【台語講怪奇】 EP01-Atlantis

歡迎收聽「台語講怪奇」。

Ta̍k家好，我是Chiá-siông，我是Niau-tāu。

咱chit ê節目是用台語來kā ta̍k家介紹chit ê世界上，chiâⁿ chōe奇奇怪怪ê代誌。

用台語來表現，ǹg望ta̍k家聽liáu會感覺趣味。

今á日頭一集，lán要紹介ê是chiok有名ê hit ê大陸。

Hăⁿ？Beh介紹中國？

M̄是，chit ê大陸是正經ê大陸，你一定bat聽--過-ê「Atlantis」。

Ĕ，che我真正有聽過nē，to̍h是hit ê沉lŏe海--ni̍h無去ê hit--ê。

Tio̍h，chit ê Atlantis大陸，是2400年前hit ê chiok有名ê Plato講--ê。

Ŏ͘？Kám講伊親目睭看--過？

無--lah，伊mā是聽人講--ê，聽講hoⁿh chit ê Atlantis軍隊chiok強，資源豐富，科技蓋先進。

聽--起-來in過了真爽nē，tī hit ê時代，beh ài啥有啥。

然後差不多lĕ 1萬年前，1工內，in tio̍h pú-lu pú-lu沉--落-去-ah。

O͘h沉--落-去-ah，án-ne咱今á日to̍h講到chia。

啥物講到chia，Atlantis沉lŏe海--eh了後，對世界影響外大你知--無！

Ŏ͘？啥影響無你說來聽看māi！

經過chiâⁿ濟專家ê研究kah調查，Atlantis大陸siōng有可能tī leh tó位--leh， to̍h teh大西洋hia，tú好tĕ美洲kah歐洲tiŏng，hit段距離hoⁿh，你nā tĕ GOOGLE小可á量1下，tĕ現代駛船差不多ài超過6千公里neh。

M̀，án-ne聽--起-來chiok遠nē，m̄-koh tī萬多tang前，koh是冰河時期nē，海bô hiah闊，應該沒chiah遠--ā。

無m̄-tio̍h，m̄-koh to̍h算是tĕ冰河時期nē，海無hiah闊，he mā是ài走幾千公里neh。

古早人無代無誌走hiah遠創啥，吃飽傷閒o͘h！

Ah in to̍h無電視通看，a̍h無podcast通聽，無代誌to̍h出去行行--leh…m̄是án-ne講--lah，tio̍h算tĕ萬外年前，美洲kah歐洲、非洲lóng有文明存在，chit kóa無kâng ê族群，總--是有貿易ê需求ài往來。

M̄-koh行船ài駛幾千公里真危險neh，凡勢無細膩to̍h會撞tio̍h海翁--ā，a̍h-sī khiā tī船邊放尿跋--下-去to̍h寒--死-ah ă！

所擺，chit時hoⁿh，nā中央有1塊土地，ta̍k-ke tio̍h會當chiok安全--ê坐火車pú-pu…。

無火車--lah！

O͘h，坐馬車khi-kho̍k khi-kho̍k，到另外1 pêng kah人做生理tio̍h好。

Ŏ͘-ò͘，án-ne講我to̍h知--ah，伊tī啥物所在，hit ê位置真重要，to̍h親像新加坡ê位置真重要ê意思kāng款。

Nā是新加坡沉--lòe，對世界ê影響mā chiok….“Errrr”。

Atlantis ê重要性應該比新加坡大chiok濟--lah。

Tio̍h--lah，hiah-nī-á大ê 1 ê大陸，人口hiah chōe，koh有錢，軍隊koh hiah-nī-á強，nā beh用chit-má ê世界來比較，應該tio̍h是親像美國hiah重要，你ka想看māi，美國nā雄雄沉--lòe，無去--ah，會發生啥物代誌？

美國人會講，che水chiok深！

He水hoⁿh，m̄-nā chiok深--ê，全世界siōng有錢ê市場tio̍h án-ne無去--ah neh！

Ah m̄ to̍h變做藍海市場！

你黑白講，he m̄-nā是市場無去--ah，siōng厲害ê軍隊無去--ah，hit ê影響大kah ē變天我kā你講。

Hăⁿ？沉--lòe to̍h沉--lòe-ah，koh變啥物天。

咱頭tú-á講Atlantis tī啥物所在。

Tī美洲kah歐洲中央。

無m̄-tio̍h，所擺Atlantis大陸沉--lòe了後，Mexico暖流hit ê溫暖ê海水，tio̍h會當一直流kah北pêng，to̍h差不多是hit ê時陣，頂一回ê冰河時期自án-ne結束--ah。

