飛機會飛出界嗎？廣東話兒童廣播劇

（本文以廣東話書寫，完整聲音版連結請見文末）

喺機艙上，全部乘客都上晒機，陸續扣好安全帶。當一位空姐行過 Mary 座位，就俾佢拉住咗。

Mary ：「空姐呀，飛機會唔會飛飛吓、飛出界㗎？同埋呀，聽人講雀仔飛入個引擎會墜機㗎喎？！仲有⋯⋯」

空姐 ：「小姐、小姐，你冷靜一啲先，嗱你扣返好安全帶，然後試吓深呼吸。」

當空姐正想鬆手，Mary 又拉實佢。

空姐 ：「係囉～再~ 深呼吸啦」

空姐面有難色，坐喺另一邊嘅Paul 細細聲問。

Paul ：「呃⋯ 請問咩事丫？ 有無嘢可以幫手？」

空姐 ：「咁嘅，呢位小姐第一次搭飛機比較緊張⋯⋯」

空姐細細聲喺Paul 耳邊講：「但係飛機就嚟要起飛喇，我要去做安全檢查喇」

Paul 見空姐甩唔到身，諗住幫一幫佢，就同Mary 講：「呢位小姐，我頭先聽到你問關於飛機嘅問題，其實我係小型飛機師嚟嘅，不如我試下解釋俾你聽？」

Mary ：「真㗎？好呀好呀！我隔離無人坐㗎，不如你過嚟坐丫！」

Mary即刻鬆開捉住空姐嘅手，拍拍佢隔離個位，邀請Paul 同佢一齊坐。

空姐襯Paul 調位時，帶住感激嘅眼神，細聲答謝 ：「唔該晒你丫先生！」

Paul 都未坐好，Mary 就忍唔住不停問：

「呀機師先生呀～即係呢，平時啲車喺陸地上會跟住馬路行，周圍又有好多路牌呀、交通燈指揮㗎嘛，但係喺個天上面無馬路、又無交通燈，咁咪好危險囉？！」

Mary 越諗越唔對路，恐懼隨住想像愈嚟愈大

Mary：「咁啲飛機咪會隨時飛出界⋯⋯然後「嘭」～～～～撞機囉！！」

Paul ：「嘩～ 你嘅想像力好豐富喎！其實揸飛機同揸車唔同，唔係想出發就即刻可以飛㗎。就好似我哋坐嘅民航飛機咁，通常都有兩至三位飛機師嘅，佢哋喺出發前要準備一份 Flight Plan 飛行計劃俾機場，簡單嚟講就好似巴士路線圖咁，飛機都有佢嘅路線圖。不過除咗起點同終點之外，機師仲會考慮埋天氣狀況啦、 飛機要飛幾高同幾快等等。」

Paul 指一指窗外，繼續耐心咁講：「啊，你望吓嗰邊！嗰個就係機場控制塔喇，經過機場控制塔確認咗，先可以正式起飛㗎。」

Paul 一邊講，一邊指住佢嘅前方唔同位置，就好似真係置身飛機控制艙咁：

「雖然天空上面無馬路同路牌，但係飛機上有衞星導航同雷達等等嘅儀器，幫助飛機定位之餘，仲幫手觀察附近嘅天空有無其他飛機，咁機師就可以跟住設計咗嘅路線，安全到達目的地。」

Mary ：「嘩！乜原來起飛前要做咁多準備功夫㗎⋯」

突然，機艙內嘅空氣好似凝固咗咁，仲傳嚟機器加速同壓縮咗嘅空氣聲音，Mary 發現原來飛機已經喺跑道上準備爬升！

Mary ： 「啊啊啊！！係咪要起飛喇？唔得呀、唔得呀，我未準備好呀～～～～～～唔得呀～我條耳仔又好唔舒服，又好似呼吸唔到咁呀」

Mary 嚇到面都青，佢不停抓住Paul 嘅手臂郁嚟郁去，好似想搵窿捐出去嘅小動物咁。Paul 都俾Mary 嘅反應嚇親﹐而且手臂有啲痛。

Paul ：「呃呃⋯⋯ 唔洗擔心，你保持深呼吸啦」

Mary 呼吸急促，睜大雙眼望實Paul，但又好似聽唔明Paul 講乜咁

Paul ：「嗱，一係咁樣，你學我擘大個口、打喊露咁（水

Mary聽指示，擘大個口：「啊～～～」

Paul 慢慢打咗個喊露，Mary 都跟住慢落嚟，打咗個長長嘅喊露。Paul 見呢個方法好似有效，就繼續。

Paul ：「嗱，嚟多次喎，啊～」

Mary 再一次打長長嘅喊露，聽起嚟好似放鬆咗好多，但之後都係喊晒口咁繼續追問 ： 「咁跟住呢？」

Paul ：「跟住呀？呃⋯啊！我諗到喇，唱歌啦！」

Mary 露出難以理解嘅表情，而Paul 無計可施，就隨口哼出「衝出雲霄」主題曲副歌，原歌詞係「天氣不似預期、但要走總要飛」。估唔到 Mary 都乖乖地跟住哼，慢慢，飛機引擎加速聲亦消失，Mary鬆咗一口氣。

