《大士爺厚火氣》第十二集：出磺

「這小說寫甲真䆀，怎有古講甲遮爾彎彎斡斡的？」哈囉的尾溜掜起來，共臭火焦的尾仔尾吹吹咧。

「你是咧講鄭順聰寫的《大士爺厚火氣》是漚貨？」挩窗問。

「敢閣有別本？全天下用台文寫台灣神明捙跋反的，除了許丙丁的《小封神》，一百年瞪無屎。台灣人真頇顢，攏去看彼个希臘、羅馬、北歐、日本、米國的神話，毋知影家己的神明故事是世界精彩。讀嘛毋知讀，寫都袂曉寫，去予外口的騙甲戇戇踅，毋知影厝內的才是寶。家己的信仰、語言參故事廢墜去，悲哀啊！」哈囉共尾溜圇直，拍一个哈唏。

「敢會？鄭順聰寫我挩窗來打貓弄險的囡仔古，劇情奇幻，親像拍電動過了一關再一關，不止仔刺激⋯⋯到今我是真滿意！」挩窗頕頭。

「tshé！悾歁！騙彼三歲囡仔！你看，故事到今寫甲遐蹊蹺，無法度收煞矣！無，你問城隍爺？」哈囉頭撇對爿仔去。

「虎爺按呢講，我來共想斟酌，這个故事有影是歹扭搦。」城隍那捻喙鬚那幌頭。

「你看！毋但是我，城隍嘛按呢想！」哈囉後跤攑起來，共虎毛捋捋咧。