春雺曝死鬼，夏雺做大水。倚位東海北極箍仔 ê 瑞典熱人一日變化 tuì 我來講就 tshan-tshiūnn 先人 ê 智慧 mā 真符合我現此時 ê 心情，一時足想 bueh 寫部落格一時閣足慼寫部落格 ê 齷齪，總是遮 ê 齷齪永遠比 buē 過放家己自由較好過日子。
瑞典佮挪威仝款 m̄ 是逐搭露營地攏有網路，所致準做我張使性地 mā 是無較縒 ê 起性搦地。
瑞典 ê 熱人短甲 tshan-tshiūnn 人 ê 青春遐爾仔短，瑞典露營區 ê 網路 mā m̄ 是逐个攏緊甲若高鐵仝款，這久徛位倚 Göteborg 等待雺開來曝死鬼搪著這逝跤花網路緊甲若美洲豹 ê 露營區，我煞無心緒想 bueh tī 遮栽新欉 mā 無想 bueh kā 紮來 ê 冊讀 hōo 煞，起因我無想 bueh「夯枷」。是「夯枷」，渡假 ê 日子正經 m̄ 通讀寡 hōo 家己心情沈重 ê 冊 mā m̄ 通逼家己閒人 m̄ 做，牽豬哥漩𨑨迌。
我真佮意杜信龍先生 tī 台文博覽會 ê 成做一 ê 母語作家是(人生)上大 ê 投資演講，總是自第一篇推薦序到杜信龍先生 ê 自序我規仙人感覺肩胛硩石頭，本底齊是活水 ê 心臟隨貯死窟仔水 ê 無想 bueh 繼續讀落去。
是講甘耀明《成為真正的人》mā 仝款，總是我猶有法度 kā 倚 bueh 150 頁 ê 故事讀 hōo 煞，這敢 buē 傷過大細仙？
我個人是感覺 buē，起因我本底就知影甘耀明先生 ê 筆法佮伊認定 ê 文學美感，所致我 tuì 伊寫 ê 故事有共鳴，不過我 tuì 伊按怎 kā 別人 ê 文化轉做家己 ê 美感無共鳴，應當按呢講我並 buē 要意伊凡事 kan-ta 一个美感。按呢寫真失禮，不過甘耀明先生 tī 這本冊內底 mā 有寫著這段。
文字是一个記錄，語言是一个人 ê 水源頭，有 ê 人佮意永遠取水頭水，有 ê 人佮意綴風象徛 Passau 取 Donau, Inn, llz 結做伙 ê 水，這無一个 m̄ 著，總是當遮 ê 白汫無素 ê 水因為人 ê 無聊，開始比較我 ê 水頭較甜較好啉，這正經蓋無意思，起因每一个水頭有伊順自然生成 ê 特別。
我 tuì 語言復振無想法 mā 無興評論別人 ê「文明」，總是我認同進前猶有法度以無面冊口座踅「順聰款」補家己不足 ê 台語文冊單資訊讀著 ê 一段話，大約仔意思是「以語言做民族復振彼是一件危險 ê 代誌」。
咱攏有家己話，總是咱人類 ê 社會已經 m̄ 是社 ê 發展，咱攏需要一个相仝 ê 語言來佮 tsham 咱無仝話 ê 人交流，總是這久 ê 咱八字較無好，像德文俗語講 ê 滒著打馬膠(Pech gehabt)搪著 tsuē-tsuē 人猶原愛德國納粹 ê 癖，咱家己就愛較有智慧 m̄ 通行入𪜶做 ê 人囮 hōo 咱家己看起來 mā 足顧人怨 ê 想 bueh Abstand halten 甚至無想 bueh 佮咱交結。
烏鴉有 42 種，我認捌 ê 烏鴉 kan-ta 一款就是規身軀烏趖趖 ê 彼款，人行到瑞典 tsiah 斟酌著烏鴉 m̄ 是「天下烏鴉一般黑」是猶有頭烏身軀塗色抑是鳥鼠仔色 ê 雺霧烏鴉(Nebelkrähe)這款色緻 ê 烏鴉 m̄ 是 m̄ 捌見過，總是我 ê 珠仔豆愛等到這回 tsiah 斟酌著伊，伊 mā 是烏鴉。
天下 ê 烏鴉正經 m̄ 是齊烏，至少這幾日一直偷提 gún 藏 ê 糞埽袋仔 ê 烏鴉就 m̄ 是規軀齊穿烏衫 ê 雺霧烏鴉。
杜信龍先生 ê《放毒》真正好讀，雖罔我 tsiah 讀無幾頁，總是我清楚知影伊無適合人 teh 渡假 ê 我像這時 ê 無四序，露營區佮咱八字 buē 合，咱徙位就好免了時間討論「呔討有這款服務態度」來積鬱，是講無定著人主人家無差 gún 翁仔某姐這筆錢所以步頻藏鏡人 ê 規定一大堆。
不過猶是愛說明，一路上北落南搪著 ê 瑞典人 hōo 人感覺有距離 m̄-koh 愛講𪜶真正好鬥陣(gún 翁 mā 有仝款 ê 感受)，露營區 mā hōo 我自在甲免孤鳥插人群。
