［性別講看覓］—「查埔囡仔袂使哭、予人抱」
大表妹結婚了後去美國，有當時仔會家己𤆬囡仔轉來。伊生的頭一个是查某囡仔。我暗時仔去阿舅兜看伊，囡仔可能袂慣習，直直哭，大表妹一直佇騙囡仔，誠無閒，伊的小妹閒閒坐佇邊仔看，小妹共我講：「阮欲共鬥抱，伊毋予我抱。」
第２个囡仔是後生，較司奶，我看伊磕袂著就哭，愛伊老母抱，阿舅看著，攏會講：「查埔囡仔袂使哭。」「查埔囡仔袂使予人抱。」囡仔遐細漢，講遮仔話實在是……
大表妺共我講：「囡仔袂使愛予老母抱喔？」伊無歡喜嘛毋敢共伊老爸按呢講。囡仔逐擺哼，阿舅逐擺講，我聽著有夠煩，阿舅毋是去鬥騙囡仔，招伊佮你耍，干焦用喙講佮嫌。
想著，查某人若做官員，抑是政治人物參選，有結婚有家庭的，予人嫌伊會無閒伊的家庭，對公家的工課無用心；無結婚的，閣予人懷疑伊無結婚，無囡仔，毋知影家庭佮囡仔的需求，講遮仔實在是糞埽話，我想欲問遐仔講話的查埔人：「你有結婚，有囡仔，你有𤆬過囡仔無？毋是你有『生』囡仔，自動就了解囡仔，了解家庭愛啥物。天下間無彼呢簡單的代誌。」
留言0
查看全部
