（本文以廣東話書寫，完整聲音版連結請見文末）
背景傳來神秘的太空音樂⋯⋯
喺遙遠嘅太空，有一個嘰哩咕嚕星球，一直靠住由唔同星球搜集返嚟嘅特色語言作為能量。但係因為一場大災難，原本儲存嘅珍貴語言幾乎無晒。嘰哩咕嚕王子聽聞地球上有一種叫做廣東話嘅語言，能量十足! 為咗拯救自己嘅家鄉，王子決心前往地球學習廣東話！到底佢能唔能夠成功呢？佢去到地球又會係咩人教佢廣東話呢?
背景音樂漸弱，交替出現落堂鐘聲和小朋友喧鬧及腳步聲。
阿奇：嗯⋯⋯今次作文題目係「我的志願」⋯⋯哎呀⋯好難諗呀，我又唔想做醫生律師，又唔想同其他人一樣寫 youtuber或者電競選手喎 。呀！有喇！
阿奇陶醉喺自己嘅幻想中，想像緊自己穿越到一千年之前。
阿奇：我的志願就係做萬世師表！唔係一般嘅老師，係要好似孔子咁～有教無類～春風化雨～
他唸唸有詞，無注意到有啲嘢由草堆探頭而出
阿奇：咁第時就有學生幫我寫書，又會周圍同人講我係幾咁偉大，
他自得其樂，扮學生讚賞自己
阿奇：「老師果然學識廣博，學生佩服佩服」
從草堆探頭而出嘅人：嘰哩咕嚕⋯⋯老師？
阿奇發現他。
阿奇：啊！！！我有無聽錯呀？老師？！竟然咁快就有人叫我做老師～～唔通佢就係我人生中第一個學生？！
阿奇睇清楚眼前呢個「人」。
阿奇：⋯⋯咦，睇你個樣唔似哩度嘅人喎，你喺邊度嚟㗎？
人：嘰哩咕嚕！
阿奇：吓，嘰哩咕嚕國，都未聽過嘅⋯係咪喺個啲毛里球斯、阿努阿圖嗰啲地方附近㗎呢⋯⋯是但啦，總之作為一個偉大嘅老師，無論你嚟自邊度，都會名師出高徒！好啦！我哋嚟上堂啦！
王子：嘰哩咕嚕！
係喇，佢就係嘰哩咕嚕王子喇！佢嚟地球就係為咗學能量十足嘅廣東話，竟然不費吹灰之力就有免費老師！佢緊係好開心啦～阿奇跑開幾步，好威風咁行近王子。
阿奇：咳咳，喂喂，見到老師行入課室，要起立講「老師午安」㗎。再嚟多次，我入嚟喇
王子：老鼠午啷
阿奇：唔係呀、唔係呀，係「老-師-午-安-」丫
王子：「午⋯啷？」
阿奇：哎呀，唔嘥時間喇！哩位同學～你想學啲咩？
王子：學⋯學廣東話⋯
阿奇：哦！！學廣東話好易之嘛！嚟啦，等我教你啦⋯⋯嗯⋯不過第一句教啲咩好呢⋯⋯啊～有喇！就教你「有乜依郁，揸住碌竹」啦！我阿婆好鐘意講呢句㗎！
王子：郁？竹？
阿奇：你跟我讀一次啦「有乜依郁，揸住碌竹」
王子：「有乜依郁，揸住碌竹」
阿奇：啱喇，哩句嘢係叫人要打醒精神，準備定如果有咩緊急情況，都有所準備
鐘意扮鬼扮馬嘅阿奇，又開始扮超人打怪獸，
阿奇：蕉蕉蕉～隨時反擊呀！應變呀～
王子：哦！準備、應變
突然，遠處傳嚟急速嘅踢拖聲，還有一陣呼叫⋯⋯
阿奇阿媽：）啊！你個衰仔！
阿奇：弊！
說時遲那時快，阿奇媽媽就出現係公園入口，指住阿奇大聲講。
阿奇阿媽：你果然又嚟咗公園玩呀，叫咗你放學就即刻返屋企㗎嘛！你啲功課丫、下星期嘅測驗呢⋯
阿奇：我哋今日落堂先喇，各位同學再見～～～～
阿奇落荒而逃，消失喺王子嘅視野。
王子：老師再見！嘰哩咕嚕⋯有咩依郁⋯碌竹
睇嚟王子已經學識咗第一句廣東話喇! 不過佢仲要行返去傳送站，先可以將學到嘅廣東話傳送返去嘰哩咕嚕星球。希望一切順利啦…… 咦? 前面又會咁多人嘅?
睇熱鬧嘅人群塞住馬路轉角，幾個着晒裝備嘅消防員俐落咁準備救火。
靚女：哇！你睇～啲消防員揸住個消防轆，隻手臂幾粗呀～好有型呀～
王子：消防轆？喔！有咩依郁，揸住消防轆
靚女見到有人亂嗡廿四，忍唔住搭咀。
靚女：係「有咩依郁，揸住碌竹」呀，喂，你係邊個呀？行開啲唔好阻住我哋同大隻消防員影相啦
靚女轉身迫開王子，同時舉起手機，瘋狂同遠處嘅消防員自拍，
王子：哎呀哎呀
王子行行吓，又去到公園，見到有個小朋友拉住個大人行緊埋去捉棋嘅伯伯嗰度喎。佢決定偷聽吓⋯
阿伯：哇細路! 你尋日捉棋捉唔贏我， 今日拉埋阿叔嚟呀?
王子：阿叔？喔！有咩依郁，拉埋阿叔
阿伯：氣！係「有咩依郁，揸住碌竹」呀，你又想嚟捉棋呀？要排隊㗎喎！
轉個頭就去到戲院門口，應該差唔多開場，所以前面人山人海喎。咦? 王子又去咗邊呀?
爆谷阿叔：限時優惠～買戲飛送爆谷～睇好戲，狂食爆谷！
王子：爆谷？喔！有咩依郁，狂食爆谷
爆谷阿叔：咩呀？係「有咩依郁，揸住碌竹」丫嘛，你想食爆谷咩？嚟嚟嚟，買十張戲飛送你「一啖」爆谷！喂喂喂，唔買飛喇？啊～運吉嘅！
條街天寒地凍，王子去到粥舖，見到粥店靚姐遞緊外賣。唔通王子都想買粥食呢?
靚姐：邊個叫咗外賣及第粥？嗱～係呀今日好凍丫，食碗及第粥，全身暖粒粒喇
王子：及第粥？喔！有咩依郁，食碗及第粥
靚姐：有咩依郁，係「揸住碌竹」喎，小朋友，你又想食及第粥咩？埋邊落單啦！
終於，王子去到轉送站喇，不過⋯⋯
電腦：收到王子傳送返嚟嘅訊號。現在進行分析⋯⋯
叮噹叮噹，資料衝突，王子只有三秒時間確認，請提供「有咩依郁」下一句係乜嘢？
哎呀，王子仲記唔記得㗎？！佢腦海中回帶閃過⋯⋯
有咩依郁，揸住消防轆？
有咩依郁，拉埋阿叔？
有咩依郁，狂食爆谷？
有咩依郁，食碗及第粥？
然後，曾經指正佢哋睇消防員靚女、捉棋阿伯、賣爆谷阿叔同粥舖靚姨嘅聲音一齊出現：
「有咩依郁，揸住碌竹」
明亮嘅資料傳送聲響起。
電腦：資料已經儲存
背景再次響起神秘的太空音樂⋯⋯
做得好呀! 嘰哩咕嚕王子，學廣東話，拯救星球嘅使命就靠晒你喇！
