《大士爺厚火氣》 第十七集：地陷

墜落的瞬間，挩窗想著伊的一生。

佇伊心肝頭浮出來的，代先是媽媽，閣來是爸爸雺霧的面容，青翠翠的田洋、樹仔王公、懶屍啊懶屍䖙踮紅磚仔厝的日頭光⋯⋯所有的數念，攏比袂過阿媽，結規手面的趼，金滑無皺痕的笑容⋯⋯毋知這改的墜落，是一秒或者是一世人，挩窗唸出伊的手尾字：「鄭明窗，這个勇敢的囡仔兄，為著解除打貓的危機，犧牲伊寶貴的姓命。伊十二年的夭壽，可比蠟條遐短，毋閣，伊真了不起，實在有夠彼咧不止仔⋯⋯」

「phû-lah」一聲，挩窗落水。

先嗾著，水食幾若喙，彼種艱苦，予伊知影伊猶活咧。

強欲無法度喘氣矣，四爿面是烏汁汁，這改真正會死⋯⋯

「e̍h-eh」一聲，水煞來退了了，挩窗嗽掛吐，深深欶一口氣，鼻著𣻸𣻸的癩ko味。伊有感覺矣，感覺坐的所在軟㽎㽎、黏黐黐，問家己講：「我佇佗位？」

「你佇我的腹內。」彼咧聲說就佇挩窗的四箍圍仔轉踅，頭頂一空開開合合，微微仔透光。

「哈哈！總算予我等著矣！我欲復仇！我欲共你拆食落腹！」

「你到底是啥貨？」挩窗問。

「免問啊啦！你就欲死啊閣問！」

「啥！我欲死矣？我閣活咧呢！啊！死進前上少予我知影，我到底是按怎死的？」