這久 uī-tio̍h Göteborg 猶 teh 雨來天 tsiah 停跤 ê 露營區以這句台灣俗諺語來形容是乞食攑蠓捽仔：假仙(扮)，環境妝挺甲若瑞典窮真非瑞典，一个人 ê 底蒂正經無法度迵過頓粉點胭脂來改變，除非你真正接受這个 tsham 你相踏黜 ê 底蒂，像 Kevin 按呢。
寫著勍(khiang)仔，我想著德國有一句話形容客鳥 --- Diebische Elster(上扭掠 ê 勍仔)
記錄著面冊想著面冊又閣用彼步，捎 What's App 來威脅歐盟公民愛 tī 面冊開一个口座 tsiah 會使得使用 What's App ê 故事，自 2021.08 面冊口座刣掉到今，我 m̄ 捌數念過面冊，準做這久猶有 teh 踅面冊 mā kan-ta 順聰款一个，踅順聰款 ê 目的 mā kan-ta uī-tio̍h 得著較新 ê 台語文出版版，賰 ê 是草花 buē hőng 大箍(Das macht den Kohl nicht fett) ê 無要意。
近來面冊通知我 bueh 踅順聰款就愛申請一个口座，我是小小 ê 地球公民，我知影面冊聽 buē 著我 ê 聲音 --- 無你我無差，總是我清楚知影無面冊通讀，我 ê 四常猶原照常發揮 m̄ 捌走精 ê 快樂自在。
這本冊按台灣坐飛行機到德國，按德國坐車一路上北丹麥、瑞典、挪威、瑞典、德國、波蘭、德國、捷克、德國一直維持放毒 P.24 無閣增加任何一頁 ê 起因，無任何特殊 kan-ta 我個人是意愛社會事，社會人處理，意思就是彼个年間 ê 故事 hōo 彼个年間 ê 人講 hōo 咱聽，咱這輩 ê 人記錄咱這輩 ê 故事 hōo 後輩人聽，像鄉史補記作者陳雷先生 tī 台文 Expo ê 分張。
按呢寫 mā 誠無公正，起因作者並無鵝筆生花 kā 伊 m̄ 捌搪過 ê 人生階段轉做家己 ê 故事，總是順故事附帶 ê 跤跡我想著《翻身‧番身》劉承賢先生 ê 踏頭話「kám毋免寫 hōo 評審佮意」，台語按風 ê 話行入 Nachtzug nach Lissabon ê 文字鍊金師年閣，咱 tī 上好 ê 年代敢若較行 buē 出拍鳥帽 ê 迷思，像《iPad kap 杯仔》詩人、前台灣南社社長寫 ê 這段話「陷入語言 ê 牢籠...➀」hōo 我 tuì 台文界 ê Pardo 出現交想 bueh 跳橋自殺 ê 神秘女子相𫝛，失望。起因作者詩寫香港 ê 詩 hōo 我提來對抗無智識 ê 人 uī-tio̍h 展現伊 ê 優越講「亞洲人 ê 時行有夠好笑，竟然全條路攏攑雨傘，像香港。」
陳雷 alias 吳景裕醫師 tī 台文 Expo 分張伊 ê 作品讀起來沈重，因為彼是伊 ê 年閣，放毒作者交陳雷先生年歲無相𫝛，翻草歷史書寫歷史是向大眾講出重要、必要交點出社會重要 ê 問題無 m̄ 著，總是當一个文類敢若永遠停跤 tī 拍鳥帽 ê Cipher 世界，已經插管 ê 文化是 bueh 按怎繼續向前行？
雙生仔 ê 賽瓦 uī-tio̍h 愛揣著家己自由意識 ê 進步，沓沓仔成做獨立 ê 形影，台語文經過十外冬 ê 時間流轉書寫重點猶原敢若停跤 tī 詩，按這幾冬 ê 文學獎 ê 小說、散文、詩沓沓仔減少到賰詩來看確實是死水 m̄ 是活水。坊間有才調揣著 ê 台語文作品 mā 是如此 hōo 我失去成做 Raimund Gregorius uī-tio̍h Pardo 奔向里斯本。
我 tuì 台語文出版現狀無一个了解，總是按這幾冬 ê 閱讀慣勢來看，我確實發覺家己 ê 台語文閱讀之路愈來愈狹。起因我 buē 閣撏錢支持詩本，無後嗣 ê 我 mā buē 閱讀囡仔繪本，台華雙食 90% 華文 10% 台語文 ê 有標準化用字 ê 類頂世紀鄉土文學 ê 作品 mā buē 引起我 ê 興趣，如作者這類 ê 翻草 mā hōo 我讀甲若白滾水。《青瓦厝 ê 安妮》有才調 kā 重視 Orange and Apple ê 年閣敆做伙 hōo 伊行入 21 世紀 hōo 收看者思考向時交目今，捌發生 tī 這地土地 ê 故事呔討 kan-na 會使得踅玲瑯 m̄ 是白就是烏？