Ŏ͘-ò͘，án-ne真正算是變天--ah neh，是講你講ê故事siōng早是hit ê Plato聽人講--ê, he kám ē是人烏白chòaⁿ--ê？ 

Eh，聽人講kah烏白講是無kâng--ê，烏白講人ē講你白賊，nā是聽人講--ê, he to̍h有ha̍h咱chit ê節目製作ê原則。

啥？咱chit ê 節目koh 有原則o͘h！

咱ê原則to̍h是，he伊講--ê m̄是我，我講話無teh負責--ê。

無負責koh敢講chiah大聲。

Án-ne今á感謝ta̍k家收聽「台語講怪奇」，我是Niau-tāu，我是Chiá-siông，咱後回再會ō͘！

Hoan-gêng siu-thiaⁿ “Tâi-gí kóng koài-kî”.

Ta̍k-ke hó, góa sī Chiá-siông, góa sī Niau-tāu.

Lán chit ê chiat-bo̍k sī iōng Tâi-gí lâi kā ta̍k-ke siāu-kài chit ê sè-kài siōng, chiâⁿ chōe kî-kî-koài-koài ê tāi-chì.

Iōng Tâi-gí lâi piáu-hiān, ǹg-bāng ta̍k-ke thiaⁿ liáu ē kám-kak chhù-bī.

Kin-á-ji̍t thâu 1 chi̍p, lán beh siāu-kài ê sī chiok ū miâ ê hit ê tāi-lio̍k.

Hăⁿ? Beh siāu-kài Tiong-kok?

M̄ sī, chit ê tāi-lio̍k sī chèng-keng ê tāi-lio̍k, lí it-tēng pat thiaⁿ--kòe-ê “Atlantis”.

Ĕ, che góa chin-chiàⁿ ū thiaⁿ-kòe nē, to̍h sī hit ê tîm lŏe hái--ni̍h bô khì ê hit--ê.

Tio̍h, chit ê Atlantis tāi-lio̍k, sī 2400 nî chêng hit ê chiok ū miâ ê plato kóng--ê.

Ŏ͘? Kám kóng i chhin ba̍k-chiu khòaⁿ--kòe?

Bô--lah, i mā sī thiaⁿ lâng kóng--ê, thiaⁿ kóng hoⁿh chit ê Atlantis kun-tūi chiok kiông, chu-goân hong-hù, kho-ki kài sian-chìn.

Thiaⁿ--khí-lâi in kòe liáu chin sóng nē, tī hit ê sî-tāi, beh ài siaⁿh ū siaⁿh.

Jiân-āu chha-put-to lĕ 1 bān nî-chêng, 1 kang lāi, in tio̍h pú-lu pú-lu tîm--lo̍h-khì-ah.

O͘h, tîm--lo̍h-khì-ah, án-ne lán kin-á-ji̍t to̍h kóng kàu chia.

Siáⁿ-mih kóng kàu chia, Atlantis tîm lŏe hái--eh liáu-āu, tùi sè-kài éng-hióng gōa-tōa lí chai--bô!

Ŏ͘? Siáⁿ éng-hióng bô lí kóng lâi thiaⁿ khòaⁿ-māi!

Keng-kòe chiâⁿ chōe choan-ka ê gián-kiù kah tiau-cha, Atlantis tāi-lio̍k siōng ū khó-lêng tī leh tó-ūi--leh, to̍h teh Tōa-se-iûⁿ hia, tú-hó tĕ Bí-chiu kah Au-chiu tiŏng, hit tōaⁿ kū-lî hoⁿh, lí nā tĕ GOOGLE sió-khóa-á niû 1 ē, tĕ hiān-tāi sái-chûn chha-put-to ài chhiau-kòe 6 chheng kong-lí neh.

M̀, án-ne thiaⁿ--khí-lâi chiok hn̄g nē, m̄-koh tī bān gōa tang chêng, koh sī peng-hô sî-kî nē, hái bô hiah khoah, èng-kai bô chiah hn̄g--ā.

Bô m̄-tio̍h, m̄-koh to̍h sǹg-sī tĕ peng-hô sî-kî, hái bô hiah khoah, he mā sī ài cháu kúi chheng kong-lí neh.

Kó͘-chá lâng bô-tāi-bô-chì cháu hiah hn̄g chhòng-siaⁿh, chia̍h-pá siuⁿ êng o͘h!

Ah in to̍h bô tiān-sī thang khòaⁿ, a̍h bô podcast thang thiaⁿ, bô tāi-chì to̍h chhut-khì kiâⁿ-kiâⁿ--leh...m̄-sī án-ne kóng--lah, tio̍h sǹg tĕ bān gōa nî-chêng, Bí-chiu kah Au-chiu, Hui-chiu lóng ū bûn-bêng chûn-chāi, chit kóa bô-kâng ê cho̍k-kûn, chóng--sī ū bō͘-e̍k ê su-kiû ài ông-lâi.

