聽著這條做伙搖~嘿唷，少年家

建議愛掛耳機，自頭聽到尾~

草屯囝仔2024年上新的 Live Session 作品 《進香：The Pilgrimage Session》，你敢聽矣？作品內底有收過去三條歌，是全新搖滾編曲，予逐家有無仝款聽覺享受，一睏共聽到尾，有夠爽的！視覺影像閣配上金龍團、媽祖神轎、官將首、神將、小法團，展現台灣傳統文化價值和意義！看著小法團、法仔鼓佇內底的表演，實在感覺有夠Cool！

歌詞講的：「正港愈在地，人講 煞是愈國際！」。

我聽完，心內一句話：「飄撇，帥！」

佇廟會環境大漢的草屯囝仔，對廟會活動是真熱心參與，有親身參與，才會理解、才會感受，佇這个過程，草屯囝仔看著信眾跪佇媽祖面頭前，合掌誠心為破病的親人來祈求媽祖保庇，予 in 深深感受著信仰予人的一種安定感。

草屯囝仔一直以來結合宮廟元素和在地文化，來做台語音樂創作，向望會使共咱文化的媠，透過音樂分享予觀眾；透過影像，嘛想欲證明流行音樂佮傳統在地文化，會使有真好的結合，佇新的世代繼續傳湠落去！

咧做台語音樂的過程，草屯囝仔嘛家己學會曉寫台文，有法度共家己喙內的語言，用文字共寫落來，愈學愈發現台語的藝術！過去，草屯囝仔嘛有翕YT影片【文青8+9台語小教室】，那聽家己的歌，那掠蟲，那教觀眾寫台文呢~

✨ 《進香：The Pilgrimage Session》✨

各大數位音樂平台攏聽會著，YT嘛有台文CC字幕喔~

▍相片、影像提供：宇宙信號、草屯囝仔