事源於之前發起嘅一個投票：究竟泛民會被淘汰，定係會永續。結果算係大幅拋離嘅63%覺得會被淘汰。
首先當然因為係推上依然係同溫層，所以其實都估到有呢嘅結果。尤其係作為發起者嘅我平時都係推開本土同獨派資訊，本身會幫我retweet出去嘅都係同一個圈嘅人。但其實好多人都冇諗，究竟咩先係泛民。就算係留言嘅人，都係得一個問究竟點樣先算泛民。究竟係要係傳統支持一國兩制嘅公民黨民主黨先算泛民，眾志抗爭派個種新泛民先叫泛民？咁如果佢加入左傳統兩黨但係支持香港獨立，咁又係唔係泛民呢？
另外就係點先算被淘汰係冇人問。係成個黨冇左就算係淘汰啊，定係唔再堅持以前嘅思想就算係淘汰？當中收到個好有趣嘅評論就係話因為冇中年人上twitter所以仲係同溫層。咁究竟支持泛民嘅係唔係得中年人？有去過泛民區議員office嘅人應該都知，其實入面好多議助，甚至宜家係議員本身都好後生。點解咁多我地假設會比較支持本土思想嘅年齡層都會係泛民做嘢？
當然有關議助個啲好有可能係做緊intern冇得揀，另一個可能就係某程度鬥唔過泛民嘅資源。如果你出黎搵野做想投身政治行業，基本上得傳統泛民先會有job vacancy。對本土同獨派黎講，佢哋維持運作都已經好努力，根本冇乜可能會再請好多人——所以大部分都係問有冇人去做義工幫手。不過真正搵工做嘅，有幾多個肯做義工？所以好多加入泛民嘅，佢地未必一定認同泛民嘅諗法，但係因為得佢地有工offer，就入左去做。
另外，大部分係今次運動之後先開始接觸香港政治嘅人黎講，本土定泛民根本冇分別。只要係支持民主派嘅我就ok，唔理入面佢哋點諗，亦都唔理解有咩分別。呢個其實係今次口號嘅不割蓆帶黎嘅後果：本來應該好多衝突嘅radical vs moderate都消磨左好多，更加唔會知道之前有咩牙齒印，泛民又好獨派又好本土又好或者係熱普城有咩瓜葛。咁樣嘅solidarity的確對面對極權有幫助，但係都要諗其實係唔係反而令到真實嘅光譜支離破碎，而已經唔係「好闊」咁簡單。
簡單黎講，今次個投票見到嘅野係，暫時我地大家都係一個同溫層裡面，亦都有唔少false assumption。咁當然，宜家睇究竟泛民會唔會消失其實都已經無關本土獨派同佢哋鬥爭咩事，除左民主黨個啲寫明自己係中國人，覺得香港係中國一部分嘅政黨之外，好大機會其實會滅所有民主派嘅聲。
