台語文學
有鴨母陣的運搬，挩窗和哈囉來到民雄鬼仔厝。
庭院深深，軁過大門，內底是暗毿的奇草怪樹；掠過鼓井，長頭毛的查某鬼共指甲伸長又勼轉去；上內面，就是三樓懸疊紅磚仔、牽番仔花草的大富戶。
神人無咧驚，趖入去鬼仔厝，干焦賰一葩火⋯⋯
挩窗的尻脊骿後壁，浮一塊烏影蓋大領，斡頭去看，驚甲共目睭掩起來⋯⋯
「無啥啦！密婆仔假做大魔鬼啦！」哈囉講。
挩窗目睭擘開，看著眼前有一粒黑點仔囝。挩窗無挩窗，目睭有影好，拍生驚啦！黑點仔囝是密婆爾爾，跤去鬥跤，頂下對對，若倒照影。後壁面是三个圓弓門，密婆停佇咧在門額正中央，咬一張符仔，頂頭寫︰非騎虎王爺廟入口。
「密婆是雙福山來的，名叫『雙福婆』，是阮神明過年過節取樂的𨑨迌物仔。𪜶有兩種，一種干焦會曉講實話，一種干焦會曉講白賊。阮會凊彩掠一隻來激頭殼，雙福婆干焦會曉應「是」佮「非」，而且會當會當、彼咧彼咧一擺爾爾⋯⋯」哈囉話到喙口隨收倒轉去，若親像有「字」袂講得。
「按呢喔，彼咧咱就來⋯⋯」挩窗當欲講。
「袂當講彼个『字』！」哈囉雄雄插喙。
