下昏暗讀王秀蓉老師《我咧唱歌》，其中一段「會記得我起床無洗面，佇喝欲揣衫進前，我是坐佇戶橂咧扒糜。我想講欲出門，上無面嘛愛小「𫝻」一下。」
我理解這段話 ê 意思，m̄-koh 我足想 bueh 確定伊敢是記憶中 ê 字，隨請倉頡鬥拆字骨，拆無字，請教字典，拆字爿猶是揣無字。按呢愛來請教 QR Code 聽聲揣羅馬，隨請無 3C 元神就敢若 hōo mǹg-sǹg 食去 ê 翁，「我性命上親愛 ê 翁婿，你敢會使得 hōo 我齪嘈一下？ 」
「免齪嘈規仙人通借你，唯獨無錢通借，請講」翁學 tsuē 冬前翁仔姐做陣去南投九份二山看伊好玄 ê 地牛翻肩，押尾牢 tī 路標雙叉路心頭亂操操，一位古錐阿伯行倚我隨講「阿伯，歹勢 kā 你借問一下」，阿伯笑微微講「無問題，hōo 你借 kan-ta 無仙通借」兩人隨笑甲吭跤翹放伊一个人捎無寮仔門，問一个路呔會 tsiah 歡樂。
「感恩--hah」我笑甲目汁㴙㴙落 mā 想著彼日 ê 奧妙。
你敢相信非科學？
我個人相信 m̄-koh 無迷信，像EP464 黃越綏｜【名人專訪】什麼是迴光返照 Feat. 張明志，張明志醫師 ê 分享。
等待翁 kā 我鬥掠伊認為有品質閣無烏白藏物件 ê QR Code，我順伊 ê 話踅轉去九份二山。
阿母準備轉去塗州賣鴨卵彼冬，我請翁暫時莫來台灣，起因我無閒工通掠外款待伊，伊猶綿豉來台灣，我就隨伊 kā 有才調交無才調 ê 計算齊講 hōo 清楚。
九份二山 m̄ 是我第一斗行踏，國道六號引𤆬九份二山 ê 路標 mā 從來 m̄ 捌 hōo 我踅迷宮過，彼日按交流道落鄉道 m̄ 管按怎順路標駛就是 m̄ 著路，一直到搪著這位古錐 ê 阿伯。
這位引𤆬 gún 行向正確方向 ê 阿伯 tī gún 告辭 ê 時向後座微微仔笑講「山頂天較快暗，較早轉去」彼時 ê 我無特別 ê 感受，這久跟綴翁 ê 記持踅轉去彼日，我確定自古錐阿伯引𤆬 gún 按迷宮行出來，心有一種講 buē 出喙 ê 悲傷是阿母 mā tī 車頂交 gún 旅行。
九二份山隔轉日，早時 10 點猶有講有笑 ê 阿母 tī 一日兩斗會面 ê 暗時 7 點進前，無病無疼跟綴母娘去西方修行。
你敢相信非科學？
我相信，m̄-koh 無迷信。我相信彼日 ê 阿伯是派來拍開阿母 tuì 大牛換肩驚惶心窗 ê 伯公，九份二山彼隻雄雄吠 buē 離 ê 狗仔，提醒我你 ê 感覺無 m̄ 著，你 ê 阿母陪伴你身軀邊。
等待翁安 QR Code ê 空縫，我 mā 想著教典有這个功能會使得以挑手爿(thio-tshiú-pîng)算字劃揣字，「𫝻」手部 6 畫，教典排出 22 筆資料，直接跳到 6 畫，Bingo! 揣著矣，羅馬字重要，拆字爿 mā 足重要。
「𫝻」huê，若瓜笠仔(kue-le̍h-á) ê 第五調
1.不小心輕擦到。例：手𫝻著塗粉。Tshiú huê-tio̍h thôo-hún (手抹到灰塵)。
2.正反面來回輕磨幾下。例：刀仔提去𫝻一下。To-á the̍h-khì huê--tsi̍t-ē (刀子拿去磨一下)。
3.用手指在東西表面滑動。例：𫝻手機仔 huê tshiú-ki-á(滑手機)。
𫝻原來按呢寫，蓋媠蓋有想像，隨請教信望愛台羅輸入法敢有「𫝻」這个字，有，有這个字 m̄-koh 交我 mā 足佮意 ê「𬦰」是豆腐字。我愛這兩字，tī 部落格想 bueh kā 𪜶按羅馬字 ê「huê」佮「peh」轉做漢字有啥物方法通顯示？
啊，目汁㴙㴙落 ê tsha̍p 齊 Copy 後貼 Google Übersetzer tsiah 轉來部落格，按呢來試看覓。Oje, 有應效，有應效。電腦工程我是捌一箍呼 m̄ 知影按呢 ê 擔山填海敢有應效，總是順李勤岸教授寫 tī《哈佛台語筆記》抑是《青春寫真散文集》ê 一段話，遮我以家己 ê 理解做記錄「有人講標號無法度出現 tī 電腦，按呢就愛 kā 電腦教甲伊 ē 曉，像法文按呢。」
我 m̄ 知影我這款 ê 作法敢有才調 hōo 遮 ê 屬於台文標誌 ê 字有一日成做 Google ê 資料庫，總是無起手呔會知影答案，著 m̄。
寫著專屬台文標誌文字，我又閣 Perfect fit➀好玄往過 kan-ta 有法得按呢顯示 ê 癩 ko ê ko 敢有法度現台文標誌？隨請教典做見本 Google Übersetzer 做陸橋，有，有，有，kā「𰣻」貼去 Google Übersetzer 無閣成做豆腐字，Wunderschön!!!
