《大士爺厚火氣》第四集：打貓

青面的手骨夯起來，手模架佇咧頭殼額，一對目睭溜溜鬚鬚，烏仁踅過來、踅過去，共挩窗相予明，講話神經啊神經：「無毋著，是囡仔兄」。挩窗順伊的手模看過去，哈囉面憂面結，坐踮石攄頭前的內埕，予一堆神明衫圍起來。

彼个青面的頭殼心噗兩尖，一對獠牙勾落來，踅身大伐行，換紅面的來。仝款是衫幔咧，胸坎落落掛排骨，頭噗孤尖，撩牙勾倒起來，耳葉仔對挩窗，指指比出去，聽著聲音滴滴嘟嘟……。

「派你去人世是欲揣勇伯仔，怎會遛一个囡仔疕來？想當初孤來台，𤆬領的勇將兵卒有兩萬五千人，共荷蘭來的紅毛的電甲金爍爍，才共大員攻落來……。」開台尊王鄭成功講。

「尊王所言甚是，聖王我彼時親征南蠻，中原來之兵將，個個驍勇善戰，將漢文與四書五經傳播南疆，漳地自此文明開化……。」開漳聖王陳元光講。

「上少你嘛揣一个科技捌真透的，無，你看鬼王進化甲遐頭前，頭殼精光的才有法度敨啦！」打貓城隍講。

「聽我共代誌講透流啦！我本底欲揣一个漢草勇的，斡頭想想咧，肉身按怎勇攏拚袂過法術。有一个掛目鏡的少年人巧上天，讀甲博士博，毋閣身體蓋荏，來神明界無死嘛賰半條命。討救兵袂當漏洩天機，央大人恐驚騙袂過手，囡仔較好參詳啦！而且，這馬的囡仔台語不答不七，這个聲頭結、聰實、毋驚雲霄飛車，叫挩窗的……。」哈囉講。

「挩窗的？你揣一个雞仔目的？」打貓土地公問。

「毋是啦！伊姓李，名明窗，逐家攏叫伊『挩窗的』啦！」哈囉講。

「照講是落大人才著啊？鬼王遐惡，叫囡仔來是欲送死啊！」打貓土地公講。