《大士爺厚火氣》第十五集：魯蛇

虎爺哈囉躡跤尾，覕入去桌仔跤，桌布崁甲密密密，內底暗眠摸。

伊的四箍圍仔煞出現圓粒仔，一對一對，紅色、青色、彩色，閣有白色帶烏仁的──彼是挩窗，參眾神明的頭圇入去桌仔跤，共哈囉金金仔相。

「屘虎爺，阮參詳好矣，若欲派神明去廟頂揣三仙，著生做細粒子，閣愛跤手猛掠。眾神明全票通過，上合插的就是你啊！」媽祖的心情較平靜矣，按後殿來佮神明開會，出馬和哈囉對喙。

「為何閣是我！」哈囉對桌仔跤趒出來，面臭臭，喙吊豬肉：「往過有代誌，阮虎爺是旗軍仔，有神明行代先去做前鋒啊⋯⋯著啦！三太子走去佗？伊上衝上勇，這改怎會無伊的影？」

「唉⋯⋯講著三太子⋯⋯真了然⋯⋯」媽祖吐大氣，手提一支蠟條，手模去閘火，敢若投影機，壁堵就走烏影出來。

「是欲搬皮猴戲是無？」挩窗問。

「敢無看著彼兩支長長的雉雞尾？三太子啊三太子！守踮房間拍電腦，按怎叫攏叫袂出來。」媽祖講。

「三太子？是彼个跤踏風火輪、手攑金槍的李哪吒？伊佇天頂傱來傱去，閣去大鬧東海，挽龍王的筋，啥物攏毋驚啊！」挩窗講。

「你是咧講盤古開天的代誌啊？恁人的文明會進步，阮神明行閣較頭前。恁民雄徛中正、嘉義、吳鳳大學進前，阮神明界行佇時勢頭前，早就實施高學歷政策。但是，就親像你台灣人健保濫糝用，無臭無潲，害保生大帝過勞；三太子無偌好過，已經毋是彼个愛較車的囡仔，青少年哪吒收跤洗手，這馬佇咧認真讀冊，欲致博士⋯⋯」媽祖講。