這是早前錄 tī 食譜 ê 心行尞錄，彼篇食譜行過四冬心非常確定 buē 閣交伊相借問，隨翻新換食譜，舊文就徙來非讀書心得 ê《台語現代散文選》台文文學這格。
四冬前寫 ê 心情練跤花，有 ê 保留有 ê 刪除，四冬前我無要意「推薦用字」ê 本字非本字討論，四冬後我猶是無要意，起因文字 tshan-tshiūnn 這段當我搪著德語交英語無宛 2 體，英語交法語一模一樣話聲一落隨問伊「現此時 ê 我 teh 講佗一語？伊隨應講拉丁語」像吳南圖《鑼聲若響》ê 蟬(siân)無確定伊 ê 發音猶是我囡仔時 ê 聲音隨請 Mrs. Google 王秀蓉老師鬥相共，翁一聽著隨講伊是法語 ê 狗 Chien，我隨請維基百科解釋 hōo 伊聽𧌄蜅蠐是啥，隨見著法語交英語相𫝛 Cicadidae，德語 kā Ci 轉做 Zi，CA 轉做 Ka ê 理解這个語源根頭就知影這个字 tshan-tshiūnn 伊講 ê 無屬啥人，屬拉丁文。
「文字 ê 重要性除了記錄，上重要 ê 代誌是記錄 ê 文字愛 hőng 讀有感覺心適 tsiah-ē hōo 人想 bueh kā 伊柴樠點火較光油 ê 繼續 Aktualisierung 像重甲若貨車 ê 電腦，這久是袋褲袋猶有閬縫，抑無菜股較拚勢拍猶是比 buē 過若 ' 山瑞香 ' ê 好呷、母湯。」
以前搪著遮 ê 字我 kā 𪜶當做火星文，這久 kā 𪜶準做華文 tuì 台文罩一層霧 ê 浪漫天真，像德文 ê der Arm, der Ball ê der 是臺灣人 tuì「的」想像，交自囡仔時讀外電報導 m̄ 是 CNN 就是 CNN ê 宛然教典 tuì「拑牢牢」ê 造句「這个囡仔真驚生份，出外攏 kā 𪜶老母拑牢牢」，所致公視台語台使用「阿嬤」抑是「阿媽」buē 造成我 ê 困擾，起因字幕分拆明明。
公視台語台 ê「阿嬤」佮「阿媽」合該是看 Day Day台𫝻留話讀著 ê 討論，Day Day 台回應「阿嬤」交「阿媽」hōo 我想著法國人面對面冊 kā「Bitsch」當做「Bitch」ê 態度閣踅翻頭轉來愖 Arm, Art, Ball, Gift, Bank, Butter, Bus, Cent, Dick, Finger, Man, Nest 等等敢齊是英語交 kan-ta 英語一款講法交解釋？
這个問題宛然英國人看目今已經改名做 Fugging 付金➁ ê 田庄相𫝛，你 ê 語言 m̄ 是我 ê 語言，你 ê m̄ 捌字看告示 m̄ 是我 ê 責任。
《台語現代散文選》收錄戰前到戰後 ê 文章，kā 這篇讀《我咧唱歌》ê 感受徙來《台語現代散文選》無豬母牽去牛墟 ê 王秀蓉老師 ê《我咧唱歌》ê〈0 歲重出世〉佮〈1 歲奶母車內 ê 天使〉齊收錄 tī 這本散文選 hōo 我想著初初接觸台語，因為文字無統一險 bueh 駐水，感謝王秀蓉老師、洪淑昭老師佮李恆德老師 ê 書趁流水出現 hōo 我按台文作者蓋成 Hildegard von bingen 沓沓仔行向呂美親老師 tī 編者導言提著 ê Martin Luther tuì 歐洲文字帶來 ê 改革 hōo 我有機會改革家己 ê 貧惰重受教育並認捌新事物。
台語現代散文選 mā 有收錄李恆德老師《彼年的熱天》、廖玉蕙老師《彼年春天》、劉靜娟老師《驚驚袂著等》、王昭華老師《我隨意，你盡量》hām 林美麗老師 2022 台灣文學獎創作類台語散文獎得獎作品。
我 ê 台語閱讀無遮 ê 作者 ê 文言一致交文字相𫝛，現此時 ê 我 tuì 台語讀本絕對揣無一絲仔興趣。畢竟，我無興讀文臆字閣揣無字通解釋我 è 青盲。
➀ 德國貓仔飼料 ê 廣告辭
➁ Fugging 徛位 tī 奧地利，1070 建庄，田庄名號跟綴領主變化，19 世紀以 Fuking 記錄 tī 領主地圖，押尾改寫做 Fucking，2021 改名做 Fugging。Fugging 尾音 ê ing 交英語 ê Ing 無任何親情關係。Ing 是德國 Bayern 拜仁州當地語言 tuì 田庄名 ê 稱呼。像我蹛 ê 州慣勢 tī 尾句加一个若「nóo」ê 音。通用德語講 Ein schön tag，gún 遮 ê 人 ē 加這个 tī 通用德語聽起來若 Noch ê「nóo」。遮使用 ê「nóo」是順我家己 ê 音感做標頭，「付金」是筆者順伊 ê 發音交當地居民 tuì 舊名 ê 愛交慼所對譯 ê 台語名。
