Bratkartoffeln
二樓羅馬尼亞厝邊月初鬥一个好，月底準備 uī-tio̍h bueh hōo 後生交查囡仔有一个較曠闊 ê 環境享受一世人 kan-ta 一斗 ê 童年，決定搬新厝 hōo gún 翁仔某感覺誠 m̄ 甘，畢竟千金買厝，萬金買厝邊，準備搬新厝 ê 阿羅交阿珊 mā 有相𫝛 ê 感受，畢竟𪜶交我齊是德國 ê 外國人。
阿羅翁仔姐是 gún 邦州政府交羅馬尼亞邦政府共同合作 ê 藍領工作人員，本底按算轉去羅馬尼亞 ê 𪜶 tī 確定查某囝仔 bueh 來報到，繼續簽約踮德國拍拚一段時間 tsiah 轉去羅馬尼亞。
2022 露營車日子經過阿羅𪜶兜附近，我個人 mā 是認為 tī 囡仔猶細漢留踮德國拍拚好過轉去羅馬尼亞自由自在，我 ê 14 是轉去做散工晟養囡仔。阿羅交阿珊 ê 能力無遐爾仔䆀，總是𪜶交臺灣時行形容出外囡仔 ê「北漂族」仝款，無離開家鄉，人生僫揣機會改變。我 ê 食食行尞無阿羅交阿珊 kā 我鬥相楗，腥臊豐沛五彩十色較早睏較有眠，像鞏金 ê 木瓜、楊桃、時計果遮 ê 若無傍阿羅交阿珊 ê 福氣，𪜶 buē 出現 tī gún 兜。
近來，阿羅捾一盒貴桑桑 ê 青 Lê-bóng hōo 我講過年前 ê 福利 --- 阿羅 tī 青果社上班，廠商退轉來 ê 菜蔬抑是果子是𪜶遮員工無料 ê 福利。
「Limette」阿羅笑微微講。
「Vielen Dank und guten Rustch」說多謝並祝福𪜶規家伙仔順利滑入新年(新年快樂，平安幸福)，我又閣成做一隻貓 Limette m̄ 是黃色？
好玄若圓仔一烰，無食落腹 buē 挃，隨上網請教 Google。
原來如貓，皮厚有子是 Zitronen，皮薄無子是 Limette，後回款 Lê-bóng 愛較斟酌繩𪜶 ê 無相𫝛，抑無一日到晏 teh 哭呻，這 Lê-bóng 呔 ē 遮爾仔鞏金。
德國 ê Zitronen 交 Limette 無特別 ê 色緻，我 ê 14 是，無一定是黃皮抑是青皮，不過名稱齊寫甲明明明，總是大目新娘揣無灶，永遠看 buē 著 Lê-bóng 交青 Lê-bóng 2 字。
寫著 Lê-bóng 想著往過阿母 mā 按呢分 Lê-bóng 交青 Lê-bóng，不過阿母是按呢稱呼，Lê-bóng 交無子 Lê-bóng。序大 ê 智慧課本永遠 buē 傳授，掠做讀有字 ê 咱總愛耳空重，聽無。
近來感覺家己較有讀冊，交攝相技巧 mā 較進步就開始巡田園，翻田塗，翻著這篇塗肉林檎炒隨感覺這圖愛改，這文字 mā ē-tàng hōo 伊佮假鬼假怪張家己有讀書 ê 身勢。
德國傳統塗肉林檎炒是規粒生生落鼎炒，彼足厚工並食油而且無趁燒食油滓味(iû-tái-bī)重甲 khuiann-khuiann。當然這是我個人 ê 喙斗，無表示每一个人攏按呢認為，總是 uī-tio̍h 解決這个問題，塗肉林檎炒我猶是慣勢先煠 hōo 半生熟，水 kā 拭 hōo 焦 tsiah 落油鼎炒 hōo 赤赤芳芳。
這斗 ê 塗肉林檎炒因為阿羅 ê 青 Lê-bóng hōo 我想著，透 Lê-bóng 汁 ê 馬鈴薯無論是烘抑是炒色緻齊比無透 Lê-bóng 汁 ê 馬鈴薯閣較薯光炎炎 ê 金媠。
這个出菜手路 mā 是半桶師仔攏紩無半條路 ê 我上好妝娗家己低路 ê 王祿仔仙手路。
Skillet Potatoes
