To be ignorant of History is to be always a Child➀
一个 tuì 歷史懵懂(Bóng-tóng) ê 人永遠是囡仔
von Cicero跤踏這塊土地卻 m̄ 捌這塊土地是一件真龜怪 ê 代誌，總是我 ê 龜怪佮其他角勢比並，窮實無算啥物。我知影按呢比並悲慘是一件真無仝理心 ê 態度，總是換另外一个樂觀 ê 角度來看這个「悲劇」猶是一件「喜劇」，起因我 teh 讀歷史翻草歷史 m̄ 是 kan-na ē 曉 hőng 飼佮等人育飼 ê 囡仔。
我 m̄ 捌這本冊，總是我相信冊交人相𫝛齊 ē 互相替人牽紅線。讀《語言學家破解台語》ê 作者紹介，我認捌著作者其他作品隨上台灣e店揣冊，紲落來 Es sollte so sein 鉛粉掖有夠額 hōo 我有機會跟綴這本小說行入雺煙散霧 ê 臺灣歷史。
《一桶蚵仔》是小說 mā 是我 tuì 臺灣歷史 ê 補記像陳雷（吳景裕醫師） ê《鄉史補記》、《歸仁阿媽》、《阿春無罪》、《紅牡丹》等等齊屬於吳醫師伊彼个年間 ê 記憶，m̄ 是獨屬少少一陣人利用𪜶 ê 職權傳播𪜶認捌佮合意 ê 歷史人物 hâm 事件。
我真佮意陳醫師 tī 台語文學系列講座 -- 開講台文創作 -- 我ê台文路/陳雷 ê 一段話，大概仔 ê 意思是：
每一个人有伊家己 ê 年間，我 ê 年間較沈重，寫 ê 文章 mā 較沈重...
這久 ê 年間佮我 ê 年間無相𫝛，所致寫作 mā 沓沓仔 ē 行向無仝 ê 路途，成做無仝 ê 年間記錄...
第一斗接觸吳醫師 ê 作品，我無法度理解李勤岸教授所寫 ê 序，迵過 YouTube 聽吳醫師分張伊 ê 寫作過程，我 kā 家己認捌 ê 歷史囥一邊 hōo 家己成做大水柴跟綴洋流泅過彼爿泅過這爿，然後化身三文魚跟綴記持泅入家鄉。
第一斗認捌 228 是前總統陳水扁先生執政 ê 年間，彼陣 ê 我 tuì 228 有一種反抗，彼種反抗有我自本就討厭 ê 議題，外省人交本省人。所致見聽著 228 耳空自動消音 tshan-tshiūnn 朋友鼓勵我愛投票 hōo 芋仔幫，因為 gún 爸爸是芋仔。我討厭這款選舉咱是家己人，選舉了咱是生份人 ê 六月芥菜假有心。簡單一句我討厭自囡仔時就愛分族群 ê 慣勢。起因我清清楚楚知影我是佗落人，這个人無牽涉著 gún 芋仔爸 ê 起源 mā 無牽涉過烏水溝來臺灣到 gún 媽媽彼代是第九代 ê 番薯，我就是這粒島 ê 住民所栽出來 ê 芋仔番薯。
1950出版 ê《一桶蚵仔》m̄ 知有偌 tsuē 臺灣人讀過伊，讀過伊 ê 人又閣是啥物感覺。M̄ 捌行過白色恐佈年代 ê 我 tuì 李流、寶玉佮𪜶小弟比利 ê 人生經歷無 tshan-tshiūnn 閱讀《邦查女孩》古阿霞 uī-tio̍h hōo 帕吉魯保持精神 kā 藏好好 ê 悲傷妝娗做一个故事講 hōo 伊 hâm 其他在場 ê 人做伙聽所發 ê 水泱閣較大。總是一路按波蘭讀到波羅的海 3 國，聽當地人分張𪜶按怎 hőng 外埠人強迫成做𪜶 ê 烏面賊到準做有家己 ê 烏面賊，𪜶猶是無才調保證屬於家己 ê 烏面賊永遠 ē 交家己徛做伙，不而過這个現象交吳景裕醫師分張 ê 寫作過程相𫝛 mā 交我相𫝛，我 tuì 歷史有共嗚需要按家己 ê 成長背景開始觸著心 tsiah 有才調 hōo 家己沓沓仔成做三文魚泅入記持 ê 家鄉。像《邦查女孩》作者甘耀明「嗚謝」寫 ê 這段話：
