漢高祖叫劉邦，呢樣嘢大家都知道，但係大家又知唔知出處係咩呢？大家可能覺得《史記》或者《漢書》有記載，其實唔係，我地睇下呢兩本書既記載。
《史記．高祖本紀》：高祖，沛豐邑中陽裏人，姓劉氏，字季。
《漢書．高帝紀》：高祖，沛豐邑中陽里人也，姓劉氏。
《史記》同《漢書》都係無記載漢高祖叫咩名，《漢書》只係話佢姓劉，《史記》話佢姓劉字季。最早記載漢高祖叫劉邦既文獻係東漢荀悅既《漢紀》。呢本書係删減《漢書》寫成，將《漢書》變成編年體。
《漢紀．高祖皇帝紀》：漢高祖諱邦。字季。
可惜呢個體例唔統一，喺《漢紀》其他地方，係無再記載漢高祖打後既漢朝皇帝叫咩名。《漢紀》既問題先唔好理住，我睇《漢書》嗰陣，發覺班固有心隱去漢高祖叫咩名。
《漢書．楚元王傳》高祖曰：「某非敢忘封之也，為其母不長者。」
呢段記載係講漢高祖封自己侄仔做王，佢話我唔係唔記得，只係佢呀媽對我唔好。《漢書》既某，喺歷史上發生嗰陣，出自劉邦本人把口應該就係「邦」，只係因為避諱所以寫成「某」。另一個類似記載發生喺王莽攝政時期。
《漢書．王莽傳上》：梓潼人哀章學問長安，素無行，好為大言。見莽居攝，即作銅匱，為兩檢，署其一曰「天帝行璽金匱圖」，其一署曰「赤帝行璽某傳予黃帝金策書」。某者，高皇帝名也。
呢段記載係話王莽攝政時期，有位旅居長安既人叫哀章，佢不嬲無品行，講嘢鍾意作大。見王莽攝政，於是整左一個銅櫃，入面放左兩份文件，第二份文件係一篇策書，標題係「赤帝行璽某傳予黃帝金策書」，意思係赤帝劉邦將玉璽傳比黃帝王莽。漢朝五行屬性係火，新朝五行屬性係土，火生土，所以有咁既字眼。喺真正既策書上面，應該係「赤帝行璽邦傳予黃帝金策書」。「某」呢個字，班固刻意標明係漢高祖既名，作用一係避諱，作用二係怕後世以為策書上面真係有個某字。由此可見佢係有心唔記載，如果唔係東漢時代荀悅既《漢紀》，後人想得知劉邦叫咩名都好難。
對「邦」字既避諱喺出土文獻度都有出現。例如七十年代喺馬王堆出土既《老子》，有甲乙兩個版本，甲本保留「邦」字，乙本改晒做「國」字，例如：
《老子》甲本：以正之邦，以畸用兵。
《老子》乙本：以正之國，以畸用兵。
所以學者推斷《老子》甲本成書在漢朝之前，劉邦仲未做皇帝嗰陣。《老子》乙本避漢高祖諱，不避漢惠帝諱，成書時期應該係漢高祖時期。
講返正題，呢個避諱喺《漢書》入面係唔統一，《漢書》唔會喺本紀開頭開宗明義標明每一個皇帝叫咩名。但係喺《漢書》其他地方會不經意提到嗰啲漢朝皇帝叫咩名。只有兩個例外，就係漢高祖同漢惠帝。呢兩位皇帝既名，要靠荀悅既記載。至於《漢書》漢惠帝之後皇帝係咩情況，我地下篇文再講。
