幸福家庭的厝，是生做啥款？

我的查某孫講話有較慢，去看兒童身心科，咧等做發展評估。查某囝去聽一个兒童語言的發展的演講，轉來了後才知影彼工𫝛時（siāng-sî）有直播，伊共影片傳予我，講開放一禮拜予人看。

我共彼个２點外鐘的演講看完，分幾若擺看。囡仔大概仔的語言發展是：詞彙、片語、簡單句、複雜句，伊聽有的會比伊會曉講的懸一坎，譬如：伊會曉講詞彙的時，伊聽有片語，所以愛根據每一个囡仔的階段共伊講話。片語這仔階段講名詞、動詞佮人稱詞，人稱詞是爸爸、媽媽、阿公、阿媽……，毋免共伊講色，伊聽無，愛３歲了後才知曉色水的意思。

我想著，我去教中風的小弟的時陣，有當時仔講名詞，認物仔，看伊會曉講無？大部份講袂出來，我就先講一擺，叫伊綴我講；若是伊家己講著，閣複習一擺的時，就講毋著。共去年比，有進步一屑仔，看著伊進步，阮是誠歡喜，其實進步的誠少，速度誠慢。

聽老師按呢講，我想著，囡仔的講話是頭腦佮耳仔、嘴遮仔器官的發展，小弟是頭腦傷著，雖然無仝款，嘛會使試看覓。我愛共名詞加動詞，試看覓小弟會曉無？我共in厝內面看會著的物仔提來桌頂，弓蕉、柑仔、原子筆、紙……，看膨椅遐有一本予囡仔看的繪本，嘛提過來。認物仔了後，加動詞，「杯仔提過來」、「剝柑仔皮」、「冊掀開」……，叫伊共冊掀開了後，伊佇看內面的內容，遮仔片語講２遍，書掀開的時，伊攏佇看。這个練習做完了後，我決定就來叫伊唸內底的字佮圖。

故事是，一个查某囡仔早起時，揹冊包去學校進前，交待伊的老母去一个所在揣字條仔，第一个字條叫伊閣去揣第二个；揣著第二个字條，內面寫的是叫伊去揣第三个字條……，攏總有10个字條，共in的規厝內行透透。

彼本冊是日本人寫的，佇電視卡通，抑是尫仔冊內底，定定看著日本人蹛的厝是一樓，猶有樓頂，頭前有門口埕，閣有魚池仔……。攏配有一个查某人，老母，逐工早起送翁婿佮囡仔出門了後，圍軀裙仔穿起來，開始做厝內面的工課，其實冊內底彼仔老母應該是一起床就穿圍軀裙仔煮早頓，因為in佇食早頓的時，伊就穿圍軀裙仔。我聽阮老師，抑是留日的同學講過，日本的太太，日時仔穿圍軀裙仔做厝內面的工課，愛到暗時仔才褪了來。

我看著厝內面，有膨椅、地毯、冊架仔、花矸仔，花矸仔內底有插花……，攏總二層樓，厝內面有的物仔攏有，我佇想的是，彼个老母，除了買菜、煮食、洗衫以外，摒掃這間厝內，就了去伊的半个人生，無閒規工。欲暗仔的時陣，翁婿佮囡仔轉來，予in幸福的家庭。以早，我細漢的時，看著這種生活，感覺是幸福的。

毋過，我大漢了後，就發覺，查某囡仔毋管伊進前是佇做啥物，結婚了後，就叫伊煮飯、洗衫，甚至放棄以前會曉的代誌，踮佇厝內做家庭主婦。那欲繼續做以前的頭路，就愛傷腦筋，家己想辦法。我講囡仔是魔鬼，予老母甘願放棄家己，雖然有囡仔予老母的人生足豐富是無毋著；猶閣「家庭」唌查某人跳入去，想欲有「幸福」的人生。毋過我懷疑這个「幸福」是誰人的？查某人家己有感覺幸福無？猶是伊佇幸福的同時，有遺憾無？

這馬，做老母了後，會使繼續上班，囡仔日時仔倩人𤆬，吃外口，厝內面嘛會使倩人摒掃，猶原是規工無閒𩑾𩑾。猶閣有，真濟代誌嘛愛有錢才會使。厝內面的工課毋是干焦煮飯、洗衫爾爾。有囡仔了後，愛放棄真濟家己的生活，這是無答案的代誌。

我毋知佇講啥？看有無？看一本囡仔的繪本，想誠濟。