【台北百萬遍】為小寡仔礙虐來存在（頂）

1.

按澎湖落船，返仔法師欲去台灣掠妖。

伊的橐袋仔干焦袋三項法寶：銀角仔，對厝門面剝落來的暗綠花磚，一粒喙齒。

佇人生盡尾的微微仔光，伊想欲做寡代誌，鏑派法術佇末世的人類社會賰上尾的一口氣，無人欲接手，閣較慘的是，予科技的奢颺炤甲毋成形。

返仔法師意識著，身軀內底的元神若符仔紙，一絲一絲當咧燒做烌。

伊著愛做寡代誌才袂拍損，佇鏑派的燈脈欲化去進前，佇人世間留淡薄仔跤跡。

甚至共燈點落去。

來到基隆港，天落霎霎仔雨，伊共花磚扲出來，雨滴踮頂頭，彼个形若沙漏彼款透光、流動。

返仔法師有歲矣，目睭真䆀，毋個，他會當看著透光的雨水內微微仔慒心的腌臢。

2.

返仔法師看出去，發現基隆港的聯境攏是舊的，無啥改變，干焦雨水佇咧粒積腌臢，幾十年來比例略略仔改變，垃儳減少，鬱卒增加。

但獅球嶺的另外彼頭，搢基隆河倒轉去，聯境亂甲無一塊，而且愈扯愈細，愈來愈歹扭掠。

佇燈脈化去進前，上無愛掠一隻小妖起來，共一場小小的反背舞予平就好。