紀念無緣的外甥仔

超音波照片

無緣看著你古錐的面模仔
無緣聽著你響亮的啼哭聲

自聽著恁阿母有身開始
就期待你的出世
佇你會踢阿母腹肚皮的時
會輕輕仔共你安搭
佇恁阿母逐回提超音波相片轉來的時
會想像你生做啥款

你佇阿母腹肚內38个禮拜
煞佇注文欲催生的前一工喝無去
阿舅心內不止仔毋甘
毋甘恁阿媽那輕輕仔挲著替你親手裁的被那流目屎
阮煞無話通安慰
毋甘恁阿母承受遮爾久的痛苦
煞等無來你可愛的身影
毋甘你猶袂赴看著大千世界
就閣趕轉去天使身軀邊等投胎

毋過，想著你會當省去真濟手術的艱苦
心內嘛有一點仔安慰

向望你趕緊閣倒轉來阿母腹肚內
予阮有機會
抱著你小小的身軀
摸著你幼幼的跤手
再會啦，我無緣的外甥仔