【A郎台語小詞典】 EP. 26-Tìⁿ無聽--leh

今á日咱beh來講chit ê tìⁿ無聽--leh，無聽--leh，to̍h是無聽--tio̍h，tìⁿ，是假影、假仙ê意思，mā有人講做tèⁿ，che是腔口差，意思lóng kāng款，tìⁿ無聽--leh to̍h是假做無聽--tio̍h。Kah假影有關係--ê，有1 kóa詞，咱mā順sòa紹介hō͘ ta̍k-ke來了解。Tìⁿ-chhiⁿ，mā有人講tèⁿ-chheⁿ，kāng款是kek m̄知ê意思，tìⁿ笑，to̍h是假笑，koh有1 ê kài趣味--ê，to̍h是tìⁿ-chhìn笑，che是冷笑ê意思，beh kan-na講chhìn笑mā ē-sái。最後，做1句例句來分享，「你m̄免tī hia tìⁿ-siáu-la̍k顛，che臭khang是siáng去iah--出來-ê，ta̍k-ê心內有數！」Tìⁿ-siáu-la̍k顛to̍h是激khong激戇。

Chit ê tìⁿ koh有出力ê意思，tìⁿ屎tìⁿ尿to̍h是出力放屎尿，「Che擔頭真重，ài tìⁿ力chiah taⁿ ē --起-來。」To̍h是講ài激力chiah taⁿ伊ē贏。

Tìⁿ koh 1種是出力kā目睭thí kah chiok大蕊án-ne。像講：「你目睭tìⁿ kah hiah大蕊是beh創啥？我kám有講têng-tâⁿ？」Koh像講，「A桃！」「Hăⁿ！」「你免tio̍h驚！目睭mā免tìⁿ kah hiah大蕊！Beh錢tī chia，beh ài，lóng the̍h--去-lah！」

Kin-á-ji̍t lán beh lâi kóng chit ê tìⁿ-bô-thiaⁿ--leh, bô-thiaⁿ--leh, to̍h sī bô-thiaⁿ--tio̍h, tìⁿ, sī ké-iáⁿ, ké-sian ê ì-sù, mā ū lâng kóng chò tèⁿ, che sī khiuⁿ-kháu chha, ì-sù lóng kāng-khoán, tìⁿ-bô-thiaⁿ--leh to̍h sī ké chò bô thiaⁿ--tio̍h. Kah ké-iáⁿ ū koan-hē--ê, ū 1 kóa sû, lán mā sūn-sòa siāu-kài hō͘ ta̍k-ke lâi liáu-kái. Tìⁿ-chhiⁿ, mā ū lâng kóng tèⁿ-chheⁿ, kāng-khoán sī kek m̄-chai ê ì-sù, tìⁿ-chhiò, to̍h sī ké-chhiò, koh ū 1 ê kài chhù-bī--ê, to̍h sī tìⁿ-chhìn-chhiò, che sī léng-chhiò ê ì-sù, beh kan-na kóng chhìn-chhiò mā ē-sái. Chòe-āu, chò 1 kù lē-kù lâi hun-hióng, “Lí m̄-bián tī hia tìⁿ-siáu-la̍k-tian, che chhàu-khang sī siáng khì iah--chhut-lâi-ê, ta̍k-ê sim-lāi iú-sò͘!” Tìⁿ-siáu-la̍k-tian to̍h sī kek-khong kek-gōng. 

Chit ê tìⁿ koh ū chhut-la̍t ê ì-sù, tìⁿ-sái tìⁿ-jiō to̍h sī chhut-la̍t pàng sái-jiō, “Che tàⁿ-thâu chin tāng, ài tìⁿ-la̍t chiah taⁿ ē --khí-lâi.” To̍h sī kóng ài kek-la̍t chiah taⁿ i ē iâⁿ.

Tìⁿ koh 1 chióng sī chhut-la̍t kā ba̍k-chiu thí kah chiok tōa-lúi án-ne. Chhiūⁿ-kóng: “Lí ba̍k-chiu tìⁿ kah hiah tōa-lúi sī beh chhòng-sáⁿ? Góa kám ū kóng têng-tâⁿ?” Koh chhiūⁿ-kóng, “A-thô!” “Hăⁿ!” “Lí bián tio̍h kiaⁿ! Ba̍k-chiu mā bián tìⁿ kah hiah tōa-lúi! Beh chîⁿ tī chia, beh ài, lóng the̍h--khì-lah!”