登記捐贈骨髓

（她在11月13日上午等不及骨髓移植，與世長辭）

第一次去捐血中心，我登記成為骨髓捐贈者。

朋友H，大概6年前認識並一齊共事。佢係一個好厲害嘅人，聰明而善良，充滿理想且能付諸實行，係一個好可靠、穩重嘅人。佢唔係典型嘅領導者，而係剛柔並重，就好似海洋般柔而有力。喺我狀態好差嘅日子，佢總係包容體諒我，而我知道依份包容背後佢獨力承擔咗好多。

然後就喺19年頭，有次佢好平靜咁提起佢貧血去咗做body check，發現有再生障礙性貧血（再障）。佢大概解釋咗再障即係骨髓唔識造血，係一種骨髓造血功能衰竭症。佢當時嘅堅毅，令我以為，ok的。

後來我一直忙各樣事情，再後來就入咗去坐。自己都頭昏腦脹了，就好易忽視身邊人嘅感受／苦難。又或者係，當自己痛得麻木，面對住他人身上另一種毀滅性嘅苦難，我唔識回應，我無力去理解或共感。（所以我成日覺得自己唔係一個「好」朋友，經常對朋友有所虧欠，又唔識點表達對朋友嘅愛同感激）而佢仍一直默默地盡佢所能咁support我。

保釋出黎後，我先知道佢依家係極重型嘅再障(very severe Aplastic Anemia)。除左一般貧血症狀，缺乏血小板亦導致佢好易會皮下出血，因為嚴重缺乏白血球而受各種感染折磨，免疫力不足令一個細傷口都可以受感染，所以佢只能避免外出，亦經常要住院。而佢原本嘅生活，工作、社交、興趣，都被奪去，佢嘅生活就剩低喺隔離病房張床到。

所以當我好心虛咁揾翻佢時，佢話唔緊要，因為當時大家都各自面對緊煉獄。我哋講起絕望、講起麻木。我知道佢係幾咁厲害嘅一個人。所以更加揪心。不過佢唔係曾經好厲害，而係一直都係。佢對自身以及外在嘅awareness and insight，仍然令我動容。

「我哋見到面會係一件好神奇嘅事，我哋啲時間都唔係自己掌握的」。過多幾個月，我就入去坐，唔知我哋幾時可以再見面，但我確信會有依一日。我想為佢做少小野，希望好似佢咁好嘅人可以擁有一個能支撐佢生活嘅身軀。儘管骨髓脗合機會好微，但係我唯一可以做嘅事，同埋自己要好好活着，努力掙扎。

登記做骨髓捐贈者非常簡單，去捐血站填同意書、健康問卷、抽少量血液就可以。只要你身體健康狀況良好，無傳染病，年齡介乎18歲至50歲，非乙型肝炎帶菌者，就可以去登記。假如真係有合適者先會再聯絡你並作進一步的身體檢驗，捐贈者喺過程中都有權退出。大家得閒去登個記啦～