更新於 2021/03/12發佈於 2021/03/12閱讀時間約 10 分鐘

當首爾仍是叫漢城的那些年（陸拾伍）

你的名字我的姓氏

我個姐姐終於嫁咗喇。

雖然佢哋兩個為咗慳錢買樓，冇去蜜月；但係嫁咗就係嫁咗，我哋唔使再個個 weekend 煩佢哋結婚嘅嘢；一對小書僮終於可以唞吓。

我一直以為，喺美恩同 Ricky 嘅婚禮之後，我同 Chloe 就可以放低呢幾個月所有有關「結婚」嘅嘢，好好休息一吓。九月初，漢城開始轉涼，又係我哋開始郊遊四圍去嘅日子。

但係，喺美恩婚禮嘅尾聲部份，我的起心肝向 Chloe 求婚，而個傻妹又應承嫁俾我；咁成件事又唔同晒喇。

即係點？

即係我同 Chloe 仲有排要圍住「結婚」呢個 topic 𠱁𠱁轉。

點都好，我結婚喇！

同日晚上，老地方。

兩個仍然係著住「大袍大甲」嘅人，拎住兩大袋外賣同酒，上老地方開餐兼「講數」。

講咩數？Chloe 話要傾吓個婚禮喎……

「蠢蛋男便（남편 / Nampyeon）……蠢蛋夫君（부군 / Bugoon）……蠢蛋老公（여보 / Yeobo / honey；呢句係俗語）……蠢蛋老公（廣東話）……」其實佢喺我求婚後五分鐘已經開始改口叫老公。「都係香港話順口啲，嘻嘻！」

「蠢蛋老婆（아내 / Anae）；」我答佢。「其實我哋仲未結婚㗎，同埋嗰啲叫廣東話，唔係香港話。」

「我唔理喇，求咗婚當係㗎喇！」佢一邊將啲食嘢攤晒出嚟一邊講。「香港話又好廣東話都好，我都統一叫佢做『蠢蛋話』。」

蠢蛋話……八千幾萬廣東話母語人士應該憎死我。

「既然係咁，我哋唔使行婚禮啦！」我食住上。「求咗當結咗吖嘛！」

「你就想呀！百濟公主大婚，邊有得咁求其㗎！」佢停低手，望一望我。「不過咁，我覺得就算搵結婚會堂全套搞晒，都唔會好失禮嘅；唔好咁麻煩自己落手落腳搞囉。幫你慳返咁多功夫，呢個老婆係咪好抵娶呢？」

「阿超值老婆，」其實點為之抵娶，我真係冇乜概念。「你諗住幾時婚禮？喺邊個結婚會堂搞呢？之前我哋幫美恩做嘅 research，唔知有冇用呢？」

「明年三四月、復活節假期吖！半年時間，好充足準備㗎喇！地方呢，我比較鍾意上次喺瑞草洞睇過嗰間，」Chloe 好努力咁回憶緊。「同埋狎鷗亭嗰間，方便我屋企人嘛；清潭洞嗰間都 ok。」

「復活節假期都好，我啲朋友要飛過嚟都時間充裕啲。講開屋企人，」我知道呢一步點都要做。「咁我幾時見家長呀？」

「我媽媽你見咗冇廿次都十幾次啦！」佢繼續食嘢。「佢對你印象唔錯喎！至於我爸爸呢……佢係一個比較傳統同比較古板嘅人，不過佢都知我哋同居咁耐，應該冇乜大問題嘅；我諗住中秋嗰個 weekend 返屋企食飯嗰陣同佢講。」

「咁你爸爸媽媽呢？」佢停低手同食緊嘢嘅口，望住我。「佢哋覺得我點呀？」

「我阿媽錫你多過錫我啦！」我望一望佢，佢一派沾沾自喜嘅樣。「我爸爸呢……佢鍾唔鍾意都一個樣㗎啦！我話之佢！哈哈！」

「我諗到時雙方家長要見面嗰陣，飛佢哋過嚟就 ok。」我繼續講。「至於婚禮呢，我諗我會叫喺香港個老死阿 Matt 做伴郎。係喎，你諗住搵邊個做伴娘呀？」

「其實呢，我就有啲尷尬嘅，」Chloe 個樣突然嚴肅起嚟。「我好想搵 Colette 姐姐做伴娘㗎！但係我有少少擔心……」

「你擔心因為我同佢嘅關係，佢會覺得唔舒服？」其實我都諗到呢個問題。

Chloe 點一點頭，繼續講：「如果佢肯就最好啦；如果佢覺得尷尬或者唔舒服，我諗住搵 Cindy。」Cindy 係 Chloe 嘅十幾年同學，既係好姊妹、亦係 frenemy；佢哋兩個表面上好 friend，實則上總係有啲心結解唔開。

