【E暗食啥貨】卵︱Nn̄g

各位線頂ê聽眾朋友，Ta̍k-ê平安，ta̍k-ê好，歡迎收聽做工á人phá-kheh-su̍h-to͘h。

無閒kui日，khang-khòe結束轉到厝，總--是ē ǹg望kā俗事hē--leh，好好á食1頓輕鬆ê飯，ta̍uh-ta̍uh-á食，慢慢á話，kah厝--ni̍h ê ta̍k-ê，ōe看今á日ê日子過tio̍h啥款？

Ah，飯煮好--ah，菜iáu leh款，無我mā來tàu-saⁿ-kāng。Chit ê時間，mā差不多beh食暗--ah，厝--ni̍h ê人ē隨ê sóa來客廳chia活動。「Lín kám beh食卵？」「Beh--o͘h！」好，來煎卵。

冰箱to̍h tī gá-suh爐ê對面，先the̍h幾粒á卵--出-來，liam-mi to̍h beh料理。Che卵beh煎，ûn-ná有真chē變化neh！Nā講tio̍h蔥á卵，做法to̍h真簡單，seng khà幾粒卵落去碗公，蔥á the̍h--1-2-枝，切珠，khǹg去碗公，摻kóa鹽，hē kóa豆油，phah ho͘ sòaⁿ。Che鹹chiáⁿ to在人kah意，ta̍k ê人ê口味無kâng。鼎nā jia̍t，咱tú-chiah chhiau好ê料to̍h ē-tàng落鼎煎，chit-chūn，你to̍h斟酌ka看，seng kah鼎面接觸--tio̍h ê卵，真緊to̍h ē熟，m̄-koh khah頂面ê卵koh ē湯湯，chit-má，ē-tàng kā已經熟ê卵，用tī a̍h是煎匙ka póe去1 pêng，鼎sió ka gia̍h ho͘ chhu-chhu，hō͘湯湯ê部份，ē-tàng流過空--出-來ê鼎面煎，to̍h án-ne一直照chit-lō版路ka處理，尾--á，鼎--ni̍h ê卵，to̍h lóng ē變kah膏膏tēng-tēng ê形，chit時，to̍h ē-tàng péng-pêng繼續煎，chit-chūn，nā像我chit款有練--過ê o͘-chí-sáng，免用煎匙thuh，手1 ê屈勢，出1 ê力，卵to̍h ē飛tī空中pha-liàn-táu，koh ē用真súi ê姿勢落鼎，ah，害--ā，練無夠，落鼎失敗，卵去ho͘破做3-4 pêng，咱nā tú tio̍h án-ne ê狀況，人to̍h ài冷靜，ài假做像he無tāi-chì án-ne，緊用煎匙koh kā卵thuh做夥，看koh會赴ka粘做1塊完整--ê-無，人nā變做o͘-chí-sáng有1 ê好--處，工夫無的確ē kài gâu，m̄-koh面皮一般lóng ē變kah khah厚。話koh講倒 --轉-來，卵nā煎kah雙pêng lóng sió-khóa-á赤赤，豆油kah蔥á ê芳to̍h ē chhèng--出-來，chit-chūn to̍h差不多ē-tàng起鼎--ah，煎jú久卵to̍h jú tēng，m̄-koh豆油kah蔥á ê phang khùi mā ē變kah jú明，起鼎ê時機隨在人kah意ka-tī節。有ê人無ài hē豆油，講卵看--起-來ē khah烏，m̄-koh，我ka-tī是真kah意豆油過炒ê氣味。

Nā是講菜脯卵，做法mā kah蔥á卵差不多，精差tī菜脯切ho͘幼了後，ài seng浸水，nā無，有ê菜脯真正是鹹tok-tok，到時to̍h ē變做挾1塊á卵，配kui大碗飯。Che菜脯浸水ài浸jōa久？一般我ê辦法，是浸--1-chām-á to̍h the̍h 1塊起來試鹹汫，感覺差不多--a，chiah kah卵chhiau做夥。一般菜脯卵teh chhiau料，我to̍h無koh lām鹽kah豆油--ā，靠菜脯本身ê鹹to̍h有夠。

