《大士爺厚火氣》第十三集：批信

服務台連紲放送三、四擺，寶釵阿媽等規晡，等甲晡攏軟去矣，猶原無挩窗的消息。

電風寬寬仔踅頭，向坐佇咧藤椅的阿媽，共日子紙的角吹起來。熱心的服務人員毋但奉茶，閣共阿媽掠龍予伊較輕鬆咧，問講：「若無，咱來報警察？」

寶釵阿媽隨徛起來，應講：「這个猴死囡仔佇田庄定定旋出去，褪赤跤一八溜溜去，欲倚暗才轉來！小等一下，我閣來揣看覓，就毋信揣無！」

袂輸鵝母行路，阿媽的尻川斗重橫橫，跤步徙一下徙一下，軁過廟門，來到簾簷跤，暗頭仔的民雄，夕陽是去予抐甲散糊糊的鵝卵仁，紅霞滿天。

挩窗看著的，是仝一片天，鬼王傷囂俳，打貓規个天頂去予燒甲紅絳絳。挩窗越頭，看著開漳聖王插胳，開台尊王攬胸，哈囉䖙踮塗跤，用後跤爪共毛捋捋咧，無攬無拈。

「後一關，咱愛去問大眾爺，仝款有鬼王佇咧釘。調虎離山的計智袂當閣用，放送驚會漏洩天機，咱閣有啥物法度？」挩窗真無奈。

「你毋是勇敢掛智慧的挩窗小英雄！怎會變無步！」哈囉共刮。

「啊！我想著阿媽啊啦⋯⋯」挩窗講。

「honnh！你會驚啊乎！想欲旋無想欲破關是無？」哈囉講。

「無啦！我閣想著阿媽講過的話，伊講：『跤手毋免濟，合用才是款。』這馬，咱該來揣家私。」挩窗講。

就佇這个時陣，一條清涼的風颺過，彼是拄才仔觀音現身的時陣走出來摸飛的，號做：「摸飛一條風」。關佇普陀巖內底傷無聊，摸飛一條風走出來踅踅咧，踅過服務台，共日子的紙角仔掀起來，挩窗眼著白白無印字的紙後壁面。

「著啦！咱來寫批！」挩窗隨講隨去共一張日子紙裂落來，講：「七月二三日就欲過矣，強欲無時間啊！來！咱來寫批請問大眾爺，佇遮借問⋯⋯借問諸神尊有誰會曉寫字的？」挩窗問。