媽媽心裏的燈籠- 廣東話兒童廣播劇
（本文以廣東話書寫，完整聲音版連結請見文末）
第一場：中秋前夕下午
旁白：就嚟又到一年一度嘅中秋節啦，婆婆一早就買咗諾諾最鐘意嘅公仔燈籠送俾佢，不過諾諾就望住個燈籠扁晒咀喎
爸爸：諾諾，做乜咁唔開心呀？你唔係話好鐘意呢個燈籠㗎咩？
諾諾：Daddy，你尋日咪話今年中秋節咁啱係媽咪生日嘅，咁我諗緊不如送一個中秋節燈籠俾媽咪做生日禮物
爸爸：呢個主意幾好喎！
諾諾：但係我諗嚟諗去，都諗唔到媽咪鍾意啲乜嘢公仔呀，Daddy 你知唔知呀
爸爸：……我唔知喎⋯⋯Daddy 細個中秋節淨係鐘意玩蠟燭同「煲蠟⋯」（馬上改口）啊！～竟然我哋都唔知，咁不如直接問媽咪啦？
諾：緊係唔得啦！就咁問，咪無晒驚喜囉！um… 邊個會知道媽咪鍾意咩燈籠呢？呀～～可以問吓婆婆喎！Daddy，你幫我打俾婆婆吖！
爸：吓? er⋯⋯要打俾外母吖⋯⋯
諾：快啲啦～～
爸：⋯⋯好啦好啦⋯
（電話響）
婆：喂，阿傑？又會係你打嚟嘅？
爸：（尷尬）係呀，外母⋯啊諾諾有嘢想問你丫（即刻推個電話俾諾諾）
諾：婆婆！～
婆：哦！諾諾～
諾：婆婆丫，你知唔知媽咪最想要啲咩燈籠㗎？
婆：吓？突然間咁問嘅？
諾：因為今年媽咪生日咁啱係中秋節丫嘛，我想送個燈籠俾佢做生日禮物丫
婆：哦！諾諾真係乖喇。um… 你媽咪鐘意啲咩燈籠丫⋯⋯啊，細個佢經過啲紮作舖，會金睛火眼望住人哋啲金魚燈籠，不過嗰陣我哋無咁多錢，淨係會買啲普通嘅紙燈籠嚟玩
諾：我知我知！所以媽咪鐘意嗰啲⋯係透明紙造嘅『大尾巴金魚』燈籠！
爸：嗰啲叫玻璃紙丫
諾：唔緊要啦～我哋依家知道喇！（興奮地）可以去買燈籠俾媽咪喇！
婆：吖，不過，又有一年中秋，你媽咪嘅美勞堂又畫咗一隻白兔仔燈籠，貼咗係床頭成年喎
諾：吓？又變咗白兔仔？咁究竟係金魚燈籠定白兔仔燈籠丫⋯⋯
爸：咁⋯一係兩款都買晒喇，咁可以話（諗到鬼主意，可以慳返唔洗諗禮物俾老婆）一隻係諾諾你送嘅，另一隻係爸爸我送嘅。你再喺個燈籠上面寫住『媽媽生日快樂』，咁就係獨一無二嘅燈籠喇！你媽咪一定好開心！
婆：獨一無二？啊～ 我『醒起』喇！
（以下三人說話為碎咀，咿咿吟吟，製造後來故事嘅伏筆）
婆：咁咁咁～～ 應該係咁咁咁
諾：嗯嗯嗯！！
爸：哦～～哦哦哦！
第二場：中秋當晚
旁：話咁快就到咗中秋節嗰一晚喇， 媽咪擺緊月餅同埋應節嘅水果出嚟，爸爸都啱啱沖好涼
爸： 嘩，今年嘅中秋水果又大又靚喎
媽： 係呀，不過今日除咗係中秋之外，你仲記唔記得係咩日子㗎
爸：（扮嘢）係喎，係老婆大人你生日喎！我唔記得咗添，咁唯有將啲中秋節蠟燭插落個月餅到，當生日蛋糕啦
媽：咁都得？
爸：講笑咋，就算我唔記得你生日，個女都唔會唔記得啦。你睇？
旁：諾諾，小心翼翼咁樣拎個蛋糕出嚟
諾：媽咪，生日快樂！
媽：嘩！個蛋糕好靚呀，係媽咪最鐘意嘅芒果蛋糕丫！
諾：Daddy，都話媽咪鍾意芒果蛋糕，唔係朱古力蛋糕㗎啦
爸：係喇，最叻係你啦。好啦！媽咪，快啲吹蠟燭許願啦！枝蠟燭就嚟溶晒喇
媽：好啦～（吹蠟燭聲）呼～
爸、諾：（拍手）好耶
諾：Daddy、Daddy，生日禮物呢？
爸：啊！係喎，嗱！
媽：（驚喜，又疑惑）哩個係？柚皮燈籠？
爸：諾諾話今年你生日係中秋節要送個燈籠俾你做生日禮物，我哋同外母一齊諗咗好耐，先決定到係柚皮燈籠㗎。
諾：婆婆話，以前每一年中秋節，公公都會整柚皮燈籠，你就會喺燈籠上面畫公仔。依家就等我同 Daddy 負責整嚟送俾你啦！
媽：（眼泛激光）傻妹！多謝你丫，媽咪好鐘意、好鐘意呢份禮物吖！
諾：好嘢！
爸：好喇～不如我哋一齊拎住蛋糕、月餅同燈籠影相啦
諾：啊！等埋我呀，我要拎埋我個燈籠影相呀 （跑走聲）
媽：（同老公）都係阿囡最有我心，咁⋯你份生日禮物呢？
爸：吓？個⋯柚皮燈籠我有份整㗎，我負責切開個「碌柚」、又要拮窿、又串繩㗎
媽：但係個燈籠上面淨係寫住「媽咪，生日快樂，諾諾上」咋喎，都無你個名。所以，你重差我一份禮物呀～
（音樂漸入，人聲漸細）
爸：吓？！⋯⋯咁我俾返啲碌柚肉你，當做生日禮物得唔得呀？
媽：哼～（唔理老公）好喇～諾諾拎埋燈籠，可以影相喇！
爸：老婆丫⋯⋯
媽/諾：1、2、3 笑～
媽/諾/爸：（對鏡頭笑出聲）嘻～
（背景音樂漸大，相機咔嚓聲）
柚皮燈籠（圖片來自香港 01）
廣東話兒童Podcast
🌀 乜東東．豎起耳仔窿 🌀
～ 為 6-12歲小朋友而設嘅廣東話 Podcast
～ 專題故仔、世界趣聞、故事劇場、IQ題、小製作人投稿分享
～ 隔週四更新
Instagram: @muggle.tingo.tango
Facebook: 乜東東～豎起耳仔窿