Che菜脯卵kah蔥á卵，咱nā去khah tiōng手路ê店食，in一般ē hē真chē油，煎-出--來卵圓koh厚，食--起-來koh酥酥，phang頭真有，真好食，m̄-koh，chit-má chit ê時代，khah講究油mài用hiah重，beh kā卵煎kah圓koh厚，工夫mā to̍h ài真老到，我che凊彩食凊彩大--ê，揀he食ē ha̍h koh簡單做ê方式to̍h好！

Sui-bóng我到taⁿ講kah hiah chē，m̄-koh chit-má我tng-teh煎--ê，是卵包。無法度，節目nā beh做，人to̍h bē-tàng無厚話。Nā是leh煎卵包，我siāng愛kā卵仁煎kah 1-sut-á熟to̍h好，大概是煎kah gia̍h tī ka tu̍h--1-ē， to̍h ē流--出-來ê狀況，第1，看卵仁ta̍uh-ta̍uh-á流--出-來，khí-mo͘ kài giang，第2，án-ne mā kài好食！Beh kā卵煎kah chit-lō款，我ē kā卵先ùi冰箱the̍h出來退冰，咱siōng好是用kah室內溫度差不多ê卵去煎ē khah好煎，卵nā siuⁿ冰，卵頂下teh熟ê速度ē差真chē，下面--ê卵熟kah強beh臭乾，頂面--ê卵清koh水水，tēng ê部分siuⁿ少，beh péng-pêng ē khah oh，無péng koh ē煎kah臭乾，hit-chūn to̍h進退兩難--lo͘h。

咱beh煎，kāng款鼎hē油ho͘ jia̍t，ûn-ûn-á火to̍h好，今á日ê卵包我想beh ka煎ho͘白phau-phau koh幼mi-mi，火to̍h m̄-thang開siuⁿ iām，卵nā beh khà，咱ē-tàng先予卵清落鼎，卵仁chiah對卵清ê正中央ho͘ --落-去，án-ne煎--起-來khah súi，卵lóng loeh--ah，chit時to̍h ē-tàng用煎匙kā he烏白走ê卵清póe去中央，ta̍uh-ta̍uh-á kā卵ê形khioh ho͘圓圓，ná聽油鼎chhu̍h-chhu̍h叫ê聲，ná注意講卵通好péng-pêng--ā-無？Beh péng-pêng to̍h ài真細膩ŏ͘，m̄-thang siuⁿ粗魯，這時ê卵仁koh是chheⁿ--ê，siuⁿ大力to̍h破--去，to̍h輕輕--a，ta̍uh-ta̍uh-á好禮á ka péng--過，péng--過了後to̍h ài注意時間--a，免jōa久to̍h ē-tàng起鼎，主要to̍h是beh kā猶未熟ê卵清，koh有卵仁ê表面煎ho͘熟，jōa久to̍h ài ka-tī chat，用心感受，nā koh ài算看幾秒幾秒，án-ne to̍h無浪漫--ā。

講to̍h ài講kài久，nā真正leh煎，1粒卵是真緊to̍h煎ē好--ah，1人1粒算kah tú-tú-á好，ka phâng去飯桌。看看--leh，siāng尾1齣菜mā處理好--ah，「食飯o͘h！隨人去添飯haⁿh！」

坐好勢，tú添好ê飯koh tng-teh chhèng煙，ngeh 1粒卵包hē tī碗--ni̍h，lâm kóa豆油tī卵頂面，tī gia̍h--leh kā卵仁chhiám--落-去，看he卵仁膏膏，ta̍uh-ta̍uh-á流--出-來，流去飯--ni̍h，kā飯染kah黃gìm-gìm，碗phâng--起-來飯ka pe--lòe，ûn-ûn-á pō͘，卵kah豆油kah飯ê氣味lóng lām tī嘴--ni̍h，喔，讚！起毛有夠giang，che有影是幸福ê滋味！

食飽bē？你e暗食啥貨？食tio̍h kám有心適？食tio̍h有歡喜--無？

感謝各位聽眾朋友來收聽goán chit ê節目，goán今á日ê節目to̍h放送到chia，期待後禮拜咱koh tī空中再相會ŏ͘！

Kok-ūi sòaⁿ-téng ê thiaⁿ-chiòng pêng-iú, ta̍k-ê pêng-an, ta̍k-ê hó, hoan-gêng siu-thiaⁿ Chò-kang-á-lâng phá-kheh-su̍h-to͘h.

