakfast naans，著，就是伊，2022 ê 按算這久總算有緣再相見，Es sollte so sein。
➀ 歐洲 ê 瓜仔哖有幾款無研究，總是以德國做記錄，瓜仔哖有兩款，一款號做 Minigurken 價數鞏金，一款號做 Gurken 抑是 Salatgurken 多數按荷蘭來。猶未寫 Blog 進前我無要意伊號做啥物瓜，開始寫 Blog 我好玄這瓜是啥物瓜。Minigurken、Gurken 是瓜仔哖，華語 ê 小黃瓜，Landgurken 是刺瓜仔，華語 ê 胡瓜。
