本底掠做 gún 翁愛食西洋萵仔菜 ê 因由是大碗閣滿墘，押尾發見伊佮意食這味 kan-ta 因為我人無 tī 遮這味是上好處理 ê 菜蔬就開始大大典典遮試遐試，搪著伊成做茶鈷呻「彼足食塗，愛洗」隨好笑神紲話「大丈夫，我洗，免驚。」
烏露戰爭開始，德國欠電閣欠水 hōo 𠢕欶水 ê 西洋萵仔 mā 框金，一路按若跤球大細 0.59€/粒漲懸價甲若女子棒球大細 ê 1.59€/粒 hōo 我 ê 耳空清悠甲 tsín。
今年穀雨本底漲懸價 ê 瓜仔哖、Kam-má-tooh、番薑仔等等屬好鬥陣價數 ê 菜蔬又閣踅翻頭轉來到烏露戰爭進前 ê 價數，唯獨西洋萵仔菜猶原徛懸價 hōo 我又閣閒甲掠蝨母不三時行去超市 hui-hui 蹓蹓看伊 ê 銷路，烏露戰爭進前見交伊相拄搪是賰無好幾粒媠通揀，烏露戰爭到今是見交伊相拄搪伊敢若按媠囥甲䆀，紲落來規陣送去敗價區卸貨底。猶原漲懸價 ê 伊準做換牌價做促銷猶是稀微，無啥人 bueh 交觀。一直到頂禮拜 m̄ 知是財團包贌甲倒貼抑是 uī-tio̍h 摒貨底價數落價甲一粒 0.89€ 大細若跤球，喙斗牽 m̄ 行，價數牽溜溜行隨揀一粒轉來囥，囥甲伊看我 buē 生菇，我看伊阿菇大四界，齷齪，隨上網海請教網路眾大神賜我智慧，押尾發見猶是家己 ê 部落格較好請教。2021.11.19 我捌記錄一篇敆荷蘭豆仁、紅菜頭、番麥 ê 五彩西洋萵仔菜生菜盤，彼張相片這久嫌伊䆀 tsi-tsi 愛換新拄好會使得徙來遮使用，彼久 ê 番麥這久欠貨，換林檎滿山坪...我痟貪軁雞籠，罕得食林檎見著無著時 ê 林檎凡勢 uī-tio̍h 摒二等貨底所致一公斤賰無到 1€ ê 0.89€，隨無要意彼一袋三公斤愛食甲底時，捾一袋轉來，押尾阿羅按合作社又閣𢯾一箱福利林檎 hōo 我，疊甲比玉山閣較懸 ê 林檎山拄拄好會使得做生菜盤。
這斗處理西洋萵仔菜，我想著捌看人用刀切絲隨上網請教眾大神敢有這个手路，網路眾神真聖一跋跤隨聖杯，就順這个方法處理西洋萵仔菜，那切那叨撚家己呔會遮爾仔頇顢 m̄ 較早學這招。刀仔切西洋萵仔菜，形 m̄-nā 仔媠閣緊。
早起頓款好請翁做陣來食飯，一看著久年不見 ê 西洋萵仔菜，伊笑講「お 元気 ですか？」
「你中毒傷深」我笑應。
聽 Podcast 罕得翻頭自第一集，不過 Hái！佇遮啦 hōo 我步頻有耐性願意踅翻頭按第一集開始聽，因為按呢 m̄ 捌日語 ê gún 翁 mā 知影節目頭句 ê お 元気 ですか是啥物意思。
我 tuì Hái！佇遮啦 ê 第一斗印象無好，因為彼集洘旱甲 hōo 我無耐性揣水源，準做伊是講我 ê 城市。押尾有機會交伊再次 tī Podcast 相拄搪，凡勢是我捌聽過 ê 臆你佮意，這斗 ê 臆你佮意 kā 我 ê 耳空吸牢牢，隨按無訂閱成做訂閱者並翻頭揣第一集開始聽到今。
我 tuì 西洋萵仔菜 ê 意受宛然收聽 Hái！佇遮啦 ê 態度，因為內克 ê 對談者 hōo 我成做忠實聽眾，西洋萵仔菜因為林檎 hōo 我願意接續請教網路眾神西洋萵仔菜 ê 菜譜，準做伊猶原 m̄ 是我上意愛 ê 萵仔菜。
