近來，早前無啥大問題 ê 肩胛疼，開始 tshan-tshiūnn 一尾三文魚搢水一路按肩胛骨泅到頭殼碗 hōo 我坐 mā m̄ 是倒 mā m̄ 是，不過，這个無爽快是我家己 kā 招 m̄ 是伊硬 bueh 佮我交葛(kau-kuah)。
Tī 手目無因無端幌韆鞦 teh 搐，我知影這是身體 tuì 我 ê 點揬「你 mőo 繼續蠻皮落去，規日交電腦黏黐黐」，總是我 tuì 身體 ê 關心是雜唸大家出蠻皮新婦 ê 我交電腦曷無一日貼貼像 gún 翁按呢。伊大丈夫我愈無代誌。
這個鐵齒銅牙槽硬 bueh 佮德國人耍牛頓草(gû-tùn-tsháu) ê 輸贏，當然 mā 是我輸甲忝忝 ê 斟一杯茶攏哀爸叫母。這个紅龜生蟲，龜怪 ê 歹癖 hōo 我想著因為畏羞禮(uì-siáu-lé)兼驚得失人 m̄ 敢 tuì 朋友講我 bueh 交你另家各食(līng-ke-koh-tsiah) hōo 家己 mā 致著這个症頭 ê 過了代。一想著家己不三時 tuì 踅螺仔門踅金龜磨，我就感覺匪類討債，特別是阿母轉去塗州我智覺著時間 m̄ 是用飛--ê，是直接無去 ê 目蚶猶 teh 交今仔日 ê 金烏盤撋，隔工 ê 日鬚已經來問 bueh tsham 伊交結無？
做牛著拖，做人著磨，阿母在身我有一个目標就是 hōo 行過 921 大牛換肩交兩个查某囝相紲離開世間 ê 伊 m̄ 免驚惶無所在通蹛，m̄ 免驚惶「我是青盲牛」ê 背後是我這沿 ê 人比𪜶較好字運寡，m̄ 免跟綴𪜶彼沿 ê 跤步，一支牛 m̄-nā 剝兩領皮 ê 有苦無地講。
阿母猶在生，逐日若干樂 ê 哭呻時鐘呔 ē 遮爾仔愛走標，阿母轉去塗州準做我猶 teh 揹殼，我猶是感覺時間若 leh 走百米 ê hōo 我無夠用。
筋骨 ê 痠疼若一尾蛇按肩胛頭趖到手指頭仔，目那看 m̄ 是大自然紹介就是二戰記錄片 ê 德國公共電視台，目那看那𤺪，心 mā 那看那齪，阿母過往彼時 ê 浮浮又閣徛倚講「促較倚--leh」hōo 我開始巡厝內有啥物件通 hōo 我 Phông-kong 踏斗一下。
彼緟猶原規緟好好徛𫝛位 ê 冊緟....夭壽骨，自 2019 到目今 3 冬外外，我竟然 kā 𪜶放外外，這 m̄ 是遠遠刣雞鵤，近近相穢目，這是啥？
一想著家己猶 teh 餾過了代 ê 慣勢，規仙人若 hōo 雷公摃著隨傱去冬天雨較貴麻油 ê 冊緟。
那揀冊表小妹 ê 白河阿媽話母 mā 開始 tī 我 ê 耳空唱歌「夭壽骨喔，了然喔，討債喔。」
「阿媽我敢是無毛雞假大格？」
「無閹雞趁鳯飛 ê 背骨較重要。」
阿媽 ê 話 hōo 我想著《鄉史補記》秀姑按無肚臍轉做有肚臍到奇來雙手咇咇掣，搝春風 ê 手䘼，叫「阿母，是按怎生出來 buē 吼？」
我 ê 四常猶未行到愛綴人去日本裝肚臍，總是我清楚知影我無家己創造空間，有一日搪著遮 ê 序大，我 mā 搝春風 ê 手䘼，叫「阿母，是按怎生出來 buē 吼？」
寫部落格是好議量，總是無出門 ê 日子 buē-tàng 規日 kan-ta 交伊貼貼，先來讀《Thá-kheh》。
Laut italienischem Silvesterbrauch bringen Linsen an Neujahr Reichtum und Glück. 根據意大利 ê 傳統，二九暝食珠仔豆金銀財產滿四界並得著一隻德國豬➀。
