阮的祖先誠早就自福建來台灣。我的大漢小弟，因為伊的厝內有代誌，捌去申請所有的祖先的戶口資料，一直到日本時代開始統治的時，閣較進前的就無資料，只有墓仔、墓牌、神主牌仔頂懸的名。
核四廠咧整地的時，祖先的墓仔攏挖挖起來，三叔趁這个機會做一个家族墓，培墓的時毋免走幾若位。
阿媽生４个查埔，４个查某，我老爸是第２个後生，小學畢業了後，上船，伊會暈船，規路攏咧睏，無法度做掠魚的工課，佇庄仔內趖來趖去。有人共伊講警察學校咧招考，伊去報名，考牢，去讀。畢業了後，分發去宜蘭縣。彼當陣仔是日本時代。
有一年，厝內欲釘新船仔，逐家四界借錢，阿公有來共阮老母提結婚的時的金仔，講後擺換較大跤的轉來，算投資的本錢。
新船落水無偌久，拄著風颱，船上的人攏無去。三叔醒來的時，是全身予魚網仔纏著，倒佇海埔仔頂。干焦三叔一个人活轉來。
厝內面請人沬水揣屍體，毋知揣幾工？揣著了後，半暝隨出山。以早聽阮老母咧講的時，無想著問伊是啥物時陣的代誌？我出生無？我幾歲？船頂猶有別人無？
厝內拄著這款代誌，一定挐絞絞（jû-ká-ká—形容很亂），新船沒去，欠的錢猶未還完，２个後生過身，大伯有一个後生誠細漢，屘叔才十幾歲。阿公無佇船頂，敢若大伯娶某了後，就予大伯大姆扞家。
三叔擋半年的時間無落船，到處去看有啥物頭路通做？落尾嘛是閣出海，一世人的工夫攏咧海頂。
當初釘新船借的錢，攏無借據，大伯佮大姆借的，攏是大姆喙講的，這个欠偌濟，共彼个人借偌濟，毋知是真的，抑是假的？遐的借的錢，幾若年了後，三叔一个人還了。我的老爸是公務員，薪水足少，有５个囡仔，無法度鬥還。
我寫到澳底的時，才想著，外公早期蹛的雙溪、九份，佮我老爸的老家澳底，離無偌遠，毋過彼是這馬的交通離無偌遠，以早交通無方便，是離誠遠。我的老爸佮老母離開in的故鄉，去到宜蘭，有人介紹，２个人結婚。
可能有人講，講遮的代誌欲創啥？彼是阮兜頂勻的生活，既然寫落來，貼出來予想欲看的人看覓一下，嘛是地方的歷史跤跡（kha-jiah/kha-liah）、往過人的生活，有in的過法，才有這馬的咱。
我搬來瑞芳進前，沒想著我會想著遮的代誌，去九份的時，外公的代誌自然浮起來我的頭殼內底，就共寫落來，紀念一下。我的老母佮老爸、三叔已經攏過身，無清楚的部份無人通問。
抑有，咧寫遮的過去的代誌的時，我的心情有受著影響，情緒有一點仔無好。
（2025.10.22.）
查教育部台語辭典
