《大士爺厚火氣》 第一集：蠟條

台語文學

挩窗抾著一粒來貼（lighter）。  

伊用大頭拇去掰火刀，圓輾輾、粗耙耙，紲咧共戛落去，浮出火舌一條，袂輸豆菜。

挩窗笑矣，悾歁笑，感覺蓋好耍！

伊閣戛一改，共火舌看斟酌，外箍黃錦錦，心是紺色的，彼種紺，比透早日頭猶覕佇山後壁面的彼款紺，閣較神祕。

火點傷久，火刀燒燙燙，挩窗去予焐著，hiù掉。

隨跍佇咧塗跤揣，伊共來貼抾起來，加發現一支蠟條，順手去拈。

蠟條的坱埃勻仔掰，挩窗勻仔想講：頂改風颱暝，放a-put-li入厝內閃風避雨，耍甲當歡喜的時陣，「擗」一聲，失電矣！阿媽跤手真扭掠，隨共蠟條點著。彼暗，挩窗記甲明明明，雖罔外口的風咻咻叫，雖罔暗頓干焦清糜配罐頭，阿媽的面水是遐爾啊慈祥——想起細漢做新婦仔的悲傷往事，目屎㴙㴙滴，蠟條綴咧四淋垂，這間破漚的低厝仔，罕得有溫柔的光照過來。

佇外口烏白吠的a-put-li，是in飼的台灣犬，忠閣伶俐。

踅神倒轉來，挩窗頭幌幌咧。這改，伊共蠟條點予著，提橫橫，予油一點一點滴落飯桌仔，隨後，共蠟條的尻川黏起去，祀甲穩觸觸。

挩窗笑矣！笑甲離獅獅！伊發現，蠟條的火佮來貼類似，攏是長株形，黃箍、紺心，干焦加一條烏焦的線。　　

會記得老師講過，蠟條的芯是用綿紗絞的，油是恬恬仔欶，火就勻勻仔燒。

目睭微微，挩窗想欲共油行佇蠟條芯的彼款無閒看現現。

無！無！伊啥物攏無看著，挩窗認真共繩——喔？火舌爍一下，燒一个破空出來，愈來愈大空，展開一幅曠闊的景緻，有懸山，有大海，有繁華的都市。