「Colette 嗰邊，你等我同佢講先，好唔好？」我提議。「我諗咁樣，佢會感覺好啲。」Chloe 點頭。

我應該點樣同 Colette 講呢？其實佢應該唔會有太大反應嘅。講到尾，佢都有份催我快啲同 Chloe 結婚嘅。我諗，我同 Chloe 之所以有呢個小小嘅顧慮，都係顧及佢嘅感受啫。

「蠢蛋老公呀，今晚我哋唔好坐咁耐，快啲食完返屋企喇；」佢突然間嗲聲嗲氣。「你仲要幫我除返套韓服㗎……嘻嘻！」

邊個話你聽女人唔咸濕㗎？

星期一，照常返工。

我同 Chloe 照常七點四十五分返到學校。上到樓出𨋢，行唔夠兩步，惠晶唔知喺邊度閃出嚟、拉住我、然後同 Chloe 講：「八婆你同我企喺度！」

Chloe 笑嘻嘻咁，喺惠晶指住嘅位置企咗喺度，然後故意向前再行多兩步。呢兩個女人呢年幾兩年以嚟嘅溝通方式都係咁；好鬼 cute。

「你真係要娶呢個女人？」惠晶問我。佢當日趕住去 wet 早走，錯過咗精彩嘅一幕。「又高又奀又傻吓傻吓，你諗清楚未㗎？」

「關你鬼事咩八妹！」我輕輕拍佢個頭，完成今日嘅 morning ritual。「我娶咋嘛，又唔係叫你娶！」

「都係啫，大韓民國大把女人，」佢繼續。「你真係要為呢碌竹，放棄成個森林？（轉頭望住 Chloe，提高聲線）金喜善有乜咁好喎？外面仲有好多全度妍、宋慧喬、白智榮、金南珠；你有好多選擇㗎！」

「阿閔課長（佢升咗職），你都係慳返啖氣、儲定錢做人情啦！」我冇佢咁好氣。

「執到啦你，咁都有人要！」惠晶行去 Chloe 面前，啤住佢同佢講。「不過就算佢肯娶你，你都仍然係咁乞我憎。」

「你都努力啲啦，惠晶妹妹；」Chloe 還口。「收吓把口、增吓高、得閒多啲化妝，或者都會有人肯娶你㗎！」

然後兩個女仔抱咗一抱；惠晶擺低句「慳啲啦八婆！」然後走咗入房開工。

呢兩個女人真係好妙。

因為求婚當日係 Ricky 同美恩嘅婚禮嘅關係，所以除咗早走嘅惠晶之外，上至我哋老校、下至惠晶條新𡃁「肥妹仔」都知道呢件事。消息亦都喺學校傳開，好多我哋有教嘅學生都紛紛恭喜我哋。

兩星期後，某日午飯時份。

「你個死仔包！你好嘢呀你！」電話另一端傳嚟 Colette 嘅聲音，扮緊惡；但係我仍然聽得出，佢唔係真係發緊爛。「同我拍拖六年唔見你求吓婚，識人兩年就趕住娶人！好趕時間呀你？你都對得我住呀你！」

「Dupuis 小姐，你柏金遜病發作呀？」鬥嘴嘅嘢，我從來都唔會讓佢；相識於微時嘅朋友大概都係咁。「聽聞我放晒水俾你、講到明返 DC 娶你、你都唔刮我，係都要分手喎！你家陣賴地硬呀？」

「係咩？有件咁事咩？」佢傻笑。「又好似係喎！我太多仔溝，無謂留你喺身邊篤眼篤鼻啦！哈哈！」

「係喇，巴 Q 閉喇！」我答佢。「你個好妹妹想搵你做伴娘呀！但係又驚傷害到你嘅弱小心靈，所以搵我同你講囉！你知啦，『愛人結婚了，新娘不是你』呢家嘢，好慘嘅！使唔使我半個鐘後再call你，等你喊完先再傾？」

