《中環攻略》之三：第一章：銀行 ｜ 零售銀行：前舖 ｜ 分行

分行：個個都去過分行，唔通個個都知道分行做乜咩？

分行，係一般人對銀行嘅第一印象。以前銀行門口往往有幾級樓梯要你行上去，仲要避過把關嘅持槍保安凌厲嘅目光，先至入到去好多櫃位嘅大堂。分行職員大部份都穿著制服，男嘅打呔、女嘅戴條絲巾，個個數銀紙都係摩打手，鈔票翻起嘅聲音仲要鏗鏘嘹亮，自己返屋企攞啲利是錢出嚟想模仿都總係學唔職。