這 m̄ 是一本適合紮出門那行跤花那閱讀 ê 讀本，不而過 tī-leh 等待新船幫 ê 時陣，交北海相對看 ê 維京教堂是敨放齷齪 ê 好對象，準做我是世俗人。
停跤 tī Solvorn 作穡人兜露營區等待船幫過北海探訪枋仔教堂 ê 閬站，我想悲傷 ê Hamlet 伴我規个 Helsingør 行跤花，我 ê 情緒猶原活跳跳無行入烏空，按呢停跤 ê 24 頁合該然有才調繼續向行前。冊提出來接紲讀無幾句就攑白旗放棄，請翁 kā 我翕一張屬於我個人幻想 ê 網衝美相。
這本小說如頂懸所寫，伊是一本無過 tsuē sí-ah-geh 抑是重頂世紀語法 ê 好讀小說讀本，總是順作者 ê 年歲來節指，伊 ê 向歷史致意 buē 引𤆬我行入《一桶蚵仔》、《阿春無罪》遮 ê 相𫝛是紮出門露營車日子 ê 小說，伊顛倒有一種像順聰款所分張 ê 意識，以「語言做民族復振彼是一件危險 ê 代誌」，不而過成做半个芋仔交半个番薯，目今又閣交一屑仔攏無按羅馬來 m̄ 閣講𪜶是神聖羅馬 ê 子民交往，伊 hōo 我感受向時呔討 tuì 政治無要意 ê 因端。芋仔爸因為歷史背景有伊 ê 信仰，我因為環境有家己 ê 認同，不而過彼个認同猶原分「外來」交「自來」ê 烏白 hōo 我深深感受排「外」，像 2022 出門行跤花進前參加語文活動，因為一世界齊羅馬字 hōo 我意愛台羅濫寫，彼个團體隨 kā 我 ê 分張提掉，規个團體獨獨我 ê 分張 hőng 提掉，免跤頭趺想 mā 知影彼交我無徛孤爿有相干。
我是世俗人，不而過作者刊登 tī 台灣教會公報 ê 作品我齊詳細閱讀，所致當我發現台文 Expo 有作者 ê 演講，隨準時參加上線聽演講，聽煞幸福滿滿，充滿元氣。閱讀這本小說卻滿滿講 buē 出喙 ê Was ist denn los，就此停跤到轉來到德國，先反頁改讀總算正式出版 ê《都柏林人》中間 uī-tio̍h 整理肉跤閱讀心行尞想著《翻身．番身》ê 踏頭話我 tsiah 翻頭自頭無紮一絲仔情緒讀到尾，紲落來上有記持 ê 文句 mā 交《翻身．番身》ê 踏頭話無宛 2 體：
落尾，伊一肢手 thuh 下手，另外一肢手中 chaiⁿ kā 目鏡 thuh hō͘ 正，用一種真經濟學者 ê khùi 口講：「評審 kám ē 是 A-hun？」
我雄雄驚一 tiô，A-lâm 應該 ài 來寫小說。
呔討 tuì 遮 ê 話遮爾仔有印象，凡勢交個人投稿經驗交參加團體有相關。這款現象 m̄ 是 kan-ta 出現 tī 台語文文化，是四界齊有。
提著權利 ê 人抑是拄好抾著權利 ê 人，準做西瓜已經夠大爿，𪜶猶是追求閣較大爿 ê 西瓜，這是動物自然 ê 行為無啥特別，只不過成為食物鏈上頂懸 ê 人類有一个強項彼就是思考 hōo 家己成做完整 ê 家己。
德國演員兼練喙花表演者 Hape Kerkeling tī 伊 ê 聖地牙哥朝聖之路有一段話「我 ê 阿媽Bertha一直攏知影這件代誌，Lán若是無注意，有一日咱 ê Hans Peter ē hōo走無去。」我相信作者 tuì 母語是這款心情，只不過伊 mā 宛然 Hape ê 告白伊愛考慮「我的女性朋友 Isabel 下一个簡單概論：曷無，你這馬是佗一條神經去 hōo 燒—去!」行出舒步箍仔成做非我族類 ê 人。
我無愛外甥仔點燈火，一切照舊，總是一搪著「閱讀」這回事我愛田螺循舊逝，較行 mā 仝逝 ê 熥清飯，這 m̄ 是讀冊心得 mā m̄ 是冊評，這是一篇屬於我個人 ê 閱讀花眉心行尞。
➀ 筆者 kan-ta 取家己想 bueh 表達 ê 語句，無表示伊是文章全樣。