「屌！慳啲啦，仆街！」佢終於講出佢嘅名句，算慢咗㗎喇。「同 Chloe 妹妹講，我聽日就入紙攞假！到時一定早啲嚟，幫你哋手！話時話，有冇嘢要我喺美國帶過嚟？」

「有，一對六吋高踭鞋；」我仍然未捨得收口。「費事人哋以為個伴娘唔夠秤；哈哈！」

「咁多人死又唔見你死喎！」佢還口。

「Hey Fillette，」我收起啲胡鬧，用比較認真嘅聲線同佢講。「真係唔介意？其實如果你唔想，我可以同佢解釋㗎喎！」

「傻啦！」佢答。「我哋又唔係呢兩日先分手，真係要介意的話，我上次就唔會嚟探你哋啦！我都有份 suggest 你娶佢㗎，你唔記得嗱？」

「記得，點會唔記得喎！」有啲說話，就算再過幾十年都仲記得。「我個ex叫我快啲娶我女朋友喎！唔記得阿媽姓乜，都記得呢件事啦！」

「點都好啦，恭喜你哋兩個呀！」佢提高聲線。「幫我同妹妹講，我一定會做佢嘅伴娘；到時仲會教佢，結咗婚之後，點樣收到你死死實實！」

唓！你慌佢唔識咩！可能叻過你𠻹呀鬼妹！

九月廿六，星期日，中秋假期最後一日。

話就話要準備結婚，有好多嘢要搞；話就話明年四月就係婚期，時間無多；但其實，我哋真係冇乜嘢搞。

因為我哋已經決定咗，婚禮喺結婚會堂舉行。唔好睇少呢個決定，呢一步，足足慳返我哋九成功夫！呢幾個月以嚟，為咗美恩同 Ricky 嘅婚禮頻頻撲撲，諗返起都發惡夢。而家到自己結婚，自己揸到主意，梗係多一事不如少一事。有人安排好晒、淨係著到靚一靚去食一餐、然後拍吓籮柚埋單走人，呢啲咪就係「夢幻婚禮」囉！

唯一真係要俾啲心機去揀嘅，就係影婚紗相呢 part 喇。

呢兩個星期，我同 Chloe 都去行咗幾間婚紗舖。漢城嘅婚紗舖其實都幾集中吓，大部份都係喺新村阿峴洞一帶嘅「婚紗街」，同埋東大門 Doota 嘅某一層，狎鷗亭都有啲。我哋行咗幾間，得到嘅結論係：

除非我哋諗住買婚紗，否則行一間同行十間都分別唔大；都係嗰啲款，大同小異；都係嗰啲套餐價，唔會貴得去邊，亦唔會平得去邊。

儘管我唔介意跌多少少錢，但 Chloe 唔贊成買婚紗，因為覺得冇用：「買套衫用嚟影幾張相，行禮又唔會著佢，好浪費啫！」

其實，有樣嘢佢係啱㗎，佢真係幾「抵娶」，唔會喺呢啲位亂發公主夢。

中秋節，係我哋慶祝認識兩週年嘅日子。我哋今年都冇離開漢城，都係出吓街、四圍行吓、食咗餐好嘢就算。一對情侶喺埋一齊嘅時間耐咗，好多時其實都寧願留喺屋企 hea 吓。

假期嘅最後一日，今晚 Chloe 會返屋企，同兩老食飯，順便公佈婚訊。

「啲飯喺個電飯煲度焗住，你食完就熄咗佢啦；」Chloe 分咐我；佢開始有個老婆款。「啲餸你翻一翻熱就食得㗎喇！自己乖乖哋食飯喇！」

「放心喎，」我答佢。「你老公唔會因為個老婆返外家食餐飯就餓死咗㗎！」

「好啦，咁我行喇，夜啲見！」Goodbye kiss 後，佢出咗門口。

食完飯後，我熄咗部電視、開咗個 hifi，喺廳聽歌；其實，我真係唔太喜歡睇電視。

一邊聽歌，一邊諗：世事嘅嘢，其實都幾奇妙。兩年幾前，我只不過抱住「玩玩吓」嘅心態過嚟韓國；完全冇諗過會做得啲乜嘢出樣，亦無諗過之後會點。一直都只不過係見步行步，冇好認真去舖排啲咩。

兩年幾嘅光陰，我唔止多咗個韓國女朋友，而家仲諗住喺呢度成家立室、落地生根。諗返成個過程，我好似冇做過啲乜，但又好似發生咗好多嘢，改變咗好多咁；呢種感覺，真係好奇妙。

諗返起我同 Chloe 呢兩年嘅點點滴滴，我知道，認識到佢、可以同佢一齊，其實我係個好幸福嘅人。

曾聽說過尋覓愛情就像天與地別離和重聚過程而我跟你平靜旅程並沒有驚心也沒動魄的情境只需要當天邊海角競賽追逐時可跟你安躺於家裡便覺最寫意只需要最迴腸蕩氣之時可用你的名字和我姓氏成就這故事從此以後無憂無求故事平淡但當中有你已經足夠

快樂童話像你我一對已經足夠

（待續）

分享至

成為作者繼續創作的動力吧！

《當首爾仍是叫漢城的那些年》

追蹤

當首爾仍是叫漢城的那些年（陸拾伍）

作者的相關文章

IF的沙龍的其他內容

你可能也想看

發表回應

當首爾仍是叫漢城的那些年（陸拾伍）

作者的相關文章

IF的沙龍 的其他內容

你可能也想看

發表回應

IF的沙龍的其他內容