Tsit 久參加讀冊會，讀《台文通訊BONG報》前一站仔 ê 連載小說《符仔籙 Hû-á-lōo》，讀著一个詞「三寶身體 sann-pó sin-thé」，意思是身體虛 lám。身體虛 lám 哪著叫做「三寶」咧？興頭一下來，就來研究看覓。
根據公視台語台做過 ê 一條影片解說，tsit 種講法來源自臺中大甲。日本時代有保甲制度，大甲分做四个保，朝陽保（Tiau-iông-pó）、大甲保（Tāi-kah-pó）、順天保（Sūn-thian-pó）hām 孔門保（Khóng-mn̂g-pó）。1936年鎮瀾宮做醮，愛起四个壇。其中第三保順天保起 ê 壇，因為花木（hue-ba̍k，看註）無遐 hiánn 頭，古董嘛排上少，表現上䆀，三保 tsua̋nn 變做上尾名 ê 意思。Tsit 个講法用 tī 身體就變做講人足 lám 身。延伸閣有三保三（sann-pó-sann）ê 講法，就是䆀 ê 程度閣再加強，形容一个人／物件真差、真漚古。
大甲日本時代 ê 地圖。圖／公視台語台 YouTube 頻道
當時仔是按呢，毋是「三寶身體」，是「三保身體」tsiah 著！
閣研究--一-站-仔，我發現其實台灣各地攏有一保、二保、三保按呢 ê 名。親像保安宮重修碑記頂懸就有提起一保至三保 ê 管理人、董事等等--ê。維基百科大龍峒（大龍泵 Tuā-lông-pōng）保安宮 ê 條目有紹介 tsit 三个保各指佗一寡區域。嘉義義竹鄉 ê 各村簡介嘛有寫著當地有一保到五保 ê 舊地名。
愛注意 ê 是，tsit 个「三保」愛唸做 sann-pó，佮「手不動三寶」ê 「三寶 sam-pó」是無仝--ê。公視台語台影片內底 ê 口白遮就講了 tânn 去矣。若照教育部台語辭典 ê 解說，手不動三寶 ê 三寶是咧講金寶、銀寶佮錢寶，代表人食飯坩中 ng，毋免討趁就有 thang 食。
是按怎講「語言是文化 ê 底蒂」，就是講 tsit 片土地 ê 歷史、文化，ē 自然刻 tī 語言內底。對形容人身體䆀 ê 詞 ē-tàng 牽到日本時代 ê 保甲制度，kám 毋是足奇巧--ê？
註：花木（hue-ba̍k）是引用影片內底民俗專家 ê 講法，意思是醮壇燈點起來 ê 款式，影片字幕寫做「花目」。