Ta̍k-ji̍t kho̍k-kho̍k-chông, kui-kháu-chàu sū-lông-kang-siong sûi-lâng khì, tha̍k-chheh--ê tha̍k-chheh, chò-kang--ê chò-kang, ū châi-tiāu chò-hóe chia̍h--ê, tāi-khài mā chhun àm-tǹg chit tǹg niâ, m̀, e-àm beh chia̍h sáⁿ-hòe? Che ū-sî, mā sī kài pháiⁿ kâng ìn ê būn-tê neh!

Bô-êng kui ji̍t, khang-khòe kiat-sok tńg kàu chhù, chóng--sī ē ǹg-bāng kā sio̍k-sū hē--leh, hó-hó-á chia̍h 1 tǹg khin-sang ê pn̄g, ta̍uh-ta̍uh-á chia̍h, bān-bān-á ōe, kah chhù--ni̍h ê ta̍k-ê, ōe khòaⁿ kin-á-ji̍t ê ji̍t-chí kòe tio̍h siáⁿ-khoán?

Ah, pn̄g chú hó--ah, chhài iáu leh khoán, bô góa mā lâi tàu-saⁿ-kāng. Chit ê sî-kan, mā chha-put-to beh chia̍h-àm--ah, chhù--ni̍h ê lâng ē sûi ê sóa lâi kheh-thiaⁿ chia oa̍h-tāng. “Lín kám beh chia̍h nn̄g?” “Beh--o͘h!” Hó, lâi chian nn̄g.

Peng-siuⁿ to̍h tī gá-suh-lô͘ ê tùi-bīn, seng the̍h kúi-lia̍p-á nn̄g--chhut-lâi, liam-mi to̍h beh liāu-lí. Che nn̄g beh chian, ûn-ná ū chin chē piàn-hòa neh! Nā kóng tio̍h chhang-á-nn̄g, chò-hoat to̍h chin kán-tan, seng khà kúi lia̍p nn̄g lo̍h-khì óaⁿ-kong, chhang-á the̍h--1-2-ki, chhiat-chu, khǹg khì óaⁿ-kong, chham kóa iâm, hē kóa tāu-iû, phah ho͘ sòaⁿ. Che kiâm-chiáⁿ to chāi lâng kah-ì, ta̍k ê lâng ê kháu-bī bô kâng. Tiáⁿ nā jia̍t, lán tú-chiah chhiau hó ê liāu to̍h ē-tàng lo̍h tiáⁿ chian, chit-chūn, lí to̍h chim-chiok ka khòaⁿ, seng kah tiáⁿ-bīn chiap-chhiok--tio̍h ê nn̄g, chin kín to̍h ē se̍k, m̄-koh khah téng-bīn ê nn̄g koh ē thng-thng, chit-má, ē-tàng kā í-keng se̍k ê nn̄g, iōng tī a̍h-sī chian-sî ka póe khì 1 pêng, tiáⁿ sió ka gia̍h ho͘ chhu-chhu, hō͘ thng-thng ê pō͘-hūn, ē-tàng lâu kòe khang--chhut-lâi ê tiáⁿ-bīn chian, to̍h án-ne it-ti̍t chiàu chit-lō pán-lō͘ ka chhú-lí, bóe--á, tiáⁿ--ni̍h ê nn̄g, to̍h lóng ē piàn kah ko-ko tēng-tēng ê hêng, chit-sî, to̍h ē-tàng péng-pêng kè-sio̍k chian, chit-chūn, nā chhiūⁿ góa chit-khoán ū liān--kòe ê o͘-chí-sáng, bián iōng chian-sî thuh, chhiú 1 ê khut-sè, chhut 1 ê la̍t, nn̄g to̍h ē poe tī khong-tiong pha-liàn-táu, koh ē iōng chin súi ê chu-sè lo̍h tiáⁿ, ah, hāi--ā, liān bô-kàu, lo̍h tiáⁿ sit-pāi, nn̄g khì ho͘ phòa chò 3-4 pêng, lán nā tú tio̍h án-ne ê chōng-hóng, lâng to̍h ài léng-chēng, ài ké-chò chhiūⁿ he bô tāi-chì án-ne, kín iōng chian-sî koh kā nn̄g thuh chò-hóe, khòaⁿ koh ē-hù ka liâm chò 1 tè oân-choân--ê-bô, lâng nā piàn-chò o͘-chí-sáng ū 1 ê hó--chhù, kang-hu bô tek-khak ē kài gâu, m̄-koh bīn-phôe it-poaⁿ lóng ē piàn kah khah kāu. Ōe koh kóng tò --tńg-lâi, nn̄g nā chian kah siang-pêng lóng sió-khóa-á chhiah-chhiah, tāu-iû kah chhang-á ê phang to̍h ē chhèng--chhut-lâi, chit-chūn to̍h chha-put-to ē-tàng khí tiáⁿ--ah, chian jú kú nn̄g to̍h jú tēng, m̄-koh tāu-iû kah chhang-á ê phang khùi mā ē piàn kah jú bêng, khí-tiáⁿ ê sî-ki sûi-chāi lâng kah-ì ka-tī chat. Ū ê lâng bô ài hē tāu-iû, kóng nn̄g khòaⁿ--khí-lâi ē khah o͘, m̄-koh, góa ka-tī sī chin kah-ì tāu-iû kòe chhá ê khì-bī.

