台語文學
「你是講佗一塊？」十八个羅漢同齊攑頭看。
「山頂毋是有塔，邊仔有一塊雲啊！」挩窗伸手去指
壁堵面的浮雕。
「喔！你是講雲啊！借彼
軟荍荍的是欲創啥貨？」羅漢的
目頭攏總十八个，做一改
拍結。
「
橫直借我用啦！」挩窗話猶未講完，跤一躘，跳起去羅漢山；閣一縱，共彼塊雲
𢯾牢咧，「pû」一聲。雲
硬弓袂癮出來，挩窗雙跤出力
蹔壁，一下、兩下、三下，若親像汽水
矸仔的蓋，「po̍k」一聲，雲就
挽出來矣——雄雄忽然間，挩窗規个人
倒摔向，按半空中落落來，危險！
眾神大緊張，
瀳出去欲
承⋯⋯咦？怪奇咧！竟然轉做慢動作，挩窗毋但無栽落去，
顛倒浮起來啊啦！雲膨起來啊啦！可比𢯾一粒幼綿綿的枕頭。挩窗飛踮柱仔頭佮樑仔角之間，參厝瓦下跤的獅仔、象、鳳凰、鰲魚
相借問……。
挩窗愈飛愈懸，就欲挵著厝頂矣……紲來
捻雲的
尻川，袂輸漏風的
雞胿，沓沓仔沓沓仔降落來，跤底貼佇八卦形的塗跤磚，
穩觸觸。
眾神隨圍佇祭桌頭前，哈囉問：「你是欲變啥物
蠓啊？」
