今仔日，看著一項傳統節慶用的麵食，毋過我拄開始叫袂出伊的名
拄看著的時陣，猶以為是做成愛心形的紅龜。毋過，厝內阿母講是隔壁阿叔的孫仔做四個月，所以做來送親成食的，和紅龜無仝。所以，我去問較資深的台語老師。老師講一个這馬較少人咧講的一句俗語：「滿月圓、四月桃、度晬食紅龜」滿月圓，閣號做「紅圓」，通常佇咧囡仔滿月的時，爸母序大會攢一寡油飯、紅蛋和滿月圓貺(hīng)予親成朋友。滿月圓代表圓滿，有的頂懸加一个圓點，親像母親的奶頭，嘛有向望阿母奶水飽滇，晟養囡仔好育飼的意思。
紅圓(滿月圓)
四月桃通常用秫米粉參麥芽糖水，捏(tēnn)做桃仔形。因為古早時陣，醫學、衛生攏無發達，拄出世的囡仔欲居會牢嘛無簡單，通常等甲四個月大，爸母才會放心來慶祝，向望囡仔順序大漢。
紅桃(四月桃)
和四月桃名稱較欲仝的，是壽桃。壽桃一般嘛較捷聽著，替老壽星、較濟歲的爸母序大慶祝生日的時，一定看會著壽桃，保庇序大人愈食愈康健，會行會跳若神仙。
壽桃，是咧慶祝長歲壽的爸母序大所用的
若是「紅龜」，愛等到囡仔出世滿一冬，做度晬的時，爸母才會攢紅龜。聽講因為龜攏用爬的，拄度晬的囡仔通常嘛攏猶咧爬。所以，攢紅龜一方面向望囡仔爬了順序莫跋倒；一方面龜的壽命較長，爸母嘛希望囡仔會當健康長歲壽。
紅龜(度晬龜)