M̄-koh kiâⁿ-chûn ài sái kúi chheng kong-lí chin hûi-hiám neh, hoān-sè bô-sè-jī to̍h ē lòng tio̍h hái-ang--ā, a̍h-sī khiā tī chûn-piⁿ pàng-jiō poa̍h--lo̍h-khì to̍h kôaⁿ--sí-ah ă!

Só͘-pái, chit sî hoⁿh, nā tiong-ng ū 1 tè thó͘-tōe, ta̍k-ke tio̍h ē-tàng chiok an-choân--ê chē hóe-chhia pú-pu…

Bô hóe-chhia--lah!

O͘h, chē bé-chhia khi-kho̍k khi-kho̍k, kàu lēng-gōa 1 pêng kah lâng chò seng-lí tio̍h hó.

Ŏ͘-ò͘, án-ne kóng góa to̍h chai--ah, i tī siáⁿ-mih só͘-chāi, hit ê ūi-tì chin tiōng-iàu, to̍h chhin-chhiūⁿ Sin-ka-pho ê ūi-tì chin tiōng-iàu ê ì-sù kāng-khoán.

Nā sī Sin-ka-pho tîm--lòe, tùi sè-kài ê éng-hióng mā chiok... “Errr”.

Atlantis ê tiōng-iàu-sèng èng-kai pí Sin-ka-pho tōa chiok chē--lah.

Tio̍h--lah, hiah-nī-á tōa ê 1 ê tāi-lio̍k, jîn-kháu hiah-chōe, koh ū chîⁿ, kun-tūi koh hiah-nī-á kiông, nā beh iōng chit-má ê sè-kài lâi pí-kàu, èng-kai tio̍h sī chhin-chhiūⁿ Bí-kok hiah tiōng-iàu, lí ka siūⁿ khòaⁿ-māi, Bí-kok nā hiông-hiông tîm--lòe, bô khì--ah, ē hoat-seng siáⁿ-mih tāi-chì?

Bí-kok-lâng ē kóng, che chúi chiok chhim!

He chúi hoⁿh, m̄-nā chiok chhim--ê, choân sè-kài siōng ū chîⁿ ê chhī-tiûⁿ tio̍h án-ne bô khì--ah neh!

Ah m̄ to̍h piàn-chò nâ-hái chhī-tiûⁿ !

Lí o͘-pe̍h kóng, he m̄-nā sī chhī-tiûⁿ bô khì--ah, siōng lī-hāi ê kun-tūi bô khì--ah, hit ê éng-hióng tōa kah ē piàn-thiⁿ góa kā lí kóng.

Hăⁿ? Tîm--lòe to̍h tîm--lòe-ah, koh piàn siáⁿ-mih thiⁿ.

Lán thâu-tú-á kóng Atlantis tī siáⁿ-mih só͘-chāi.

Tī Bí-chiu kah Au-chiu tiong-ng.

Bô m̄-tio̍h, só͘-pái Atlantis tāi-lio̍k tîm--lòe liáu-āu, Mexico loán-liû hit ê un-loán ê hái-chúi, tio̍h ē-tàng it-ti̍t lâu lah pak-pêng, to̍h chha-put-to sī hit ê sî-chūn, téng 1 hôe ê peng-hô sî-kî chū án-ne kiat-sok--ah.

Ŏ͘-ò͘, án-ne chin-chiàⁿ sǹg sī piàn-thiⁿ--ah neh, sī kóng lí kóng ê kò͘-sū siōng chá sī hit ê Plato thiaⁿ lâng kóng--ê, he kám ē sī lâng o͘-pe̍h chòaⁿ--ê?

Eh, thiaⁿ lâng kóng kah o͘-pe̍h kóng sī bô kâng--ê, o͘-pe̍h kóng lâng ē kóng lí pe̍h-chha̍t, nā sī thiaⁿ lâng kóng--ê, he to̍h ū ha̍h lán chit ê chiat-bo̍k chè-chok ê goân-chek.

Siáⁿ? Lán chit ê chiat-bo̍k koh ū goân-chek o͘h!

Lán ê goân-chek to̍h sī, he i kóng--ê m̄ sī góa, góa kóng-ōe bô teh hū-chek--ê.

Bô hū-chek koh káⁿ kóng chiah tōa-siaⁿ.

Án-ne kin-á kám-siā ta̍k-ke siu-thiaⁿ “Tâi-gí kóng koài-kî”, góa sī Niau-tāu, góa sī Chiá-siông, lán āu-hôe chài-hōe ō͘!