Mary ： 「好彩架飛機終於穩定返咋。係喎，點解起飛嗰陣我隻耳仔會咁痛嘅？」

Paul 聽到關於飛機嘅問題，即刻醒神回應：

「哦，其實好多人都會咁㗎。因為飛機起飛個陣，機艙裏面同外面嘅氣壓發生變化，當氣壓變化太快，我哋嘅耳仔可能會適應唔切，所以就會覺得不舒服。

咦，你睇吓！出面啲雲好靚丫，不如你都試望出窗外面。」

Mary ： 「吓⋯⋯咁高望落去會唔會好得人驚㗎⋯我睇少少、少少㗎咋⋯⋯」

Mary 伸頭望向窗外，外面藍天白雲，好似另一個世界咁

Mary ：「嘩～！個天好藍，啲雲白雪雪一舊舊，好似綿花糖、又好似沖涼啲泡泡咁！我哋好似啲雀仔識得飛咁呀！雀仔⋯ 」

但佢突然又醒起一啲嘢⋯⋯

Mary ：「啊！我聽講雀仔飛入飛機引擎會搞到着火、墜機，弊喇弊喇～～～成個天空咁多雀仔，咁咪好危險囉！」

Paul ：「哦！咁又唔使擔心，我哋做咗好多措施去保護飛機同乘客嘅安全。喺機場有專業團隊負責驅趕雀仔，佢哋會用聲音同光線等等唔同方法嚟嚇走雀仔。另外，飛機大部份時間嘅飛行高度都喺 3萬至4萬呎，一般雀仔飛唔到呢個高度。你依家望出去見唔到雀仔㗎！」

Mary ：「 咦～又係喎⋯⋯唔好意思呀，我第一次搭飛機太緊張，一輪咀*講咁多嘢咁煩咗你咁耐添。啊，係喎，阿機師先生，你第一次搭飛機又係點㗎？」

Paul ： 「我第一次坐飛機呢⋯⋯係我十歲嗰年，我抽獎抽中咗電視台同航空公司搞嘅一個免費坐飛機活動，可以喺維港上空飛一個圈㗎。」

Mary ： 「我記得呀！空中暢遊丫嘛！想當年我都有寄信參加抽獎㗎，不過就抽唔中我囉，你咁好彩嘅！」

Paul ：「哈哈！我依家諗返起都覺得自己好好彩！嗰陣我同你一樣咁緊張，同時又好期待喎！我記得架飛機都未開始郁，我哋成班小朋友就已經 10、 9、 8、7 ，係咁不停倒數。當飛機開始爬升，見住地面嘅嘢變得愈嚟愈細，細到好似 Lego 咁。平時搭嘅大巴士變到好似螞蟻咁細粒，啲樹又變到好似牙籤咁，真係好神奇。」

Mary 初時都聽得好投入，但慢慢有啲跟唔上，眼皮愈嚟愈重。但Paul 愈講愈陶醉，幾乎都唔記得Mary 係喺佢隔離。

Paul ：「到咗我第一次揸飛機，坐喺駕駛艙度，望住前面塊大玻璃，感覺又好唔同㗎！」

Paul 興奮到好似一個小朋友，再次經歷第一次揸飛機嘅雀躍。

Paul ：「我控制住飛機一路飛上天，離開地面愈嚟愈遠，我好似真係識飛咁，我嗰陣呀⋯⋯」

Paul 擰轉頭想同Mary 講，但發現Mary 已經睇到打晒鼻鼾

Paul ：「咦？瞓着咗喇？好嘅，瞓得着即係唔再緊張喇。好好休息吓啦，好快飛機就會帶我哋安全到達目的地㗎喇！」

（特別鳴謝中學同學「皇帝叔叔」提供飛行知識和接受訪問）

一啖仔廣東話：

廣東話「一輪咀」係指講嘢好快，又冇停頓，令人聽唔清楚，亦都冇機會插咀。如果你發現自己「一輪咀」咁講咗好多嘢，不如試吓深呼吸，提醒自己講慢一啲，咁其他人聽你講嘢都會聽得舒服啲㗎！