Nā-sī kóng chhài-pó͘-nn̄g, chò-hoat mā kah chhang-á-nn̄g chha-put-to, cheng-chha tī chhài-pó͘ chhiat ho͘ iù liáu-āu, ài seng chìm chúi, nā bô, ū ê chhài-pó͘ chin-chiàⁿ sī kiâm-tok-tok, kàu-sî to̍h ē piàn-chò ngeh 1-tè-á nn̄g, phòe kui tōa óaⁿ pn̄g. Che chhài-pó͘ chìm-chúi ài chìm jōa-kú? It-poaⁿ góa ê pān-hoat, sī chìm--1-chām-á to̍h the̍h 1 tè khí-lâi chhì kiâm-chiáⁿ, kám-kak chha-put-to--a, chiah kah nn̄g chhiau chò-hóe. It-poaⁿ chhài-pó͘-nn̄g teh chhiau liāu, góa to̍h bô koh lām iâm kah tāu-iû--ā, khò chhài-pó͘ pún-sin ê kiâm to̍h ū kàu.

Che chhài-pó͘-nn̄g kah chhang-á-nn̄g, lán nā khì khah tiōng chhiú-lō͘ ê tiàm chia̍h, in it-poaⁿ ē hē chin chē iû, chian--chhut-lâi nn̄g îⁿ koh kāu, chia̍h--khí-lâi koh so͘-so͘, phang-thâu chin ū, chin hó chia̍h, m̄-koh, chit-má chit ê sî-tāi, khah káng-kiù iû mài iōng hiah tāng, beh kā nn̄g chian kah îⁿ koh kāu, kang-hu mā to̍h ài chin láu-tàu, góa che chhìn-chhái chia̍h chhìn-chhái tōa--ê, kéng he chia̍h ē ha̍h koh kán-tan chò ê hong-sek to̍h hó!

Sui-bóng góa kàu taⁿ kóng kah hiah chē, m̄-koh chit-má góa tng teh chian--ê, sī nn̄g-pau. Bô-hoat-tō͘, chiat-bo̍k nā beh chò, lâng to̍h bē-tàng bô kāu-ōe. Nā sī leh chian nn̄g-pau, góa siāng ài kā nn̄g-jîn chian kah 1-sut-á se̍k to̍h hó, tāi-khài sī chian kah gia̍h tī ka tu̍h--1-ē, to̍h ē lâu--chhut-lâi ê chōng-hóng, tē 1, khòaⁿ nn̄g-jîn ta̍uh-ta̍uh-á lâu--chhut-lâi, khí-mo͘ kài giang, tē 2, án-ne mā kài hó chia̍h! Beh kā nn̄g chian kah chit-lō khoán, góa ē kā nn̄g seng ùi peng-siuⁿ the̍h chhut-lâi thè-peng, lán siōng hó sī iōng kah sek-lāi un-tō͘ chha-put-to ê nn̄g khì chian ē khah hó chian, nn̄g nā siuⁿ peng, nn̄g téng-ē teh se̍k ê sok-tō͘ ē chha chin chē, ē-bīn--ê nn̄g se̍k kah kiōng-beh chhàu-ta, téng-bīn--ê nn̄g-chheng koh chúi-chúi, tēng ê pō͘-hūn siuⁿ chió, beh péng-pêng ē khah oh, bô péng koh ē chian kah chhàu-ta, hit-chūn to̍h chìn-thè-lióng-lân--lo͘h.