REWE 今年按 Payback 這个 hōo 我掠做是 Paypal ê 紅利系統退出，伊交我閣一斗按向倒爿行向正爿行，行向仝一條路線。
自 gún 翁公司取消 Sodexo 索迪斯 ê 餐券，一張 5€(歐元 Au-guân)，我就罕得 kā 𪜶交觀，畢竟𪜶兜 ê 物較無敆我這款無食氣氛 ê 人，除非敗價。
敗價需要 kā 伊一分田嗙甲幾若甲就知影𪜶 ê 物件有偌爾仔漲懸價，當然啦，這是我個人 ê 感受無表示逐个人齊按呢認為，不過當 Sodexo 猶 tī 橐袋仔𫝛款 ê 物食，REWE 比 Netto, Lidl, Aldi 較貴我 mā 無要緊，畢竟錢是 gún 翁公司撏 m̄ 是我。
Sodexo m̄ 是逐搭攏通使用，所致 uī-tio̍h bueh 消化遮 ê bueh 到期 ê 餐券，REWE 是上好 ê 選擇。
自 REWE 2014 年兜 tī Mein Prospekt➁ 推廣自家紅利政策，見著若割貨價數 ê 物，外口若冰櫥 ê 我，裘仔囊 leh mā bueh 去實踐俗物 buē bué 破家。
三王節➂一過，通貨膨漲又閣恢復正常，食麭愛抹 ê Tshí-sù 醬 mā 按鞏金閣包銀 ê 皇后退位抹塗烌做塗炭仔，而且 m̄ 是一位皇后退位是一斗三位皇后美國 ê Philadelphia，丹麥 ê Buko，德國 ê Exquisa 做伙退位換我做紅璇皇后 --- 新年發財 ê 款一盒儉塊2，款 10 盒儉 12€ ē-tàng bué 盒半 ê 雞襟胸、牛挽肉、牛豬挽肉、7 盒白銀魚、三盒雞摸、三盒半豬挽肉...，頇顢趁錢 mā 驚錢成做別人 ê 紅璇皇后我 ê 壁紙就愛較骨力窮斤算兩。
這斗 ê 落價，逐家 kan-ta 攏撨好勢，恁兜割這間貨，gún 兜掛這間貨 hōo 我若歌廳秀 ê 小歌手趕場無閒𩑾𩑾甲暢粅粅。
REWE 是少數提供實體無料菜譜 hōo 消費者 ê 店家，𪜶兜 ê 菜譜色緻 tī 往過捌 hōo 我提來做背景圖，像這 Chatschapuri掠漏 ê 幸福 。
這久翻頭看彼久，感謝家己 buē 閣驚得失人，水庫水滿過蓄水標準準做 bueh 做大水，斡頭隨離開彼个扶挺兼妝娗 ê 選美角勢 --- 面冊是正確 ê 決定。
我無反對面冊，總是自驚得失人跟綴朋友參加伊 ê 社團，我 ê 口座準做是私密猶是有人有法度家己開門來坐...
這个問題窮實 mā 無遐僫解決，總算畏羞禮(uì-siáu-lé) ê 我，迒 buē 過無 ka̋ng 接受紅龜生蟲，龜怪 ê 歹勢、失禮。
這久翻頭看彼久，我愛這久 ê 簡單。
這久翻頭看彼久，相𫝛 ê 菜色我 buē 鋪往過 ê 風神，這表示我理解啥物號做 Nichts ist mit dir zu vergleichen 無啥物代誌通交你比並，我是家己上重要 ê 金銀財寶。
這出菜本底就有記錄，總是這斗交 REWE 菜譜相見，我感覺 REWE ê 味素比三冬前 ê 記錄閣較敆喙，就迎新棄舊 kā 攝相交菜譜齊換新衫。不過，我猶原是我，準做我佮意 REWE 菜譜我 mā buē 閣 tshan-tshiūnn 往過一切照步數來行。
➀ 好字運
➁ APP
➂ 逐年 1 月 6 號
