原本禮拜一 ê meeting 調時間到今仔日（拜二，21 號），kan-nā 進行二十分鐘就結束啊。Ko-Hua老師講：「有進展就是一件真好 ê 代誌。」Thoân-Khái 老師講：「你這禮拜寫了 bōe-bái。」
我嘛感覺我自己有 ta̍uh-ta̍uh-á 咧進步，雖然擱有真長 ê 路愛行，不過至少有較 chhoē--tio̍h 向前邁進 ê tempo。
-
Pì-sù ê 我
佇人生滿 28 歲 ê 這ㄧ工，猶原感謝上主 ê 引導。真濟年前我曾為著避免信息爆量，會特別發一篇文來互大家聚集留話祝賀，但是我對兩年前就無想欲按呢做啊，因為這一工嘛是真平凡 ê 一工，無啥物特別。
識我 ê 親友就知，我其實袂講真愛彼種虛華 ê 慶祝活動。所以我真感謝佇這幾日用較「pì-sù」ê 方式為我祝福 ê 親友，恁有記得我 ê 個性 kap 生日，真正搭心。
-
Chhoē 回母語 ê 我
差不多每一冬寫生日 ê 文章攏會寫到隔工，今年嘛變做按呢啊，真害www。
其實我 ê 生日嘛拄好是聯合國所訂 ê 「世界母語日」，過去我攏會選一段台語 ê 聖經節來做結論，但是今年我決定直接用我 ê 母語—台灣台語來寫這篇文章。因為我向望我自己會當佇母語 ê 學習頂面擱較精進，這是我今年 ê 生日願望。
-
向前走 ê 我
我最近咧看一本真有意思 ê 冊，叫做《行路 ê 人》，是一位法國 ê 社會學者寫 ê ，我想欲引用其中一段文字並且翻譯做台語文來做為這篇文 ê 結束。
「行路，是生命中 ê 一條支線ê任務。透過 chit-ê 行動，咱會當將 nńg-chiánn--ê、佇懸崖邊仔 ê 自己拉倒轉來，並且 chhoē 回自身 kap 社會 ê 聯繫。對 hia--ê 因為受傷成做 nńg-chiánn--ê 少年世代來講，會當藉著按呢 ê 機會互自己有退一步 ê 空間去重新思考，是啥物塑造出自己 ê 行為？In ê 言語 kap 行動擱是安怎樣影響著別人？按呢 ê 結果嘛必須愛歸功互 hia--ê 佇路途中間陪伴 in 而且有擱較濟性命經歷 ê 人， chia--ê 抱著真濟人生課題 ê 前輩陪伴 in 毋是為著欲報復社會，乃是為著引 chhoā in 更加認識自己。」
David le Breton 著，粘耿嘉譯（Lîm Su-Hông 改譯台語），2022，《行走的人》。台北市：大田。頁186-187。
我感覺，自己 ê 人生嘛親像安呢，雖然擱算做少年，但是已經有經歷著濟濟代誌，嘛有真濟前輩 kap 同伴鬥陣作夥行，我為著 chia--ê 對上主獻上感恩。期待我自己嘛會當成做一位引 chhoā 人 ê 陪伴者，求上主賜我智慧 kap 氣力，向前來行。
-
圖｜這是今仔日暗時，我 kap 老母作夥去食古早麵 ê 時所翕 ê 滷味，這間麵攤仔對我讀高中食到 chit-má ，比起 kuì-sam-sam ê 高級料理，我抑是上愛這味。
