（2024.5.31.）
昨昏，佇台北仁愛路圓環附近代誌辦了，３點，腹肚枵，想講規氣來食暗頓，中晝十一點食，肉無夠，這馬飯干焦會使食一點點仔，肉若無夠，就較緊枵。
這擺才看著附近就有一間Seven，我入去揀一个排骨便當，提去櫃台，講：「便當欲創燒。」伊講：「微波要自助。」手指後面，我越頭看是佗位？有一个牌仔寫：「自助微波」
伊講：「包裝紙不用打開，將微波爐打開，放進去，按８，停止後，打開，再關上，再按２。」便當頂面有寫「８＋２」
「熱美式有細杯的無？」我問。
「沒有。」他回答了，就恬恬。我講：「一杯中杯。」
錢付完，伊閣講一擺欲按怎微波，可能看我這个歐巴桑可能袂曉揤。
我叫伊咖啡毋免崁蓋，提著便當佮咖啡，去揣位。玻璃壁邊仔有３塊桌仔，有２塊攏坐２个人，後面那塊，坐一个小姐，我行過去，共伊講：「我佮你同齊坐，好無？」伊講好，我共咖啡杯仔囥佇桌頂，講：「沒位矣！」
伊手指彼爿講：「彼爿猶有位，遐的桌仔較濟。」伊講台語。
我講：「是喔！我先微波一下。」微波的機器佇邊仔。
照店員講的，便當囥入去，關起來，揤８，伊開始轉，愛一分半鐘。這一分半感覺誠久，等一睏仔，我行去彼爿看覓，有４塊桌仔，猶有一塊沒人坐。微波停，我共門打開，閣關起來，揤２，這擺是15秒。
共便當提出來，先提去彼爿的桌頂囥，才閣轉來提咖啡。
按呢食便當是誠方便，毋過，規个便當盒仔攏是塑膠，是不是共塑膠（塑化劑）食入去腹肚內？廠商當然講無，無要緊。
我講台語，少年的店員應我華語，表示伊聽有。彼位小姐，看起來30幾歲，台語講甲誠自然，嗯！佇台北，台語嘛會通，毋免閣想東想西矣！直接講就是。
中晝的店嘛是，菜單頂面寫「ＸＸ梅花豬」，我手指菜單，共總舖講：「我愛豬肉。飯半碗。」伊馬上改台語共我講。彼个總舖師30幾歲。
作者攝
