我寫過４本古早背景的小說。講到「古早」的時、地背景，「當然」就是對面彼塊土地的。十若年前，我拄著教台語的老師，伊問我：「是按怎無寫台灣古早背景的小說？」我講：「我對台灣的歷史，一點仔就無熟似，毋知影。」
想著台灣的歷史，袂講葡萄牙、西班牙，自荷蘭人開始，鄭成功、清領時期、日本時代，閣有原住民。國民政府一來，實施的教育佮政治，共規个台灣變做另外一國。看起來誠麻煩的歷史，我一點仔就無想欲去讀。
這幾若年，我講台語、寫台文，較有看台灣人、台灣事、捌台灣的文章，想著一件代誌，因為咱毋捌進前台灣人寫的文章佮冊，所以毋捌𪜶（in），愛等有人翻譯出來，抑是有人研究這个人、彼段歷史，咱才知影。
￭上近的，是日文改華文，改講華語，寫華文，原本讀日本冊的人變做青盲牛，毋捌字，袂曉講話，原本用日文寫文章、寫冊的讀冊人，後代的人攏毋捌𪜶（in）矣！因為後來的台灣人袂曉日文，毋知影𪜶（in）做過啥物代誌？頭殼內底咧想啥？無親像咱會曉看文言文，會使直接讀𪜶（in）寫的文章，毋管偌古早的中國人咱攏知影，誠熟似。
￭抑閣有「白話字」，台語毋是無字，幾若百年前，傳教士來台灣傳教，共台語用拼音寫落來，號做「白話字」，用白話字出版報紙、冊，會曉拼音的人就會使讀佮寫台語。國民政府來台灣，推行「國語」，禁白話字，以早台灣人寫的物仔大部份的人攏毋知，這是真大的斷層矣！
這馬的台文字有３種系統：正字、台羅（台語羅馬字）、白話字，台羅是自白話字修改一寡仔，２个差無偌濟。欲寫佗一種，在人佮意。
（2025.12.31.）
教育部台語辭典，https://sutian.moe.edu.tw/zh-hant/
