關於日蝕和動物的祕密｜原創廣東話兒童故事
（影片或Podcast 連結，放在文章最底）
你哋知唔知道原來以前所有動物住得好近，全部都係鄰居嚟㗎。
之不過，有一日，一個鐘意環遊宇宙嘅外星人嚟到地球旅行，咁啱就遇上難得一見嘅天文現象--「日蝕」。
日蝕就係月球行到太陽同地球中間，月球影子照落地球上，我哋就會見到太陽嘅一部份或者成個太陽都俾月球遮住咗，四周圍都會變暗㗎。
當外星人嘅太空船準備降落個陣，大地就開始暗起嚟，動物們見到太陽突然變暗，又有不知名嘅大東西從天而降，全部都以為：
「世界末日喇！太陽使者收起陽光，要嚟到地上懲罰我哋啊。」
所以全部動物通通都嚇到雞飛狗走，周圍搵地方匿埋。只有烏龜行得太慢，仲留喺原地。
外星人行出太空船見到哩個地方有咁多植物、咁豐饒，不過只有烏龜一隻生物，就好好奇，行近去想同佢傾吓計喇。烏龜驚到震騰騰咁望轉頭，咁啱就係日全蝕「食晒」嘅時候，太陽俾月球完全遮住，周圍變到黑蚊蚊，烏龜嚇到亂咁講嘢喇：
「呀~~~ 我認錯喇! 係我唔啱! 我喺賽跑之前, 特登請兔仔食一個會令佢瞌眼瞓嘅紅蘿蔔蛋糕，所以佢先會瞓過龍，輸咗俾我咋！呀~~ 求吓你唔好罰我啊~~ 」
外星人覺得烏龜好奇怪，無理佢就走開咗喇。原來因為周圍黑蚊蚊，動物們以為自己已經匿得好好，但其實佢哋只係行遠咗兩步，外星人行行吓就俾動物 kick 親或者撞咗落佢哋到喇。
「哎呀」
一隻短腳動物說：「哇～哇～我唔想俾其他雀仔知道我唔識飛，對腳又短、行到輪輪盡盡咁，所以我先跳入水扮鵝⋯⋯」
澎！「啊！」
一隻愛跳舞的動物說：「哎！！！因為我次次去 Party 都會跳舞跳到忘晒形，一係唔記得帶個仔返屋企，一係就拎錯人哋個仔，所以我先整個育兒袋、袋住個仔四圍跳，仲同人講哩個係fashion 嚟㗎」
「哎呀」
龐然大物從水底冒出：「啊～我聽講海底泥可以令皮膚白𠽌𠽌滑捋捋，點知浸得太耐，浸到全身又巢又黑，我唔敢再上水喇」
外星人行咗一陣就已經搞到滿身傷痕，周圍又黑晒、影唔到相打卡，所以都係放棄決定返屋企喇。
動物們見四周圍有返光，而自己亦都安然無恙，本來就安樂返晒。不過⋯⋯原來大家嘅秘密都俾其他動物聽到晒喇！
短腳動物：「依家出街好似個個都望住我對腳咁」
愛跳舞動物：「我以後都唔敢再動物舞會喇」
水底龐然巨物：「我要避開嚟河邊飲水沖涼嘅其他動物呀」
佢哋覺得非常尷尬，所以就搬到愈嚟愈遠，直到分散到地球唔同角落喇。
考考你：你估唔估到頭先外星人撞過落啲咩動物度呢？
有一種鳥類有翼，但唔識飛，短腳行起上嚟輪輪盡盡，重會跳入水，話自己係鵝嘅係？
企鵝！
邊種動物好鐘意跳呀跳，仲會將自己嘅仔仔囡囡袋入個育兒袋㗎呢？
袋鼠！
係乜嘢動物體型龐大、成日浸水，眼細細、鼻細細，但個口好大呢？
河馬！
一啖仔廣東話
廣東話「瞓過龍（或「籠」）」係指瞓覺瞓得太耐，結果遲咗起身，錯過重要嘅事情。
除咗「瞓過龍」，仲有其他廣東話俗語會用「過龍」代表太多、超過原本需要嘅意思，例如「眼大睇過龍」就係指睇漏咗。如果唔想好似龜兔賽跑嘅兔仔咁瞓到過龍，就記得瞓覺前較定鬧鐘喇！
Apple Podcast👇🏻👇🏻
Spotify 👇🏻👇🏻
