《大士爺厚火氣》第六集：珍珠

「觀音破病矣……。」哈囉講。

「hânn！觀音是神！怎會破病？」挩窗問。

眾神明吐大氣，廟恬靜落來，干焦聽著累累碎碎的聲音，若珠仔落佇塗跤兜，彼个聲音真細、真幼、真明，一點一點，擉挩窗的心房……。

「我共你講頭尾……。」媽祖拎䘼拭目墘，聲說慘慼：「觀音是我無言不說姊妹仔伴，阮逐工想的就是欲救濟世人。毋知是何因端，下街的第一工，觀音倒佇普陀巖，毋願落眠床。問伊佗位無爽快？伊干焦講：『我艱苦，我足艱苦啊！』煞共普陀巖關禁，疊石頭共洞封起來，按怎叫就是毋應聲，眾神明嘛挵袂入去。唉！恁人袂當掛無事牌，阮神明代誌了了，怎會按呢生？」媽祖的目屎，成做一粒一粒的珍珠，踮塗跤碎鹽鹽，心酸酸，閣變做較細粒的珍珠，細粒散做細細粒的……就無去啊……。

「觀音是阮阿媽上愛的神明，伊逐工踮觀音的擦仔頭前踅踅唸，害我耳空鬼仔擽甲欲死。我知！敢毋是觀音嫌歹聽，才去共洞口封起來！」挩窗講。

「你阿媽是佇唸佛經啦！烏白講！」哈囉掰會。

「我知彼是頌經啦！阿媽講只要虔誠注心，觀音就會保佑阮一家口仔。喔！原來觀音大士破病矣！莫怪阿媽這兩工性地遐䆀！歹枷枷！」挩窗喙翹懸懸。