Lán beh chian, kāng-khoán tiáⁿ hē iû ho͘ jia̍t, ûn-ûn-á-hóe to̍h hó, kin-á-ji̍t ê nn̄g-pau góa siūⁿ-beh ka chian ho͘ pe̍h-phau-phau koh iù-mi-mi, hóe to̍h m̄-thang khui siuⁿ iām, nn̄g nā beh khà, lán ē-tàng seng hō͘ nn̄g-chheng lo̍h tiáⁿ, nn̄g-jîn chiah tùi nn̄g-chheng ê chiàⁿ-tiong-ng ho͘ --lo̍h-khì, án-ne chian--khí-lâi khah súi, nn̄g lóng loeh--ah, chit-sî to̍h ē-tàng iōng chian-sî kā he o͘-pe̍h cháu ê nn̄g-chheng póe khì tiong-ng, ta̍uh-ta̍uh-á kā nn̄g ê hêng khioh ho͘ îⁿ-îⁿ, ná thiaⁿ iû-tiáⁿ chhu̍h-chhu̍h-kiò ê siaⁿ, ná chù-ì kóng nn̄g thang-hó péng-pêng--ā-bô? Beh péng-pêng to̍h ài chin sè-jī ŏ͘, m̄-thang siuⁿ chho͘-ló͘, chit-sî ê nn̄g-jîn koh sī chheⁿ--ê, siuⁿ tōa-la̍t to̍h phòa--khì, to̍h khin-khin--a, ta̍uh-ta̍uh-á hó-lé-á ka péng--kòe, péng--kòe liáu-āu to̍h ài chù-ì sî-kan--a, bián jōa kú to̍h ē-tàng khí-tiáⁿ, chú-iàu to̍h sī beh kā iáu-bōe se̍k ê nn̄g-chheng, koh ū nn̄g-jîn ê piáu-bīn chian ho͘ se̍k, jōa kú to̍h ài ka-tī chat, iōng sim kám-siū, nā koh ài sǹg khòaⁿ kúi bió kúi bió, án-ne to̍h bô lōng-bān--ā.

Kóng to̍h ài kóng kài kú, nā chin-chiàⁿ leh chian, 1 lia̍p nn̄g sī chin kín to̍h chian ē hó--ah, 1 lâng 1 lia̍p sǹg kah tú-tú-á-hó, ka phâng khì pn̄g-toh. Khòaⁿ-khòaⁿ--leh, siāng-bóe 1 chhut chhài mā chhú-lí hó--ah, “Chia̍h-pn̄g o͘h! Sûi-lâng khì thiⁿ-pn̄g haⁿh!”

Chē hó-sè, tú thiⁿ hó ê pn̄g koh tng-teh chhèng ian, ngeh 1 lia̍p nn̄g-pau hē tī óaⁿ--ni̍h, lâm kóa tāu-iû tī nn̄g téng-bīn, tī gia̍h--leh kā nn̄g-jîn chhiám--lo̍h-khì, khòaⁿ he nn̄g-jîn ko-ko, ta̍uh-ta̍uh-á lâu--chhut-lâi, lâu khì pn̄g--ni̍h, kā pn̄g ní kah n̂g-gìm-gìm, óaⁿ phâng--khí-lâi pn̄g ka pe--lòe, ûn-ûn-á pō͘, nn̄g kah tāu-iû kah pn̄g ê khì-bī lóng lām tī chhùi--ni̍h, o͘h, chán! Khí-mo͘ ū-kàu giang, che ū-iáⁿ sī hēng-hok ê chu-bī!

Chia̍h pá bē? Lí e-àm chia̍h sáⁿ-hòe? Chia̍h tio̍h kám ū sim-sek? Chia̍h tio̍h ū hoaⁿ-hí--bô?

Kám-siā kok-ūi thiaⁿ-chiòng pêng-iú lâi siu-thiaⁿ goán chit ê chiat-bo̍k, goán kin-á-ji̍t ê chiat-bo̍k to̍h hòng-sàng kàu chia, kî-thāi āu lé-pài lán koh tī khong-tiong chài siong-hōe ŏ͘!