頂个月，看著我的學妹Ａ佇面冊頂懸講著伊的同學Ｂ的喪禮。進前幾若禮拜，我約我的同學嘛是同事Ｃ開講的時陣，伊敢若有講著Ｂ，我用line問Ｃ：「咱彼工有講著Ｂ無？」「有，今年的年初過身。」
我共這幾若年來，佮我的年紀差幾若歲，已經過身的同事、同學、學姊、學妹的名字寫落來，予同學Ｃ確定，伊加一个人，我嘛閣加一个，攏總有９个人。發現in有一个仝款的特點：攏是好人。好人較早死，哪會按呢？
我講其中的３个：
１．對人誠客氣，講話攏溫溫、慢慢仔，誠有禮貌，毋捌共人無歡喜過。逐工坐佇伊的椅子頂懸做工課，仝款的動作，仝款的程序，伊家己的規矩真濟，包括按怎穿衫，按怎走路。幾十年來攏無變。
伊發現有癌的時，已經第幾期矣！決定無治療，無若久就離開。
２．對人真好，真乖，自細漢就是乖查某囡仔。大學讀夜間部，已經來館內上班，半工半讀。退休的時陣，伊的資歷有四、五十年，仝一个部門，仝一項工課。
伊結婚了後，佮大家蹛做伙，毋捌聽伊講大家的長短話。有一擺，廠商來展示電器，伊講伊有富貴手，袂沐水較好，煮飯無法度，洗碗的時誠艱苦，用手橐仔閣較纘袂著，就買一台細細台的洗碗機，我聽著伊買洗碗機，心內想，伊佮大家蹛做伙，伊的大家會接受無？
過一站仔，我拄著伊，問伊洗碗機用了按怎？伊講伊的大家講水愛用誠濟，傷討債，伊就無用矣！
我聽伊按呢講，心內佇受氣，加用一寡仔水，比伊的手艱苦較重要？水愛加幾若仙錢，手痛毋免錢，閣再是查某人佇痛，無要緊。
伊是館內逐家同齊買物仔的「組頭」，啥物物仔攏買，伊自願招逐家登記、訂貨、發貨、收錢。
３．伊比我早幾若屆，我來上班的時，就聽伊佇幫厝內還債。有一遍，伊共我講較詳細一下。伊的老爸以前佇開炭空，落尾倒去，當初的本錢是借的，大部份是共親情借的，伊講：「是我囡仔逐家願意鬥還。」
兄弟姊妹逐家鬥還，伊一直有佇兼差，做上濟的是出版社的校對，學校內底有監考遐仔臨時的工課攏先派予伊。一工一工過落來，沒結婚。
尾仔伊家己買厝，伊的老爸佮厝內面的人蹛入去。伊是４樓，伊老爸佇頂懸閣加疊一層，變做５樓，佮伊仝一棟的同事講：「in老爸講閣欲起６樓。」彼个同事誠受氣。
伊退休了後，有一擺，我佇新店捷運店拄著伊，講欲佮朋友去烏來泡湯，問我欲去無？我講牫無愛去。我心內想，她落尾會當過較輕鬆的日子矣！
無偌久，聽著伊過身，是癌症。有一个同事講：「伊欲去病院回診，請伊的阿兄陪伊去，閣愛予伊的阿兄一擺五百箍。」彼个同事的表情＠＃＄％。我聽著伊死去的消息時，心內想著的是：「較早死，就毋免閣做矣！」
我想著的有這幾若點：
一、好人定定囥著心肝頭想的是，欲按怎共人鬥相共，滿足別人的需要，合人的要求，伊家己的需要呢？無注意。
二、拄著有代誌，抑是家己的身體佮心情無爽快的時，想著的是，誰人講愛按怎做，傳統的規則講應該愛按怎……，無去想著伊家己需要按怎做。逐家攏講伊乖，伊真好，伊對人好透透，就是無為家己想，無照顧家己。
像我頂面講的第２位，伊洗碗的時，手足艱苦，用洗碗機，加用一寡仔水嘛袂使，伊的上懸的原則是「聽大家的話」，伊是乖、聽話，抑是可憐呢？
三、有一个講法是，人投生到地球來，是有任務的，是欲來體驗啥物的，若是伊的工課做完，任務完成的時，就會使離開啊！
四、猶有我頭前寫的第３位同事，愛死去就會使做家己，會使休睏，毋免閣做。
我的看法是，好人攏為別人設想，為別人做工課，無照顧自己，就是破病了，猶是沒好好仔照顧家己，所以病愈來愈重，就過身去矣！
按呢講起來，做好人是驚人的代誌，會較早死，我講的是，對別人好佮對自己好無平衡的人。
我寫完了後，去查一下，有；「好人不長命，禍害遺千年。」這句，看起來，自古就知影。