是緣份使我們以文字在小說裡的必然遭逢，是她帶我走過無數的小說情節與冒險，歷經逃離、環島、登山與伐木林場的驚駭，看見她離去的背影，有著難以言詮的感受。願眾神祝福這塊土地上的古阿霞們，以及帕吉魯們。
西方文學慣勢悲劇，華文文學慣勢喜劇，這交文化有關係，像這幾冬傍 gún 翁 ê 福氣有機會 kā 家甲做踮歐洲 hōo 我有機會接觸非頭篩仔 tsiah-ē 出現 ê 歐洲影戲，我發現法國、西班牙 ê 影戲有一種自頭到尾 hōo 人沈重卻無法度 kā 放棄換片 ê 深度思考，德國 ê 影戲凡勢經歷兩斗世界大戰，𪜶慣勢 tī 笑詼內底提出沈重 ê 議題引𤆬觀眾思考問題。總是遮 ê 影戲 tī 向時捙拚 buē 過 Hollywood 電影，目今更加免講捙拚 buē 過無到 1 分鐘 ê 影片。
我 ê 年閣 m̄ 捌讀過 228 歷史 mā m̄ 捌臺灣有一个族群號做平埔族，總是我滿心感謝《一桶蚵仔》kā 洗呔 ê 歷史成做紙本影戲 hōo 我有機會勻勻仔 kā 伊剪做家己 ê 短影片，慢慢仔伐入屬於阿公阿媽芋仔爸番薯母 ê 1950 年代並重新認捌「討厭」露西亞悲傷伊 ê 背後是啥物因端造成。
這段話 hōo 我想著我 mā 是泅出這个這我慼 ê 島 tsiah 沓沓仔認捌家己是 tsiâ 交討厭 ê 露西亞悲傷和解 ê 過程。Hegel（黑格爾）講 Die Weltgeschichte ist der Fortschritt im Bewusstsein der Freiheit 世界歷史是自由意識 ê 進步。Rosa Luxemburg 講 Freiheit ist immer die Freiheit der Andersdenkenden 咱想 ê 自由永遠交別人無相𫝛。外國 ê 月娘敢有較媠？有，因為地理位置，tī 瑞典乞食攑蠓捽，假仙假觸假扮 Henry David Thoreau（梭羅）月娘閃紅霞交我敢若 kan-ta 一指 ê 距離，媠甲 hōo 我 buē 記持寒甲爍爍顫 ê 魂舒，總是瑞典 ê 月娘遐爾仔媠我猶原數念經過無限時光漸漸成做太平洋一粒星 ê 台灣，準做我 tuì 伊 ê 歷史無啥理解，我卻永遠攏知影伊永遠 buē 成做巴頓抑是麥克來欺負我，不而過我卻有可能成做巴頓佮麥克來欺負伊。
Heinrich Heine（海𣵀）講 Von allen Welten, die der Mensch erschaffen hat, ist die der Bücher die Gewaltigste.Tī 人類創造 ê 世界，上強大 ê 是冊，tī 這个愈來愈 tsuē 假範換正範 ê 世代我無確定，不而過冊確實是人類創造 ê 世界，上強大 ê 科技，因為伊 hōo 人有機會跟綴歷史改善家己 ê 無知。像《一桶蚵仔》hōo 我改善家己 ê 無知，原來外國文學台語翻譯 tī 2003 年就有紙本冊通閱讀。
2023.10.31
