我佇台北京站２位，佮便利商店共少年店員講台語；＋１
（2024.5.22.）
▓佇京站買保養品
頂禮拜，我去京站買一个物仔，是母親節的優惠時陣落勾，無買著的一項。
彼是我固定用的保養品，一年來買二、三擺，店員是輪班的，攏是少年的查某囡仔，我毋捌佮in開講，買好就走。
彼工，我入去，有幾若个人客，有一个店員來招呼我，我講：「我欲買一條洗面的。」伊問我：「你的空瓶有帶來嗎？」「有。」伊揣一个桌面予我囥我已經用完，提轉來回收的空矸仔，查我的戶頭，講猶有偌濟的購物金。
一時仔久，人客攏走了了，攏總有３个店員，留一个小可仔會曉講台語的佮我講話，雖然沒誠輪轉，嘛講會通。我問有人客講台語無？真少，伊講伊進前佮阿媽講台語，老母佮in講華語，我問這馬阿媽猶佇咧無? 無，過身十幾年矣！
我共伊講，有台文通寫，無曉的會使查教典，我講我的面冊嘛有我寫的，伊提出手機仔來查，想講「面冊」是一本冊的名，我講是「臉書」，查著我的面冊，馬上揤「追踪」。
講一睏仔了後，我就走。去超級市場，欲共我頂擺母親節買保養品提著的京站提貨券８百箍用掉。京站誠巧，自去年開始，佇保養品櫃位提著的券，袂使去買化妝品、內衫佮香氛產品，就是愛你去買別項的物仔。進前，無這个規定的時，保養品的店員攏先收扣掉會使領到的券的錢，開發票，叫我去換券，轉來直接共券予伊，就會使當場付較少錢，毋免下擺才閣來用券。
▓佇京站的超級市場
我無欲買其他的物件，只好去超級市場用掉。一入去，我共券提予櫃台的少年看，用台語先確定一下：「這會使用無？」伊共券掀倒面，講：「你要看背面，有到期日。」就是會使。
我揀幾仔項較輕的，會食著的焦料，提去結數，閣付幾十箍，共這件代誌辦完。遮的送的提貨卷，我感覺誠麻煩，提著嘛無歡喜，若共伊挕捒，無去換物仔轉來閣毋甘願拚損８百箍。
坐捷運的時，看手機仔，看著有人追踪我，佊个名就是逐擺有活動，抑是我的購物金咧欲到期的時陣，伊攏有用手機仔簡訊通知我彼个，誠拄好，拄著伊，進前毋捌看過。
▓台北的便利商店
閣進前２工，我辦完代誌出來，想欲揣一間咖啡廳啉咖啡，歇睏一下，大路邊看無咖啡廳，行過一間「全家」，有桌仔椅仔，干焦有一个人坐佇遐。我入去，選一个三角飯丸，去櫃台講：「我愛咖啡，細杯，美式，燒的。」「美式」講華語。伊講：「這個飯糰可以搭配中杯。」我講：「無愛，我愛細杯的。」
佇台北的店內，拄著少年的店員，台語嘛會通，真好。
▓我顧囡仔，予查某囝去立法院
昨昏暗，我幫查某囝顧囡仔，伊去立法院。早起的時陣，伊問我會使留到幾點？我講10點。欲暗仔，伊出門進前講伊八、九點就會轉來。我講：「你八、九點轉來上好，你這馬嘛無彼个體力留傷晏，你的任務是好好仔𤆬囡仔，嘛是對社會的貢獻。」囝婿有團練的課，徙去立法院邊仔上課，無叫伊幾點愛轉來。
我的工課是講台語、寫台文，共查某囝鬥相共顧囡仔。逐个人的工課無仝款。
10年前，太陽花學運開始幾仔工了後，我的第２查某囝共我講，日時仔的人較少，我若有閒，希望我日時仔去看覓，鬥人數。我講好，第２工我去。
我佇人鬆鬆的位，路中央有一寡人坐著，有人佇演講，我坐佇人行道邊仔，路邊小可仔懸起來的所在聽。袂記得我坐偌久，彼工轉去厝內隨發燒，可能我無合去彼種場所，就毋敢閣去。
