踏入2020年，一個武漢肺炎搞到整個地球嘅人要改變原有嘅生活模式。由一月中開始，我地嘅生活就不再一樣。起初果段時間，好忙，好緊張，好擔心。感恩嘅係，係物資短缺兼未知有關病毒嘅資訊嘅果段日子，我可以專心咁係屋企上網撲口罩，盡可能唔離開屋企，一星期只出街一次買晒七日嘅物資同食材。大概一個月後，係忙亂之中回過神來，當時，已經係二月下旬。
作個序 其餘待續然後睡覺 廿八年後 精粹還在腦內發酵
踏入二月，係屋企嘅時間開始覺得悶。無得出去躝街，煲劇煲到懷疑人生，開始諗係咪要搵啲嘢做吓咁呢？一向我都鐘意睇下書、寫下文章（係咪好文青呢）。所以，我嘅防疫生活日常之中，順理成章咁就新增咗寫作呢個項目。最初嘅目標梗係每日一篇啦，但當你日日坐係屋企無乜嘢做，又邊得嚟咁多題材去寫呢。有時睇咗啲電視劇、電影、散文小說，都會記低當下嘅感覺。但隨著存貨睇一部少一部，甚至有啲去到二擦三擦，我嘅防疫生活日常變得越嚟越乏味，甚至頽到連無病呻吟都吟唔出。
偶爾亦明瞭別讓潛力浪費 但發完力三秒還是怕倦坐低半年期間，斷斷續續寫嘅文章其實唔少。但好多都係屬於「草稿」，其實只要再執吓、整理吓，果啲文章都係可以放出嚟見人。 拖吓拖吓，到最近終於扚起心肝開個寫作平台 - 本來都有，而且有兩個添，但基於某啲原因，好想係一個全新嘅平台試吓全新嘅寫作方式。
感恩，係呢個咁艱難嘅時候，竟然比我搵到新工作。亦因為回歸上班族嘅生活，朝九晚六就要坐監式咁困係辦工室，好彩嘅喺公司距離屋企唔洗一個鐘嘅車程（對住係山旮旯嘅我嚟講，呢個通勤時間已經係好短）。但放工返到屋企搞完一大爛餐，食埋個飯，其實個人已經進入低電量模式。古語有云「可以hea的話不會郁」，所以，好多時㩒下手機望下電視，咁又一晚。
程式編一半 長橋起不過半 完成將很美滿 半途卻放下沒有管
自己嘅興趣真係好多，之前真正報課程去學過寫program，但後來發現程式編寫嘅世界實在太大，略懂一二只係方便日常理解同使用。
亦曾經讀過日文同法文，但基礎班學到嘅嘢早已經煙消雲散。而家係學緊韓文，今次嘅決心相對堅定，真係搵咗老師上堂，進度亦尚算良好，不過學習之路漫長，老師自己都學咗6年，包括有一年多係韓國留學。我都唔係無諗過高齡留學，但因為疫情同埋香港嘅事，暫時應該都係唔洗諗。
明明可寫出佳作那筆管 進殿堂前 枝枝只寫到一半
係有限嘅工餘時間，若果只能夠鑽研一項興趣，我會揀寫作。雖然自己寫得唔好，但唔堅持寫落去，亦唔會有變得更好嘅一日。（雖然都有一個可能性係寫極都咁爛）想寫嘅嘢好多，唔想再半途而廢，要係感覺消失之前，將佢地都寫出嚟。
「給我一首歌的時間」原意係想介紹私心推介嘅歌。每次當我喜歡一首歌嘅時間，就會係 Music App 揀 Repeat One，不停咁loop住同一首歌，聽到夠為止。有啲歌，每年去到某個季節，又會自自然然諗起，可能loop嘅次數無之前咁多，一程車或甚一日，但點都會諗起佢，要聽吓至滿足。
而呢個題目，其實都諗咗好....幾年。近日咁啱聽到電台播呢首歌，就諗起自己寫作進度。有感而發，坐言起行，終於嘔到一篇文章出嚟，同時都為呢個題目開咗光，希望之後做到「陸續有來」。
