『順眼』台語按怎講？

『順眼』tsit 个詞台語應該按怎講 khah 好勢咧？當然，現代人「sūn-gán」uân-nā 讀甲慣勢慣勢矣，毋過咱若去 píng 過去 ê 字典就 ē 知影，古早時恐驚是無 tsit 个講法。按呢台語自底有啥乜仝款意思 ê 詞彙咧？

咱凡勢 ē-tàng 講「佮目 kah-ba̍k」。咱若去 píng 台日大辭典，「合目 kah-ba̍k」是佮意 ê 意思。閣參考教育部台語字典，看袂著「佮目」，毋過揣 ē 著「佮喙」，解說是食起來口味有合。仝一个道理，「佮目」咱差不多 ē-tàng 想做是看著口味有合。

有一句俗語話是按呢講--ê：「廣東目鏡，隨人佮目。」意思是講，逐个人看仝一層代誌，隨人有無仝 ê 想法，就親像一副目鏡，有 ê 人掛有合，有 ê 人就無。

意思是無問題，毋過哪 ē 是「廣東」咧？參考台語社團社友胡榮一 ê 講法，廣州是中國南方目鏡行業上早發達 ê 城市。無遐發展 ê 所在，老人咧做針黹（tsiam-tsí）ê 時，會佮厝邊借目鏡。毋過一副目鏡毋是逐个人攏有合，目鏡框闊抑狹、長抑短，目鏡仁 ê 度數，隨人攏無仝，毋 tsiah ē 流傳 tsit 句話。